Read Biete JOELA 3 Bible Online

JOELA 3 - Biete bible

JOELA 3

¹PUMAPA khan, “Ringai ta u, kha nikhua neh kha zoroah khan, Judai ram neh Jerusalem vângsakna chu inding inṭha nôk ki ti.

²Nam tin tin bûm ki ta, Jehosafat [2] Phâiah ṭhui bûm ki ti. Amakhan an chung thu rêl ki ti, Ki mi, ki dongtum Israel kha ram dang mihei lâiah an ichek indar a, Ki ram khah an risem indar sikin.

³Thla an sân a, ki mihei an risem a; Naipang ipatehei kha nochizuar richoh nan an mang a, Naipang nupangtehei kha uain richoh nan an zuar a.

⁴“Nangni Tura neh Sidon, nangni Filistia ramhei o, ki chungah phuba ila nin itum mani? Ki chungah phuba ila nin itum a nitin chu irang takkan nin chungah phuba kî lâk rang a nit.

⁵Ki tangkarua neh ki rângkachak nin lâk a, ker chon thil iṭha tak takhei nin biak in sungah nin chôi inlût a;

⁶An ram ata ilah vitah an om theina rangin Judai rama mihei neh Jerusalema omhei kha Grik mihei ziangah nin zuar tâk a.

⁷Ringai ta u, anni kha nin zuarna rama rithokin ruai isuang ki ta, an chunga nin itho angkan nangni thung tâng ki ti.

⁸Nin naipahei neh nin nainuhei kha Judai rama mihei kutah zuar ki ta, anni khan ram ilah taka om Seba mihei ziangah zuar nôk an ti,” PUMAPA khan ai ti tâk a nit.

⁹“Amahih namhei lâiah inpuang unla; ridoi rangin risiam sela; Mi râthei kha ithor unla; ridoi mi murdihei hong nâi sela; hong doi riseh.

¹⁰Nin rinêng irîtna môr rizum kha khandaiin icher unla, Nin theikung loihna chemhei khom kha ifeiin icher rei; Mi rât ino khomin, ‘Kî rât a nit,’ ti riseh.

¹¹Nangni a kôlvêla nam dang murdihei o, rimot takkan hong unla, hong ribûm rei, Amakhan, O PUMAPA, ni mi râthei hong tir roh.

¹²Namhei kha risiam ṭianin om sela, Jehosafata phâiah khan hong riseh; Amakhan an vêla nam dang murdihei roiirêl rangin iṭhung ki ti.

¹³An isual tak tak sikin, bu ât zoroa bu an iât ngai angkan ât inṭim unla, Grep sômkhur iliam zui zuika uain an ichil ngai angkan, hong unla, chîlpol rei.

¹⁴Mi sâng itam takkahei chu Jehosafat phâiah an om tâk; Amakhan PUMAPA nikhua a zuang itlung zel rang a nit.

¹⁵Inî neh ithla zîng a ta, ârsihei vâr khâi no nih.

¹⁶PUMAPA kha Zion tlânga rithokin irî vung vung a ta, Jerusalem khuaa rithokin a rôl isuang a ti; Rinêng neh rivânhei inîng a ta; Nikhomsela, PUMAPA khan a mihei inzôk a ti, Israel richihei rang kulpui nîng a ti.

¹⁷Keimah hi PUMAPA nin Pathian chu ki nit a, Ke tlâng rithiang Zionah ki om iti riang nin ti; Jerusalem kha mun rithiang ni tâng a ti. Nam danghein inê nôk khâi no nih.

¹⁸Kha zoro tenan chu itlânghei kha grep bilin rikhûng a ta, Mualheiah khom dût luang tâng a ti. Judai ram vaṭêk murdihei chu tui luang a ta; PUMAPA ina rithokin tuinâr zuang luang suak a ti. Sitim Phâi chu ifâ a ti.

¹⁹Judai ram an rûn sikin neh mi ningsiat sin ino thisen an isua sikin, Aigupta ram chu ramchâr chang a ta, Edom ram chu ram iṭôl chang a ti.

²⁰An thisen phuba chu lâng ki ta, Thiamno changhei chu zua no ning e. Nikhomsela, Judai ram chu kumkhuan ilua mai nîng a ta, Jerusalem khom suanpâr tin tin idênin ilua mai nîng a ti. Keimah PUMAPA chu Zionah khan om mai ki ti.”