Read Biete AMOSA 1 Bible Online

AMOSA 1 - Biete bible

AMOSA 1

¹Juda rêng Uzia inlal lâi neh Israel rêng Joasa naipa Jeroboama inlal lâi, nînupui inîng ma kum inikah khan, Tekoa khua bera enkoltu Amosa khan Israel chungchâng thu Pathianin inlârna a înmuhei chu hihei hih a nit.

²Amosa khan, “PUMAPA kha Zion tlânga rithokin iring takkan â khêk a, Jerusalema rithokin a zuang rikhông dur dur a. Bera lêngna muna loisûl iringhei a thêm zoi a, Karmel tlânga sûlhei khom kha a hong châr zoi tâk,” a ti a.

³PUMAPA khan, “Damaska khua mihei kha an isual mai mai sikin dengtheina ki întuang ngêt rang a nit. Gilead mihei kha bu zêpna thîrkut rizumin an itôk sikin.

⁴Khasikin, an rêng Hazaela rêng inah khan mei tir ki ta, rêng Benhadada rêng in kha hâl inrivâm ki ti.

⁵Damaska kho kul kotbâi khâr chu isiang ki ta, Aven Phâi iluatuhei chu inrimang ki ta, Beth-Edena rêng irol ichôituhei khom kha inrimang ki ti. Khante, Suria ram mihei kha Kir ramah bôia ṭhuiin om an ti,” a ti a.

⁶PUMAPA khan “Gaza khua mihei kha an isual mai mai sikin dengtheina ki întuang ngêt rang a nit. Edom mihei zianga bôia zuar rangin mi murdi an ṭhui a.

⁷Khasikin, Gaza khua kulpui chungah mei tir ki ta, an rêng inhei kha kâng inrivâm a ti.

⁸Asdod neh Askelon khuaa an ilalhei chu inrimang ki ti. Ekron kho chungah ki kut ilek ki ta, Filistia mi la om isunhei kha rimang vang an ti,” a ti a.

⁹PUMAPA khan, “Tura mihei kha an isual mai mai sikin dengtheina ki întuang ngêt rang a nit. Edom ramah khan mi murdi bôiin an ṭhui a, rualrichanna thuthlung kha an ivong indet khâi ino a nit.

¹⁰Khasikin, Tura kho kulpui chungah khan mei tir ki ta, an rêng inhei kha kâng rivâm a ti,” a ti a.

¹¹PUMAPA khan, “Edom mihei kha an isual mai mai sikin dengtheina ki întuang ngêt rang a nit. An suapui Israelhei kha khandaiin an ûmrizûl a, lungkhamna nei viat loiin, an ningmurna an inthuar mai a, an ningthikna kha iṭhuai nuam khâi mak a.

¹²Khasikin, Teman kho chungah mei tir ki ta, Bozra rêng inhei kha kâng rivâm a ti,” a ti a.

¹³PUMAPA khan, “Amon mihei kha an isual mai mai sikin dengtheina ki întuang ngêt rang a nit. An ram an inrizat theina rangin Gilead khua nupang nai vonglâihei an sâtthlêr a.

¹⁴Khasikin, Raba kho kulpui chungah mei sêm inchok ki ta, an rêng inhei kha kâng rivâm a ti. A kâng irî kha ridoi nî-a khêkiroi neh rua neh phâivua angkah nîng a ti.

¹⁵An rêng neh an milianhei kha bôiin ṭhui an ti,” a ti a.