Read Biete AMOSA 2 Bible Online

AMOSA 2 - Biete bible

AMOSA 2

¹PUMAPA khan, “Moab mihei kha an isual mai mai sikin dengtheina ki întuang ngêt rang a nit. Edom rêng ruhei kha an hâl inrivâm vang a.

²Khasikin, Moab ram chungah mei tir ki ta, Keriot rêng inhei kha kâng rivâm a ti. Moab mihei kha ridoina rihu, sipaihei ikhêk neh bekul irî-ah khan thîng an ti.

³Moab mihei roirêltu kha that ki ta, an milianhei murdi khom that riai ki ti,” a ti a.

⁴PUMAPA khan, “Juda mihei kha an isual mai mai sikin dengtheina ki întuang ngêt rang a nit. Ki dân kha an nôl a, ki thupêkhei vong mak a, an pahei lei ibiak ngai mirmil pathianhei ngir khan ai ṭhui inrimang a nit.

⁵Khasikin, Juda chungah khan mei tir ki ta, Jerusalem khua rêng inhei kha kâng rivâm a ti,” a ti a.

⁶PUMAPA khan, “Israel mihei kha an isual mai mai sikin dengtheina ki întuang ngêt rang a nit. Mi felhei, an thil ritâng an tuak theino sik ringotin neh mi inrianghei an pheikok bopka man an tuak theino sik ringotin suak ichang rangin sumin an zuar a.

⁷Mi inrianghei kha rinêngah an sirde a, an lampui ata mi riangvâihei kha an nam inrikiang a, pa neh a naipa khan suak nungâk khatkah an zâlpui a, ker ming rithiang an înnim ngai a nit.

⁸Mâichâm omna kipah mi inrianghei puan siakham chungah khan an zâl ngai a, an Pathian inah khan mi an richôna man heiah khan uain an iin ngai a nit.

⁹“Nikhomsela, ki mihei, nangmani sikin nin maa Amorhei, sidar thing angkana risâng neh saso thing angkana khir khom kha ken rimang vang a; a lêr tianga â râ neh a nuaitianga arzung khom ki înrimang a nit.

¹⁰Aigupta rama rithokin nangni ki hong ṭhui isua a, ramchârah kum sômilika sung nangni ki hong iruai a, Amorhei ram kha nin lua rangin nangni ki pêk a.

¹¹Nin naipahei lâia rithokin a ṭhen zânthla inih rangin ker thlang a, a ṭhen Nazarit inih rangin kî siam a nit. O Israel mihei, khangkah khan nangni kî donsui ni mak im a? Keimah PUMAPA hin kî ti a nit.

¹²Nikhomsela, Nazarithei ziangah uain iin rang nin pêk a, zânthlahei ziangah, ‘Thu inpuang no rei,’ itin thu nin pêk a.

¹³Atûn chu rinêngah nangni sirpol ki ta, Fathlua sip tâli rifat ṭût ṭût ngai angkan irung vong vong nin ti.

¹⁴Mi tlân irâthei ilua khom zôk no nia, mi râthei khom an ritha ṭuai a ta, râlpahei khomin an ringna lua inzôk thei no nih.

¹⁵Thal kâp mihei khom iding thei ual no nia; tlân irâthei khom zôk phâk no nia; sakor chungchuang mihei khom zôk thei ual no nih.

¹⁶Kha nî-ah khan chu mi rât inthang takhei lâia mi hâi tak khom kha kut korongin lâizâm thông a ti,” PUMAPA khan ai ti a nit.