Read Biete AMOSA 3 Bible Online

AMOSA 3 - Biete bible

AMOSA 3

¹O, Israel mihei, Aigupta rama rithoka ai ṭhui isua sungkuahei nin chungchâng thu PUMAPA îsîr thu hih lei ringai rei.

²“Nangmani bang rammuala nam tin tin lâiah kî riat neh kî donsui chu nin nit. Khasikah khan nin siatna murdiah khan kuttum nangni kî tho rang a nit,” a ti a.

³An inrual bak non mi pasal inikah munkan inzin an tîm a?

⁴Sakeibakneiin sa a man lâi a nit no-ah khan rampuiah â râm ngai im a? Sakeibaknei vânglâiin îte a man no-ah khan â pûk ata irâm a tîm a?

⁵A rang châng a om no-ah khan iva kha rinênga chângah khan â ôk thei ngai im a? Châng kha îte â tôn om loiin nuaia rithokin arkhap ngai im a?

⁶Râlpuang bekul khopuiah â ringin, mi tin an rilônthing no nîm a? PUMAPA thu ni loiin khopuiah thil ṭhano tlung a tîm a?

⁷A diktakkan PUMAPA Pathian khan a sinthotu, a zânthlahei ziangah a thu rithup ril loiin îte tho ngai mak e.

⁸Sakeibaknei â rungah hin tûm ṭi viat loia om thei rang a? PUMAPA Pathian khan thu â sîrah hin, tûm a thu inpuang nôk loia om ngam rang a?

⁹Asdod khua rêng inah hei, Aigupta ram rêng inah hei khom ril rei, “Samari tlângheiah khan ribûm unla, khantaka an lâia buaina liantak iomhei neh an risirde risak natinsat tlia kha en rei,” itin.

¹⁰PUMAPA khan, “Hi mihei hin sirdena neh tharuma mi thil an ilâkheiah khan an inhei an in sip a. Idik takka om dân rêng rêng khom reh tlak mak e.

¹¹Khasikin, an irâlhein an ram kha hong hual an ta, an kulpuihei kha isim pêk an ta, an rêng inhei khom iseh pêk chit an ti,” a ti a.

¹²PUMAPA khan, “Berapun sakeibaknei bâia rithoka a bera ke bopka manih, a kuar lek manih bang ilua khom a înzôk ngai angkah khan, Samari khua zâlmun ihoi tak chunga om Israel nai iomhei kha iroicheka lua chu inzôkin om an ti.

¹³Ringai unla, Jakoba richihei iril rei,” Tinrêngthothei PUMAPA Pathian khan a ti.

¹⁴“An siatna sika Israel mihei kuttum ki tho nin chu Bethela mâichâmhei isim ki ta, mâichâm rikîhei kha ikhiak riai ki ta, rinêngah ṭul a ti.

¹⁵An phalbi inhei neh fûr inhei khah ito sim ki ta; saihaa inrivo inhei kha ichimin ram a ta, in roinpui murdi khom isehchitin om a ti,” PUMAPA thu suak khan a ti.