Read Biete AMOSA 4 Bible Online

AMOSA 4 - Biete bible

AMOSA 4

¹Nangni Samari nupanghei, Basan serât itak angkana takhei, inrianghei ngêpsia a, risamhei sirde a, nin pasalhei ziangah, “Hong chôi unla, lei in rei u,” tituhei, hi thu hih ringai rei.

²PUMAPA Pathian rithiang khan hingkan a ti, “Ringai ta u, nikhua a hong itlung thiai a nit. Thîr kuaikimin nangni nûk suak an ta, mi tin inga rikuaia ôk angkan nangni in-ôk an ta,

³Kul bang ri-ong inâi taka kâi suakin om nin ta; Hermonah nangni buk an ti,” a ti.

⁴PUMAPA Pathian khan, “Israel mihei, mun rithiang Bethelah khan fe unla, thonsual rêk rei; Gilgalah khan fe unla, sinsiatna inpung rêk rei. Tho fe unla, ribôlna kha zîng tin hong chôi unla, nin sômka khatkahei khah sûn thumka danah hong chôi rêk rei.

⁵Chol ipol ibai kha lômthu ril ribôlnan lan rêk unla, mahni lungdoa nin thilpêkhei kha ripâkpui unla, inpuang rêk rei. O Israel mihei, hingkana tho hih nin nuam lam tak a nit a.

⁶“Khante, keimah ngêiin nin khopui murdiah neh nin munpui murdiah ṭâmna neh risamna nangni ki pêk a; khannisela, ki ziangah hong kîr mak chei u.

⁷Nin buhein rua tui an nang lâi takin rua sûr rang nangni ke dan pêk a, khopui khatka chungah rua ken sûrin khopui dangah sûr ngai mak a, mun khatka chungah rua a sûr lâiin mun dang kha chu a châr khap ngai a.

⁸Tui rihâla dangichârin khopui dang dangah tui iin rang izongin fêng an ta; nikhomsela, an khopka in rang tui om no nih. Khangkah dôran khom ki ziangah hong kîr nuam mak chei u.

⁹“Nin chimuhei em inchâr rangin ithli lum nangni ki tir pêk a. Nin rikulhei, nin grep rikulhei, nin theipui kunghei, nin oliv thinghei murdi khom thing ringe khan ai fâk zoi riai tâk a nit. Khangkah dôran khom ki ziangah hong kîr nuam mak chei u.

¹⁰“Aigupta ram chunga ripui kî tir angkan nangmani lâiah ripui ki tir a; Khandaiin nin vânglâihei kha ki that a, nin sakorhei kî ṭhui inrimang vang a nit. Nin riabuka nin sipaihei ruak ithu nam isia kha nin nâr ken sip a. Khangkah dôran khom ki ziangah hong kîr nuam mak chei u.

¹¹“Sodom neh Gomora ki înrimang angkan nin lâia ṭhenkah ken rimang a. Mi a ṭhen a la dam isunhei khom thingthubong meia rithoka lâk isua angkah nin nit a. Khangkah dôran khom ki ziangah hong kîr nuam mak chei u,” PUMAPA khan a ti.

¹²“Khasikin, O Israel, kuttum nang kî tho ngêt rang a nit; ni chungah amahih ki tho rang sikin, O Israel, ni Pathian itong rangin rifo ṭian ta roh.”

¹³Pathian khan itlânghei ân ding suak a, ithlihei a siam a. A lungdo kha miriamhei ân riat ngai a, Sûn neh zân a siam a. Rinêng pumpui chungah roi a rêl a, Arming chu PUMAPA, Tinrêngthothei Pathian a nit.