Read Biete AMOSA 5 Bible Online

AMOSA 5 - Biete bible

AMOSA 5

¹O, Israel mihei, hi thu nangmani nangni ki ṭâna la, kî sak hih ringai rei.

²Nungâk rithiang Israel kha â lîr tâk a; thoi nôk tlak khâi no nih. A ram sung ngêiah â lîr a, amah inding nôk rangin tute omak e.

³Tinrêngthothei PUMAPA khan, “Ridoi buala rangin Israel khopui khan sipai sângkah a tir suak a; nikhomsela, rizakah bang an hong kîr nôk a, khopui dang khan rizakah a tir suak a; nikhomsela, sômkah bang an hong ikîr nôk a nit,” a ti a.

⁴PUMAPA khan Israel richihei ziangah khan, “Ki ziangah hong unla, ring nin ti.

⁵Beersebaah khan ribôl rangin fe no unla; Bethelah khan ne zong no rei, Bethel kha chu chanlamboi ai nit rang a nit. Gilgalah khom fe no rei, Gilgal mihei kha chu inkhêl loiin suaka manin an iom rang a nit,” a ti a.

⁶PUMAPA ziangah fe unla, ring nin ti; khanonchu, Israel mihei chungah mei angkan ani kha suak a ta, kâng inrivâm vang a ti. Bethel khuaa mihei kha mei khan kâng a ta, tutên mei kha that thei no nih.

⁷O, nangni dikna herinkôi a, felna nôl ngaituhei o, nin chung ân khôk vang na!

⁸PUMAPA khan siruk neh sizuchoi a siam a, Ani khan zân inthim kha sûn khovârin â let a, Sûn kha zân thimin â let a. Ani khan tuikhanglian tuihei kha a koi a, nuai chungah ân sûr a. Arming chu PUMAPA a nit.

⁹Ani khan mi râthei chungah neh, An kulpui chungah rimangna a îthlun ngai a nit.

¹⁰Tukhom roirêl muna idiktaka rêltu kha nin theimâk a. Thudik iriltu kha nin nel a.

¹¹Inrianghei kha nin sirde a, an buhei kha zâlrâtin nin lâk pêk a. Khasikah khan nin talung in sin ihoi takheiah khan om no tin u; grep rikul ihoi tak tak nin isiama uain kha in no tin u.

¹²Nin siatnahei tamzia neh nin sualnahei natinsatzia ki riat tâk a; mi felhei nin nuam nin loa, fâkinrûk nin fâk a, roirêl munah inrianghein roirêl dikna an mu rang khah nin idan a.

¹³Khasikah khan, khangkana zoro ṭhano tak a nit lâiah khan idâirek hi ivâr sin a nit.

¹⁴Nin ring theina rangin ṭhatnona zong loiin, ṭhatna zong rei; khanchu, PUMAPA Tinrêngthothei Pathian ei ziangah a om nin iti ngai angkah hin nin ziangah om titak a ti.

¹⁵Sualna khah nel unla, ṭhatna ringaiinnah unla, roirêl munah khan dikna inding ngêt rei. Hi nama mi la om isunhei chungah khan PUMAPA Tinrêngthothei Pathian khan lungkhamna a la nei duai lôi im.

¹⁶Khasikah khan, PUMAPA Tinrêngthothei Pathian khan, “Khopui kotsua tinah ngaisiata ṭapa khêk irung rak rakna om a ta. Loi neituhei neh lusûn ṭâ thiamhei kha mithi ṭâ rangin koi an ti.

¹⁷Grep rikul murdiah ṭap irungna om a ti. Hihei murdi a tlungna rang chu kuttum nangni ki tho rang sikin a nit,” PUMAPA khan a ti.

¹⁸PUMAPA nikhua ngâkmotuhei, nin chung ân khôk vang na! Îrang sika PUMAPA nikhua kha nin ingâkmo mani? Nin ta rangin kha nikhua khah ivâr ni loiin izîng ai nit rang a nit.

¹⁹Sakeibaknei ata lâizâm itho a, ivom ritongpui mi angkan neh mahni inah ilût a, banga kut ringat a, irûlin a lei îchuk mi angkah khah nîng a ti.

²⁰PUMAPA nikhua kha ivâr ni loiin izîng ai nit rang a nit. Râifânna sûn ni loiin ngaisiatna sûn ai nit rang a nit.

²¹PUMAPA khan, “Nin sakhua ruaiṭhehei hi ki theimâkin, kî nel a nit. Nin ribûmna lianhei khah kî lôm viat ino a nit.

²²A nit, nin hâlrivâm thillan neh nin thillanhei khah ne lan khom unla ipom no ning e; nin ran vâi itakhei ringeina thillana nin hong ilanhei khom ipom ual no ning e.

²³Nin lasak kuarchok iom khah ringam rei; nin perkhuang irîhoihei khah nangni ringai pêk no ning e.

²⁴Kha nêkan chu roirêlna dik kha tui angkan luang sela, felna kha tuipui kang ngai ino angkan luang riseh.

²⁵“O, Israel mihei, ramchârah kum sômilika sung nangni ke ruai lâiah khan ribôlna neh thillanhei nangni ki zong im a?

²⁶Nikhomsela, atûn chu, nin rêng pathian, Sakut rilimhei neh nin ârsi pathian Kaiuan rilimhei chubai nin ûn tâk a.

²⁷Khasikin, kha mirmilhei kha chôi nin ta, Damaska kho khêl tiangah khan bôiin nangni kî ṭhui rang a nit,” PUMAPA, arming Tinrêngthothei Pathian khan a ti.