Read Biete AMOSA 7 Bible Online

AMOSA 7 - Biete bible

AMOSA 7

¹PUMAPA Pathian khan inlârna a nen mu a: Khantakah khan khâifapôl lôm itam takkah a siam ki mu a, amahih rêng dongtum fapui an ât zoi a, loisûl a hong mong phut lâi takin a nit.

²Inlârnaah khan, kha rama loisûl kha khâifapôl lôm khan an fâk zoi vang tâk a; khanungchu, “O PUMAPA PATHIAN, ni mihei chu izâ roh. Ingkan im an zôk thei rang a? Anni laka an chînin, rizal rizual tak an nit a,” ki ti a.

³Hi chungchâng thu-ah hin PUMAPA kha a lungril a thleng a, Ani khan, “Kha thil khah ni mihei chungah tlung no nih,” a ti a.

⁴PUMAPA khan inlârna a nen mu nôk a: Khantakah khan a mihei dengintheina rangin mei a koi lâi ki mu a; mei khan tuipui inthûk tak kha a kâng vang a, ram khom a hong kâng thiai tâk a.

⁵Khanungchu, keiman, “O PUMAPA PATHIAN, ringam ta roh. Ingkan im ni mihei kha an zôk thei rang a? Anni laka an chînin, rizal rizual tak an nit a,” ki ti a.

⁶Hi chungchâng thu-ah hin PUMAPA khan a lungril a thleng nôk a, ani khan, “Hihei khom hih zuang tlung no nih,” a ti a.

⁷PUMAPA khan inlârna a nen mu nôk a: Khantakah khan PUMAPA kha en indikna manga siam bang kôlah a ngir a, a kutah khan en indikna a chôi ṭian a.

⁸Khante, ani khan ki ziangah, “Amosa, im nî mu hih?” a ti a. Khante, keiman, “Endikna,” ki ti a. Khanungchu, ani khan, “Ringai ta, ki mi Israelhei lâiah endikna kî sia rang tâk a nit, anni khah tiklâi khomin ringai thiam nôk khâi no ning e.

⁹Isaka bôlkuanghei kha inram hong nîng a ta, Israel mun rithianghei kha isehchit nîng a ti. Khante, rêng Jeroboama insungkuahei inlalna kha inmong ki ti,” a ti a.

¹⁰Bethel thiampu Amazia khan Israel rêng Jeroboama ziangah, “Amosa khan Israel mihei lâiah nang a phiarrûk a, a thuril khan ram khah a isiat ngêt rang a nit.

¹¹Hihei hih a ṭong tihei a nit, ‘Jeroboama chu khandaiin thîng a ta, inkhêl loiin an rama rithokin Israel mihei chu suaka ṭhui inrimangin an lai om ngêt rang a nit,’ ai ti a nit,” itin thu a thon a.

¹²Khanungchu, Amazia khan Amosa ziangah, “O nangmah zânthla, fen la, Judai ramah ro roh, amakhan ni fâk muna rangin thu ril roh.

¹³Bethel khuaah hin chu thu ril khâi no roh; Hi mun hi chu rêng mun rithiang neh rampumpuin Pathian an biakna mun kêng ai nit,” a ti a.

¹⁴Khante, Amosa khan Amazia ziangah khan, “Zânthla ni mang a, zânthla naipa khom ni mang e; bera lôm enkoltu neh theipui thing enkoltu kêng ki nit.

¹⁵Nikhomsela, PUMAPA khan bera lôm enkoltu ata khah a ne lâk suak a, fen la ki mi Israelhei ziangah thu ril roh, itin thu a ne pêk a.

¹⁶Khasikin, atûnah hin PUMAPA thu ringai roh: Nangman Israel ikalin thu ril non la, Isaka insungkuahei idemin thu inpuang no roh, ni ne ti a.

¹⁷Khasikah khan Amazia, PUMAPA khan ni ziangah, ‘Ni nupui kha khopuia nochizuar nîng a ta, ni naipahei, ni nainuhei kha khandaiin ilîr an ti. Ni ram kha sem indarin mi danghei ziangah ipe nîng a ta, nang khom nam danghei ramah khan thîng ni ti. Inkhêl loiin Israelhei kha an ram ata suaka ṭhui inrimangin om ngêt an ti,’ a ti” a ti a.