Read Biete AMOSA 8 Bible Online

AMOSA 8 - Biete bible

AMOSA 8

¹PUMAPA PATHIAN khan inlârna a nen mu nôk a: Khantakah khan thei koka om ki mu a.

²PUMAPA khan, “Amosa, im nî mu?” a ti a. Keiman, “Thei imin, koka om,” ki ti a. PUMAPA khan ki ziangah, “Ki mi Israelhei mongna rang a hong tlung tâk, ki lungril phêr khâi no ning e.

³Kha nî-ah khan chu rêng inah râifân taka zâi ngaihei khah beidong takkan ṭap an ti. Mun tinah mithi ruak om a ta, ṭong loiin pai an ti,” a ti a.

⁴“Amahih ringai rei, O risamhei sirde a, ram sunga mi inrianghei inrimang itumtuhei o.

⁵Nin khâtin, ‘Bu ei zuar theina rangin thla thar kût khah tikin im a hek rang tâk. Ibaidi ei zuar nôk theina rangin sabat nî khah tikin im a thleng rang tâk. Khanchu, Efa inchîn ei ta, sekel inrik ei ta, varna dikino ei mang rang;

⁶Bu arsi neh rizât bang ei zuar a, tangkaruan mi inriang ei inrichôk a, mi risamhei khah pheikok bopkah banga ei richôk theina rangin,’ nin ti a.

⁷“PUMAPA Israelhei Pathian khan ṭong arkhâm a. Inkhêl loiin an sinsiat rêng rêng khatkah khom ringil tlak no ning e.

⁸Hi sikah hin an ramah khan nînu innîng ki ta, a sunga om murdi khom lunginzîngin om an ti. Nail vadung voika zuang iliana, zuang risok a, voika zuang rikâi nôk ngai angkan ram pumpui kha risângin riniam a ti.

⁹Zoro a hong itlung thiai tâk a nit, khatikin chu sûnlâi takah nîsa inzîng ki ta, sûn inî lum lâi takin rinêng khah zîng khap a ti. Keimah PUMAPA Pathianin kî ti a nit.

¹⁰Nin ruaiṭhehei khah beidonga ṭapna nangni inchang pêk ki ti. Nin lu mêt inkol a, borapuan isil rangin nangni siam ki ta, min a naipa neisun ai sûn angkan om nin ti. Kha nikhua kha chu a mong idênin dengthei inkhôkna sûn nîng a ti.

¹¹“Zoro a hong itlung thiai a nit, khatikah khan chu ram sungah khan iṭâm tir ki ta, bu neh tuia ṭâmna ni loiin, PUMAPA thu riatna ṭâmnaah khan ṭâm an ti.

¹²Khante, PUMAPA thu zongin tuikhangliana rithoka tuikhanglian idênin neh mâra rithoka sak idênin rivâk vêl an ta; kil tinah itlân an ta; nikhomsela, mu no nih.

¹³Kha nikhuaah khan chu nungâk neh tlangvâl râtlâihei ilua khom tuirihâlin rizal an ti.

¹⁴Samari khuaa mirmil chubai iûntuhei, Dan khuaa pathian rilim chubai iûntuhei neh Beerseba mirmil ipuntuhei kha chu ilîr an ta, thoi nôk khâi no nih.”