Read Biete AMOSA 9 Bible Online

AMOSA 9 - Biete bible

AMOSA 9

¹PUMAPA chu mâichâm kôlah â ding ki mu a. Ani khan thupêk a pêk a, “Tempil chopuihei khah a sîpah itoh rak rak roh, a pumin inîng vang riseh. A rêngkan chim sela, a sunga om mihei murdi del riseh. Khante, â thi bânhei khah keiman khandaiin that ki ti. Tute zel zôk viat no nih.

²Seol idênin an lampui kua choih thal man sela, khantak ata khom ki kutin kâi isuang ki ta; rivânah lui man sela, khantak ata khom kâi isim ki ti.

³Karmel tlângsîpah ribih man sela, zong suak ki ta, khantak ata khah zuang kâi iṭhum ki ti. Khante, tuikhanglian mongah ribih man sela, khantakah khan khom rûlpui khah thu pêng ki ta, anmani ichuk a ti.

⁴An irâlhein bôiin ṭhui khom sela, khandaiin insât that ki ti. Anmani ṭangpui nêkan anmanihei inrimang hih kî tum tâk a nit,” a ti a.

⁵PUMAPA Tinrêngthothei Pathian khan, Rinêng khah a tôn a, â nîng dur dur a, A sunga om murdihei khah beidongin an om a. Rammual pumpui khah Nail vadung, Voika zuang iliana voika rikâi nôk ngai angkan arsângin arniam a.

⁶PUMAPA khan rivânah omna rang in a siam a, Rinêng chungah khan a vânkhup kha arngat a, Tuikhanglian tuihei kha a koi a, rinêng chungah ân sûr a. Arming chu PUMAPA a nit.

⁷PUMAPA khan, “O Israel naihei, nangmani angkah takin Ethiopia mihei khom ki irngaitua a nit. Aigupta ram ata nangni ki hong iṭhui suak angkah takin Filistia mihei khom Kret ata ki ṭhui suak a, Suria mihei khom Kir ram ata kî ṭhui suak a nit.

⁸Keimah PUMAPA Tinrêngthothei mit khah hi Israel ram isual chungah hin a fûk tâk a, rinêng chung ata ki înrimang vang rang a nit. Nikhomsela, Jakoba richihei chu inrimang vang no ning e.

⁹“Keiman thu pêng ki ta, leitaka bu rikhei angkan Israel mihei chu nam tin tin lâiah rikhei ki ta; nikhomsela, rimal ichînte tak khom nuai chungah ṭul no nih.

¹⁰Ki mihei lâia mi sual murdi, ‘Ṭhat nona khan ne môk phâk no nia, ne man phâk no nih,’ itituhei khah khandaiin thîng an ti,” a ti a.

¹¹PUMAPA khan, “Nikhua a hong tlung thiai tâk, kha nî-ah khan chu in ichim â ram tâk angkana om Davida rêng ram khah inding nôk ki ti. A siatna munhei khah siam inṭha nôk ki ta, matona angkah ngaingirin inding thar nôk ki ti.

¹²Edom ram a la om isun khah dong an ta, ker ming rilam ngai nam murdihei khom Israelhei khan nei tâng an ti.” Hi thil itho rangtu PUMAPA thu suak khan ai ti a nit.

¹³PUMAPA khan, “Nikhua a hong itlung thiai tâk a nit, Khatikin chu ât zoi loi rakkan bu khah vâng a ta, Sôm zoi loi rakkan grep kha irâ a ti. Itlâng risânghei ata uain ithlum khah luang suak a ta, Mualheiah khan luang zun zun a ti.

¹⁴Ki mihei chu bôia an itângna ata khah an ramah ṭhui kîr nôk ki ti. An khua ram tâkhei khah siam inding nôk an ta, lua nôk an ti; Grep rikulhei siam an ta, a uain khah in an ti; Rikulhei siam an ta, â râ tharhei khah fâng an ti. 1

¹⁵Ki mihei chu an zianga kî pêk ramah khan in-om ki ta, An ram ata khah ûmisua ni nôk khâi no nih,” PUMAPA nin Pathian khan ai ti a nit.