Read Biete OBADIA 1 Bible Online

OBADIA 1 - Biete bible

OBADIA 1

¹Obadia inlârna mu, PUMAPA Pathian khan Edom nam chungchângah hingka hin ai ti a nit. PUMAPA khan namhei lâiah palâi a tir a, A thucha chu kin lei riat a, “Tho thoi unla, Edom idoi rangin rithok ei ti u,” itin.

²PUMAPA khan Edom ziangah khan, “Rizal neng kan nang siam ki ta, Mi tin musitin om ni ti.

³O nangmah, lungpui rikul sunga lêng a, Tlângsîp risânga om a, ‘Tu ngân im rinênga ne kâi isim rang a?’ ititu, Ni lungril ripâkna khan nang ai lêm tâk a nit.

⁴Mupui angkan risâng taka vuangin, Ârsi lâiah ribu kâi man inla, Khantaka ta khah nang la kâi isim ki ti.

⁵Zânah inruhei an hongin, An inuamkah bang an irûk ngai a, Grep rimaltuhei khomin ichîntekah chu mit kâra rel an mâk ngai. Khannisela, nang chu ne râlhein nang phît infâi vang an ti.

⁶Esauva richihei, nin richon bûmhei khah iru pêk vang nin nit tâk.

⁷Ni thuthlungpuihei murdîn nang an lêm a, Ni ram ata nang an ûm rizûl a; Ringei irka ni ompuihei khan ni chungah kut an ilek a, Nang an inê tâk a; Ne bai ifatuhei ngêi khan ne ôkna rang châng an kam a; Anni khan, ‘Amah-ah khan vârna zel ai om ino a nit,’ an ti a.

⁸Edom kuttum ki tho nin chu, An mi vârhei inrimang ki ta, An vârna murdi inboi pêk vang ki ti.

⁹Teman râlpahei chu lâizâm inthông ki ta, Edoma mi râthei chu that inrimang vang ki ti.

¹⁰Ni suapui, Jakoba richihei ni that a, ne rok sikin, Kumkhuaka mualinphoiin neh inrimangin om ni ti.

¹¹Irâlhein an kul kotbâi rilun an hong isiat nî-ah khan, Nang chu ni lei rikiang a. Ram dang mihei khan Jerusalem richon an irok pêk a, An risem lâiah khan irâlhei lâia ṭang angkah ni nit.

¹²Judai rama ni suapuihein inkhôk a sik lâiin, An vânduaina khah ne riam rang ni mak a, Juda naihei an rimang nî-ah khan râifânin ni om rang ni mak a; An dengthei nî-ah khan ripâk takka ṭong rang ni mak che.

¹³Ki mihei an vânduai nî-ah khan, An chunga riloih rangin an kul kotbâiah lût non la; A nit, an vânduai lâiah khan an tuangna khah iriam non la, An vânduai nî-ah khan an sum neh puanhei ni lâkpêk rang ni mak e.

¹⁴Zôkna ranga lâizâm ithohei iman rangin lamṭhuamah iding non la; An denginthei lâiah khan mi a la om isunhei khah irâlhei kutah ni pêk rang ni mak e.

¹⁵Keimah PUMAPA hin nam tin tin chungah, Roi ki rêl rang nikhua a nâi tak e; Edom, ni lei tho lam angkah takin ni chungah itho nîng a ti; Ni sintho tak khah ni lu chungah ṭum nôk a ti.

¹⁶Ke tlâng rithianga dengtheina kilât ikhâ ki mihein an iin tâk angkah khan, Nam tin tinhei khan kha nêka dengtheina kilât ikhâ khah in an ta, A nit, in an ta, ivol an ta, rimang vang an ti.

¹⁷Khannisela, Zion tlângah khan â tlân suakhei khah om an ta, Mun Rithiang nîng a ti. Jakoba insunghei khan an ram ngaingir khah luang an ti.

¹⁸Jakoba neh Josefa insunghei kha mei angkah an nit a, Esauva insunghei kha chu bupôl angkah an nit a, Khasikin, anni khan kâng inrimang vang an ti. Esauva richihei rêng rêng chu izua viat om no nih. Keimah PUMAPAN kî ti a nit.

¹⁹Juda ram sim tianga omhei khan Edom ram khah dong an ta; Thlang tiang phâia omhei khan Filistia ram dong an ta, Israelhei khan Efraim neh Samaria khah dong an ta; Benjamina richihei khan Gilead ram dong an ti.

²⁰Mâr tianga Israela richi bôia tâng mipuihei khah hong kîr nôk an ta, Foiniki ram ata Zarefat idênin nei an ti. Jerusalem mi, Sardisa bôia tânghei khan sim tiang ram khopuihei nei an ti.

²¹Jerusalem râlpahei khan Edom khah rûn an ta, a chungah inlal an ti. Ram chu PUMAPA ram a nit,” a ti a.