Read Biete JONA 1 Bible Online

JONA 1 - Biete bible

JONA 1

¹Sûnkah chu Amitaia naipa Jona ziangah PUMAPA thu a zuang tlung a.

²Ani khan Jona ziangah, “Thoi inla, Ninevi khua, khopui roinpui takah khan fe roh. A chungthu tlâng isampui roh; a mihei siatna chu ki makung a hong tlung tâk a,” a ti a.

³Nikhomsela, Jona chu a thoi a, PUMAPA ziang ata lâizâm itho tumin Tarsis tiang a pan tâk a; Joppa khuaah a zu fe a, Tarsis ipan rang rikuang a mu a; chuangman kha a pêk a, PUMAPA ziang ata iro tumin Tarsis ipan ranghei lâiah rikuangah khan a chuang tâk a.

⁴Nikhomsela, PUMAPA khan thlipui natinsat tak tuikhanglianah khan ân râng a. Thlipui kha a natinsat sikin rikuang chu ikoidar chit rang angkan a om tâk a.

⁵Rikuangpuhei khan an ṭi a, mahni pathian an isam chit a. Rikuang khah a zâng theina rangin rikuang sunga neinunhei kha tuiah khan an pai suak a. Jona kha chu rikuang sungril takah a zu lût a; a zâl a, a lei in thlar a.

⁶Khanungchu, rikuang ruaitu khan a zu mu a, a ziangah, “Nangmah khah ithôm nî in thlar? Thoi inla, ni Pathian isam roh, ani khan ei rimang nona rangin a ne ngaitua duai tâk im,” a ti a.

⁷Rikuanga mihei khan, “Tho ta u, hi thil ṭhano ei chunga tlung hih tu sik im ai nit ei riat theina rangin, thla lei sân rei u,” itin an risôn a. Khanchu, thla an sân a, an thlasân khah Jona chungah a fûk tâk a.

⁸Khanchu, Jona ziangah, “Hi thil ṭhano ei chunga tlung hih tu sik im ai nit ne ril roh? Amahin im ni zuang itho? Taka rithoka zuang im ni nit? Tak rama mîm nî nit? Tu nam im nî nit?” an ti a.

⁹Jona khan an ziangah, “Hebrai mi ki nit a; tuikhanglian neh mualtlâng isiamtu rivân Pathian, PUMAPA chubai iûn ngai ki nit,” a ti a.

¹⁰Jona khan PUMAPA zianga rithoka lâizâm itho a nit iti thu khom kha anni khah â ril sa a. Mihei khah an ṭi nôk ual tâk a, a ziangah khan, “Thil inrît tak nî tho a nit hi te?” an ti a.

¹¹Thlipui sikin tuikhanglian lak chu arsok natinsat ual ual a; khanchu, rikuang mihei khan, “Thlipui sika tui risok arngam theina rangin ni chungah im kin tho rang?” an ti a.

¹²Jona khan an ziangah, “Ne dom unla, tuikhanglianah hin ne vir pai rei; khanchu, tuirifôn hih ringam a ti. Keima sika hi thlipui natinsat tak hih ai râng a nit iti ki riat tâk,” a ti a.

¹³Khannisela, rikuang mihei khan rikuang khah vakam itlungpui itumin an zâp rak rak a; nikhomsela, thei mak a; thlipui lak chu an chungah a râng natinsat ual ual a, takte rithîn thei khâi mak a.

¹⁴Khasikah khan PUMAPA chu an isam a, “O PUMAPA, hi mi ringna kin lâk sikah hin nen rimang tlak non la, mi ningsiat sin ino thisen mo hih kin chungah ringat tlak loi rangin nang kin ingên a nit. O PUMAPA, nangman ni nuam lam angkah takin thil nî tho ngai a nit a,” an ti a.

¹⁵Khanungchu, Jona khah an idom a, tuikhanglianah khan an ivir pai tâk a; voikazelin tuikhanglian risok khom khah arngam tâk a.

¹⁶Khanchu, kha thilhei sikah khan rikuang mihei khan PUMAPA chu an ṭi tak tak tâk a; PUMAPA ziangah khan ribôlna an lan a, a sin itho rangin ṭong an inkung tâk a.

¹⁷PUMAPA khan Jona lem rangin ngapui a lei inkung a; khanchu, Jona khah ngapui phûng sungah khan sûn thumkah neh zân thumkah a om a.