Read Biete JONA 3 Bible Online

JONA 3 - Biete bible

JONA 3

¹PUMAPA thu chu Jona ziangah a zuang tlung nôk a.

²A ziangah, “Thoi inla, Ninevi khua, khopui roinpui takah khan fen la, thu ril rang nang kî ti pêk khah vân puang roh,” a ti a.

³Khanchu, Jona khah a thoi a, PUMAPA thu angkah khan Ninevi khuaah a fe tâk a. Ninevi chu khopui roinpui tak, arzat tlia chu sûnthum lam a nit.

⁴Jona chu khopuiah khan a hang lût a, sûnkah lam ten khopui a hang rifang a, hingka hin ân puang a “Atûna rithoka sûn sômilikan chu Ninevi hih inrimang ai nit rang a nit,” a ti a.

⁵Ninevi mihei khan PUMAPA thu chu an iam tâk a; bu ngei rang itin an inpuang a, an lâia â chîn taka rithoka â lian tak idênin an rilet iti inlangna rangin borapuan an sil tâk a.

⁶Kha thu khah Ninevi khua rêng khan a lei riat a, a rêngṭhungmuna rithokah khan a thoi a, â lal thlukthla khah a lîp pai a, borapuan a sil a, rivut kârah â ṭhung tâk a.

⁷Thupêk isiamin Ninevi khosungah ân puang a, “Miriam manih, ui-âr manih, sial lômhei manih, bera lômhei manih khan îte an ritem rang ni mak; an fâkin an in rang ni mak e.

⁸Miriam neh ranhei khan borapuan sil sela, mi tinin ṭhatnemringai takkan Pathian chu isam riseh. Mi murdîn an sual rilet sela, an siatna murdi mah riai riseh.

⁹Ei rimang nona rangin, Pathianin a lungril ithlengin, a ningthikna natinsat tak chu â ṭhuai duai lôi im?” itin.

¹⁰Khanchu, Pathianin an sinthohei khah a en a, an om dân ṭhano khah an mâk tâk iti a mu a; khanchu, a lungril a thleng nôk a, an zianga a lei iril tâk, an chunga siatna thlun ai tum khah â ṭhûl a, kuttum ai tho khâi ino a nit.