Read Biete RITEPNA 1 Bible Online

RITEPNA 1 - Biete bible

RITEPNA 1

¹Israelhei kha Aigupta ram an hong mâk ata a kum inikna kum, a thla nikna, a sûn khatnî-ah khan Sinai ramchâra Ritongna Puan-Inah khan PUMAPA khan Mosia ziangah,

²“Nangmah neh Arona khan Israela richihei chu, a panam neh a insungkua ithlei tap kan tep riai unla;

³kum sôminika tena rithoka chungtianga mi râl ikâpa fe thei ten murdi riming chu riziak riai rei.

⁴Nangni ṭangpui rangin nam tin lâia mi khatkah, panam lupui an om sa rang a nit,” a ti a.

⁵Hihei hih nam ruaitu sin itho rang, an panam lâi ata rithlang suakhei chu an nit: Reubena nama mi Sedeura naipa Elizura,

⁶Simeona nama mi Zurisadaia naipa Selumiela,

⁷Juda nama mi Aminadaba naipa Nasona,

⁸Isakara nama mi Zuara naipa Nathanela,

⁹Zebuluna nama mi Helona naipa Eliaba,

¹⁰Josefa richi Efraim nama mi Amihuda naipa Elisama; Manasea nama mi Pedazura naipa Gamaliela,

¹¹Benjamina nama mi Gideonia naipa Abidana,

¹²Dana nama mi Amisadaia naipa Ahiezera,

¹³Asera nama mi Okrana naipa Pagiela,

¹⁴Gada nama mi Deuela[1] naipa Eliasafa,

¹⁵Naftalia nama mi Enana naipa Ahira hei hi an nit.

¹⁶Hihei hih mipuihei lâi ata ruaitua rithlang, nam lupui, Israel sungkua chunga roirêltuhei chu an nit.

¹⁷Hi mi sômleiinikahei hin an san a, Mosia neh Arona khan

¹⁸mipuihei murdi chu thla nikna, a sûn khatnî-ah khan an koi bûm riai a; a panam namin, a insungkua thlei tapin ipa kum sôminika ten chungtianga chu a ûnlian indônin an riming an hong riziak tâk a.

¹⁹Mosia zianga PUMAPA thupêk angkan Sinai ramchârah khan mihei chu an tep tâk a.

²⁰Jakoba nai uliantak Reubena richihei ata phutin an riming ridot dân angka takin a panam namin, a insungkua kuan, ipa kum sôminika ten chungtiang râl ikâpa fe thei murdi riming chu an riziak tâk a. An tam dân chu hingka hin a nit: Reubena namah khan mi sîngilikah sângirukkah rizarngakah an nit. Simeona namah khan mi sîngringakah sângikuakkah rizathumkah an nit. Gada namah khan mi sîngilikah sângringakah rizarukkah sômringakah an nit. Juda namah khan mi sîngsarikah sângilikah rizarukkah an nit. Iskara namah khan mi sîngringakah sângilikah rizalikah an nit. Zebuluna namah khan mi sîngringakah sângsarikah rizalikah an nit. Efraima namah khan mi sîngilikah rizarngakah an nit. Manasea namah khan mi sîngithumkah sânginikah rizanikah an nit. Benjamina namah khan mi sîngithumkah sângringakah rizalikah an nit. Dana namah khan mi sîngirukkah sânginikah rizasarikah an nit. Asera namah khan mi sîngilikah sânglei rizarngakah an nit. Naftalia namah khan mi sîngring(...)

⁴⁷Levia chihei kha chu nam danghei angkan a panam nama ritepnaah khan itep ni mak e.

⁴⁸PUMAPA khan Mosia ziangah,

⁴⁹“Ipa râl ikâpa fe thei ni tepnaah khan Levia chihei chu ni tep sa rang ni mak e.

⁵⁰Anni chu Ritongna Puan-In enkoltu neh a mangrua murdi neh khantaka thil iom murdi enkoltun ni phun rang a nit. Anni khan Puan-In neh a mangrua murdi khah rizôn ngai an ta, an enkol ngai rang a nit. Ritongna Puan-In kôlah khan an om mai ngai rang a nit.

⁵¹Riabuk nin rithon ikipah Ritongna Puan-In chu Levia chihei khan ṭhet an ta; riabuk ithar nin khuar nôkna mun takah khan Levia chihei ngirin an inding nôk ngai rang a nit. Mi dang hong inrol itum murdi chu ithat rang a nit.

⁵²Israel mihei khan mahni panam puanzâr zârna chitah khan ommun an siam rang a nit. A pôl pôlin an tam dân dung izuiin an puan inhei an dâng rang a nit.

⁵³Khannisela, Levia chihei khan chu Ritongna Puan-In kôl vêlah Puan in an siam rang a nit. Ritongna Puan-In khah rung an ta; khanonchu, mîn hong nâi an ta, Israelhei chungah ningthikna zuang tlung duai a ti,” a ti a.

⁵⁴Khanchu, Mosia zianga PUMAPA thupêk lam angkah takah khan Israel naihei khan an tho tâk a.