Read Biete RITEPNA 10 Bible Online

RITEPNA 10 - Biete bible

RITEPNA 10

¹PUMAPA khan Mosia ziangah,

²“Tangkarua bekul inikah ichera cherin siam roh; mipui koibûmna rang neh rithon zoroa kal ithokna ranga mang rang a nit.

³Ân ruala isôt nguaikah, a ruaika itum a nitin chu Israelhei khah Ritongna Puan-In kotbâi kôlah, ni ziangah an hong ribûm riai rang a nit.

⁴Khanniseh, khatkah bang itum a nitin chu panam lupuihei bang ni ziangah an hong ribûm rang a nit.

⁵Rimot lat latka an tumin chu sua tiang panga riabuk ineihei khah an rithok suak rang a nit.

⁶Avoi nikna rimot lat latka an tum nôkin chu sim tiang panga riabuk ineihei khah an rithok suak rang a nit. Khangkah khan rimot lat lat kan an tumin chu rithok suak rang tâk tina a nit.

⁷Isôt nguai nguaika an tumin chu mipuihei ribûm rang tina a nit.

⁸Arona richi thiampuhei khan hi bekul hih an tum ngai rang a nit. “Amahih kumkhuaka tho dân balama nin nei rang a nit.

⁹Nin ramah ridoina a om a, nin irâl nangni hong irûntuhei lei idoi ranga nin rifo tikin, bekul khah tum unla, keimah PUMAPA nin Pathian hin lei riang ki ta, nin irâlhei ata nangni inzôk ki ti.

¹⁰Khabanah khan nin lômna nikhuahei, nin thla thar kûthei neh nikhua ser dang danghei nin mang zoroa hâlrivâm thillan hei, ringeina thillan hei nin lanin nin tum rang a nit. Khanchu, amakhah lei riang ki ta, nangni ṭangpui ki ti. Keimah hi PUMAPA nin Pathian ki nit hih,” a ti a.

¹¹Aigupta ram an mâka rithoka a kum inikna, a thla nikna, a sûn sôminikna nî-ah khan Ritongna Puan-In chunga sûm arlâng risâng tâk a.

¹²Khanchu, Israela richihei chu an fe rizôp ngai dân angkah khan Sinai ramchâr ata khah an suak a; Paran ramchâr an tlungin chu sûm khah â ding tâk a.

¹³Mosia manga PUMAPA thupêk angkan a pôl rizôpin an suak a.

¹⁴Juda pôla tephei khah an panam ritlek ichôiin an suak masa tak a; Juda richihei khah Aminadaba naipa Nasona khan â rui a.

¹⁵Isakara richihei khah Zuara naipa Nathanela khan â rui a.

¹⁶Zebuluna richihei khah Helona naipa Eliaba khan a îrui a nit.

¹⁷Khanungchu, Puan-In khah an ṭhet a, Gersona ruihei neh Meraria ruihei khan an rizôna, lôm masahei inung khah an zui a.

¹⁸Kha rizoiin chu Reubena pôla tephei khah an panam ritlek ichôiin an suak a; Reubena richihei khah Sedeura naipa Elizura khan â rui a.

¹⁹Simeona richihei khah Zurisadaia naipa Selumiela khan â rui a.

²⁰Gada richihei khah Deuela naipa Eliasafa khan a îrui a nit.

²¹Khanungchu, Kohatha panamhei khan Puan-In sunga thil rithiang khah rizônin an suak a. Riabuk an khuarna rang mun khah an va tlung tenan chu Puan-In khah an lei inding nôk diam tâk a.

²²Kha rizoiin chu Efraima pôla tephei khah an panam ritlek ichôiin an suak a; Efraima richihei khah Amihuda naipa Elisama khan â rui a.

²³Manasea richihei khah Pedazura naipa Gamaliela khan â rui a.

²⁴Benjamina richihei khah Gideonia naipa Abidana khan a îrui a nit.

²⁵A nungkhôn takah, Dana pôla tephei khah an panam ritlek ichôiin an suak a, anni hih nungtianga irâl hong irung pôl an nit; Dana richihei khah Amisadaia naipa Ahiezera khan â rui a.

²⁶Asera richihei khah Okrana naipa Pagiela khan â rui a.

²⁷Naftalia richihei khah Enana naipa Ahira khan a îrui a nit.

²⁸Khangkah khan a nit, Israela richihei chu riabuk an rithon ikipa an panam ritlek ichôia an fe rizôp ngai dân chu a nit.

²⁹Mosia tarpu, Midian mi, Reuela naipa Hobaba ziangah, Mosia khan, “PUMAPA khan ram ne pe ân kung a, kha ram khah kin itlung rang mâng mâng tâk a nit. PUMAPA khan Israela richihei chu vângsak inṭum takka siam a înkung a nit. Khasikin, nang khom kin ziangah hong san la, nang khom keimani zârin inṭum takkan nî om sa thei rang a nit,” a ti a.

³⁰Hobaba khan, “Nangni zui no ning e, kin ram tiang kîr nôk ki ti,” a ti a.

³¹Mosia khan, “Ringai ihoi takkan ne mah tlak no roh. Ramchârah khan riabuk khuarna rang ni riat riai a, kin ta rangin lam ti-ar ni nit rang a nit.

³²Kin ziangah ni hong sa ngânin chu PUMAPA ṭhatvurna kin idong murdi nang itlângpui kin ti,” a ti a.

³³Sinai tlâng, PUMAPA tlâng rithianga rithokin mipuihei khah sûn thumka sung an lôn a, PUMAPA Thuthlung Bôm khah an matonah, an riabuk rang mun izongin a fe mai a.

³⁴An riabuk ata an suakah khan PUMAPA sûm khah sûn thluanin an chungah a om mai a.

³⁵Thuthlung Bôm khah arthon rang ikipah Mosia khan, “O PUMAPA, zuang rithok inla; ne râlhei chu chekindar inla, nang ineltuhei chu ni maah lâizâm tho riseh,” a ti ngai a.

³⁶Thuthlung bôm khah an ringat ikipah, “O PUMAPA, Israel mipui sâng itam takkahei ziangah hin zuang kîr nôk roh,” ai ti ngai a nit.