Read Biete RITEPNA 11 Bible Online

RITEPNA 11 - Biete bible

RITEPNA 11

¹Mipuihei khah an sôlin an ilung a zîng a, PUMAPA chungah an riphun tâk a. PUMAPA khan a lei riatin a ning a thik ok a. Khanchu, PUMAPA mei khah mipui lâiah khan a zuang chok a, an riabuk môr thlang ita tak rânkah chu a kâng isiat vang a.

²Mipuihei khan Mosia an isam a; ani khan PUMAPA ziangah a ṭongṭai a, mei khah a ram tâk a.

³PUMAPA mei an lâiah a zuang kâng sikah khan kha mun rimingah khan Tabera[4] an ibe a nit.

⁴Israelhei lâiah nam dang ṭhenkah â fe sa an om a, khahei khah an inrôp tak tak tâk a, Israela mihei khom khan “Sa fa rang ilua nei ei lan chu na!

⁵Aigupta ram lakah khan ei nuam dôr dôrkah inga ei fâk a, a man lak chu a tlôm a; fangma hei, mônfôl hei, purûnbâl hei, purûnsen hei, purûnngoi hei tak kha chu na!

⁶Khan laka atûn chu ei rithling khom a châr zoi tâk a; Manna ringot ti no hi chu thil dang îte rêng rêng sabei rang lak om khâi mak a,” an ti a.

⁷Manna chu chimuru rimite angkah a nit a, tuikeplung angkana a ngoi eng hi a nit.

⁸Riabukah khan zânah rido ṭul rualin Manna chu a zuang itlâk sa ngai a nit. Mihei khan an rût a, bu nôina lungheiah an nôi indi a, sumheiah an suk indi a, a kârah an but a, a kârah ibaiin an siama, an zêi a; a tui dân chu oliv riaka suang ibai angkah a nit.

¹⁰Mipuihei chu a insungkua kuan an riphun a, an puan in kotbâi bulah an riphun suai suai iti Mosian a lei riat a. PUMAPA chu an chungah a ning a thik tak tak iti a riatin Mosia chu â lung a dong tâk a;

¹¹Khanchu, PUMAPA ziangah, “Ithôm ni suak hih lungdong ni ne sak bâk a? Îtho sik im ni mit ki tlung no? Ithôm hi zâka mipui puak hih ki chungah ni irngat?

¹²Hi mipui murdi hih ki thisena inzir im an init? An pi neh pu hei zianga ṭongrikhâma ipe ni înkung rama ṭhui lût rangin, naite rinu nêk lâi â dontu angkana anni hih ipua thlun rangin ni ne iti hi?

¹³Hi mipui murdi dum rang hih taktianga ta ngân im sa ki pêk rang? ‘Sa kin rizuk, sa ne peh roh,’ itin iṭap pumin an ne hong ngên ngit ngit a.

¹⁴Hi mipui murdi hih keima khât ringotin chu kî tuang zoi ino a nit, ki ta rangin ai rik rai a nit.

¹⁵Hingka hin ni ne tho rangin chu lung nen kham inla ne that roh; khanchu, hingka dôrka deng intheina hih tuang khâi no ning,” a ti a.

¹⁶PUMAPA khan Mosia ziangah, “Mipuihei lâia ruaitu maritiom mi sômsarikah bûm inla, Ritongna Puan-In tualah ki ziangah hong ṭhui inla, ni kôlah inding roh.

¹⁷Zuang ṭum ki ta, nang zuang isôn ki ti. Ni zianga rithla nang kî pêk ṭhenkah kha sem sâng ki ta; khanungchu, mipui chunga mophurna khah nangmah bangin pêl khâi loiin nang pêlpui sa tâng an ti.

¹⁸Nangman mipuihei ziangah, ‘Naktûka ranga hin rithâr riai rei; khanchu, sa fa ngêt nin ti. Sa fa rang ilua nei ei lan chu na, Aigupta ramah a tam ngai tlia kaneh na, itia nin sa rizuk ṭap irî khah PUMAPA kuar ai tlung tâk a nit; PUMAPA khan sa nangni pêng a ta, fah ngêt ngêt nin ti.

¹⁹Sûnka manih, sûn nika manih, sûn sômka manih, sûn sôminikah bang khom ni loiin,

²⁰a thla pumlûm nin ning imâk rakkan fâng nin ta, chim rak nin ti. Ithôm Aigupta ram ata ei isuak hi, itia nin lâia om PUMAPA khah inôl a, a makungah nin riphun sikin a nit,’ ti roh,” a ti a.

²¹Mosian khan PUMAPA ziangah, “Ki mi ṭhuihei hih, mahni kea lôn thei ringot khom mi nuai irukkah an nit a; ‘thlakah pumlûm an fâk rang sa pêng ki ti,’ ni ti a.

²²Bera lôm neh sial lôm khom ithat pêk ni sela, khop an tîm a? Tuikhangliana inga murdi khom iman pêk riai ni sela, khop an tîm a?” a ti a.

²³PUMAPA khan Mosia ziangah, “PUMAPA hin tho thei ino ai nei mani? Ki ṭong ti lam angkan a tlung neh a tlung no reh zel ni ti,” a ti a.

²⁴Khanchu, Mosia khah a suak a, PUMAPA thu khah mipuihei â ril a. Mipui ruaitu sômsarikahei khah a koi bûm a, Puan-In ivêlah khan ân ngîr a.

²⁵Khanungchu, PUMAPA khah sûmah khan a zuang ṭum a, ani chu a zuang isôn a. Mosia zianga rithla ai pêk ṭhenkah khah a lak a, ruaitu sômsarikahei chungah khan a sia a. Rithla khah an chungah a zuang om kaneh chu zânthla angkan thu an ril a; khan isôtkah chu ril mak e.

²⁶Ruaitu sômsarikahei lâia mi inikah Eldada neh Medada khah Puan-Inah fe loiin riabuka an lei om a. Riabukah khan rithla khah an chungah a zuang ṭum a, anni khom zânthla angkan thu an ril sa ngir a.

²⁷Khanchu, tlangvâl khatkah a va tlân a, Mosia a va ril a, “Eldada neh Medadan riabukah thu an ril buan buan mai,” a ti a.

²⁸Khanungchu, Nuna naipa Josua, a thuarbapa rithoka Mosia ṭangpuitu khah a ṭong suak a, Mosia ziangah, “Epu, anni chu khap roh,” a ti a.

²⁹Mosia khan a sâm a, “Ṭhatnem ni ner ngaipui bâk reng na? PUMAPA khan a mihei chungah arthla khah indong chit sela, zânthla angkan thu ril riai sela ki ti tlia kaneh na,” a ti a.

³⁰Khanungchu, Mosia neh ruaitu sômsarikahei khah riabukah an kîr nôk tâk a.

³¹PUMAPA khan thlipui ân râng a, tuikhangliana rithokin vamîm a hong insêm a, kong ten vêla risânga vuangin riabuk neh a kôl kiang sûnkah lam sungah khan an fûk a, an tam dân chu kong ten idêna risângin an irchuan a nit.

³²Khanchu, mipuihei khan, kha nî sûn neh zân thluanin neh, atûk sûntluanin vamîm khah an man a, â man inroi tak khomin her sângka nêka roi ino an iman a nit. An riabuk vêlah khan inî-ah an phoi inchâr tâk a.

³³Kha vamîm sa an fâk lâi, an la fâk zoi maah khan PUMAPA ningthik khah mipuihei chungah a ṭuang a, ripui natinsat tak ân lêng tâk a.

³⁴Mi inrôp tak takhei khan kha munah khan an riphun sikin kha mun rimingah khan Kibrot-hatava[5] an be tâk a;

³⁵Kibrot-Hatavaa rithokah khan mipuihei khah Hazerotah an rithon a, amakhan riabuk an siam a, an châm tâk a.