Read Biete RITEPNA 12 Bible Online

RITEPNA 12 - Biete bible

RITEPNA 12

¹Mosia khan Kus nupang nupuiin a nei a, kha a nupui sikah khan Miriami neh Arona khan Hazerota an om lâiah khan Mosia khah an isîr insiat a.

²Anni khan, “PUMAPA hin Mosia ziang bangah hin im thu a îsîr bîk? Keini ziang khomah hin a îsîr sa nôm ai nit?” an ti a. An ṭong khah PUMAPA khan a lei riat a.

³Mosia chu rinêng chunga mi murdi lâia lungrivuai tak a nit.

⁴Voika zelin, PUMAPA khan Mosia hei, Arona hei, Miriami hei khah a koi a, “Nin inthumka khan Ritongna Puan-Inah hong rei,” a ti a. Khanchu, an inthumkan an fe tâk a.

⁵PUMAPA chu sûmpualah khan a zuang ṭum a, Puan-In kotbâiah khan a zuang iding a. Arona neh Miriami khah a koi a, an ruaikan matiang an hong a.

⁶PUMAPA khan an ziangah, “Ki thu hih ringai rei, nin lâia zânthlahei khan chu inlârnan manih, an rimang tiang manih bang an ziangah, keimah PUMAPA hin thu ke sîr ngai a.

⁷Khanniseh, ki suak Mosia ziangah chu khangkah khan tho ngai mang, ki mi Israelhei khah a kutah ki sia a,

⁸mâiritongin ki îsôn ngai a nit, ifel takkan thu ke sîr a, ṭongrikhek neh ṭong omzia rithup ineiin isôn ngai mang, ki tuaizâi khom ai mu a nit. Ingka sik ngâna ki suak Mosia hih nin îsîr insiat ngam im ai nit?” a ti a.

⁹PUMAPA ningthik chu an chungah khan a ṭuang a; a fe nôk tâk a.

¹⁰Puan-In chunga sûm khah arkiangin chu voikazelin Miriami vun khah ivur angkana vârin iphâr natnan a tuam vang tâk a. Arona khan Miriami khah a hang enin chu phâr natnan a tuam tâk iti a mu a.

¹¹Khanchu, Arona khan Mosia ziangah, “O, Epu, kin invêt neh kin sual sika hi dengtheina hih kin chungah nen tuang tlak no roh.

¹²Mi, a nu sûl ata a zuang suak phuta rithoka â thi sai, a taksa zor zoi thiai mai angkan chu Miriami hih in-om no roh,” a ti a.

¹³Khanchu, Mosia khan PUMAPA chu â sam a, “O Pathian, indam nôk roh,” a ti a.

¹⁴PUMAPA khan Mosia ziangah, “Mi a pân a mâiah ichil sela, izakin sûn sarikah chu a irbîk rang ni mak ima? Khasikin sûn sarika sung chu riabuk putiang sian la, kha rizoiin ṭhui lût nôk la ni riseh,” a ti a.

¹⁵Khangkan Miriami chu riabuk putiang sûn sarikah isia a nit a; an hong ṭhui inlût nôk mâkah chu mipuihei khah riabuk rithon mak a.

¹⁶Khanungchu, mipuihei khah Hazerot ata an suak a, Paran ramchârah riabuk an khuar a.