Read Biete RITEPNA 13 Bible Online

RITEPNA 13 - Biete bible

RITEPNA 13

¹PUMAPA khan Mosia ziangah,

²“Israela richi nam sômleiinikahei lâi ata a nam ikipah an ruaituhei lâia mi khatkah chit rithlang inla, Israela richihei kî pêk, Kanan ram kha va enthlâttu rangin anni chu tir roh,” a ti a.

³Mosia khan Paran ramchâra rithokah khan PUMAPA thupêk angkan Israela richihei lâia lupui korong a tir suak tâk a.

⁴Hihei hih an riming chu a nit; Reubena nama rithokin Zakura naipa Samua;

⁵Simeona nama rithokin Horia naipa Safata;

⁶Juda nama rithokin Jefunea naipa Kaleba;

⁷Isakara nama rithokin Josefa naipa Igala;

⁸Efraima nama rithokin Nuna naipa Hosea;

⁹Benjamina nama rithokin Rafua naipa Paltia;

¹⁰Zebuluna nama rithokin Sodia naipa Gadiela;

¹¹Josefa nai Manasea nama rithokin Sosia naipa Gadia;

¹²Dana nama rithokin Gemalia naipa Amiela;

¹³Asera nama rithokin Mikaela naipa Sethura;

¹⁴Naftalia nama rithokin Vopsia naipa Nabia;

¹⁵Gada nama rithokin Makia naipa Geuela.

¹⁶Hi mihei hih ram enthlâttu ranga Mosian ai tirhei riming chu a nit. Mosia khan Nuna naipa Hosea riming khah Josua tin ai thleng pêk a nit.

¹⁷Mosia khan Kanan ram enthlâttu ranga anni hih a tir suak lâiah khan, an ziangah, “Kanan ram sim tiang fe unla; khanungchu, tlângram tiang fe nôk rei.

¹⁸Ingkana ram im ai nit iti en unla, mi an tam neh an roi hei, an rât neh an rât no hei,

¹⁹an ram khah a ṭhat neh ṭhat no hei, an omna khuahei, kulpui inei khopuihei âm an iom khote paipai âm an iom iti hei,

²⁰ram chu rinêng tak im ai nit rinêngsen im iti hei, rampui im ai nit phûlpôn im iti hei va en infel rei. Kha rama thei irâhei khom khah hong chôi ngêt rei,” a ti a. Grep irâ min lâi tak a nit.

²¹Khangkan an rithok suak a, ram kha sim tiang panga Zin ramchâra rithokin mâr tiang panga Hamath lûtna kôl Rehob idênin an rifang a.

²²Sim tiang an rifang suak masa a, Hebronah an fe a. Kha munah khan Anaka richi Ahiman nam hei, Sesai nam hei, Talmai nam hei, kha an om a. Hebron khua hi Aigupta rama khopui khatkah Zoan khua iding ma kum sarika matona ding tâk a nit.

²³Eskol[6] phâi an va tlung a; kha munah khan grep irâ khûkah; â ṭang pumin an sât a, a rik sikin pasal inikan rizônin an hong rizôn a; khabanah, theisen hei, theipui hei khom an hong chôi sa a.

²⁴Kha mun khah an grep irâ khû inriputin Eskol phâi an ibe a nit.

²⁵Sûn sômilika sung ram va enthlâtin an va thang zoiin chu an hong kîr nôk a.

²⁶Mosia hei, Arona hei neh Israel mipui omna Paran ramchâra Kades khah an hong tlung a, an thil va mu dân thu an isîr a, kha rama thei an hong ichôi khom khah an inmu a.

²⁷Anni khan Mosia ziangah, “Ni ne tirna ramah khan kin va fe a, ram richong tak, dût neh khuaitui luangna ram a nit; hihei hih a rama thei chu a nit.

²⁸Khannisela, a rama mi omhei chu mi rât tak tak an nit a, an khuahei khom kulpui inei, roinpui tak tak a nit. Khabanah, Anaka richi milianhei khom kin imu a nit.

²⁹Amelek mihei chu sim tiang ramah khan an om a, Hit mihei, Jebus mihei, Amor mihei chu tlângramah an om a; Kanan mihei chu tuikhanglian rikam neh Jordan vadung pangah an iom a nit,” itin an iril a.

³⁰Kaleba khan Mosia nuara mipui ribûm vunghei khah ân dâirek a, ani khan, “Atûn hang doi zel ei ta, ram chu lâng ei ti u, inê ngêt ngêt ei ti,” a ti a.

³¹Nikhomsela, a fepuihei khan chu, “Hang inê thei viat no min e, eimani nêkan an irât ual a nit,” an ti a.

³²Khanchu, Israel mihei lâiah khan a ṭhat no tiang korong an ram hang en chungchâng khah an thang inthei tâk a. Anni khan, “Kin ram hang en khah bu kum suak invâng theina ram khom ni mak; a mi om kin imuhei lak chu mi lian tak tak an nit.

³³Khantakah khan Anaka richi mi lian, sâiinngîr tiak tiakahei khom kin mu a. Keini chu khâiphâr angkah paiin kin rimu a, anni khomin khâiphâr angkah paiten kêng an ne imu nîng a ti,” an ti a.