Read Biete RITEPNA 14 Bible Online

RITEPNA 14 - Biete bible

RITEPNA 14

¹Mipuihei murdi khah lunginzîngin zântluanin an ṭap an ṭap a.

²Mosia neh Arona khah an dem a, an ziangah, “Aigupta ramah khan kin lei ithi tâk ni sela â ṭha rang nôm na! A nit nole ramchârah hin ilua kin ithi ni sela â ṭha rang nôm na!

³Îtho rang im khandaia thi rang ringota Pathianin hi ramah hin a ne hong iṭhui hi o? Kin nupui nainetehei lak ringmana mi man rang ringot nîng an ta. Aigupta rama kîr nôk hih kin ta rangin ai ṭhat ual ino rang mani o?” an ti a.

⁴Khanchu, an risôn risak a, “Ei ruaitu rang rithlang ei ta, Aigupta ramah kîr nôk ei ti u,” an ti a.

⁵Khanungchu, Mosia neh Arona khah Israela richi mipui ribûmhei murdi maah khan rinêngah an ibok a.

⁶Ram enthlâttuhei lâia mi Nuna naipa Josua neh Jefunea naipa Kaleba khom khah an ringai a siat a, an puanhei an ipotthlêr a;

⁷Mipui ribûmhei ziangah khan, “Kin ram va en chu ram iṭha tak kêng ai nit.

⁸Ei chungah PUMAPA a lômin chu kha ramah khan ne ṭhui a ta, dût neh khuaitui luangna ram khah ne peh ngêt a ti.

⁹PUMAPA chungah rihel no unla; kha rama mihei khah ṭi tlak no rei. PUMAPA chu ei zianga a om a, an rinpui an pathian khah â ne zoi tâk; anni chu ṭi tlak no rei,” an ti a.

¹⁰Khanniseh, mipui ribûmhei khan anni chu lunga dêng that an tum a, kha lâi takah khan Israel mi murdi mu rangin PUMAPA roinpuina chu Ritongna Puan-In chungah a zuang vâr pum tâk a.

¹¹PUMAPA khan Mosia ziangah, “Hi mipuihei hin itena sôt im an ne irngainêp rang? An lâiah sinrikhêl itam takkah ki tho nung khomin itena sôt im ne iam nuam loiin an lai om rang?

¹²Ripui inlêng ki ta, inrimang vang ki ti. Nangmaah hin anmani nêka roinpui neh thil itho thei ual nam inding ki ti,” a ti a.

¹³Khannisela, Mosia khan PUMAPA ziangah, “Hi mipuihei hih Aigupta ram ata ni kut ritha rât taka ni hong iṭhui suak an nit a. Aigupta mihein ni mihei chunga ni thil tho hih an riat duai tenan chu,

¹⁴hi rama om mihei hih hingka hin an îril ngêt rang a nit. Hi mihei lak hin nangmah, PUMAPA chu kin ziangah ni om mai a, ni sûm khan Puan-In chung a zuang rikhû kipah nang khom nang an mu ngai a, sûnah sûmin zânah meichokin an ma ne ruai ngai iti khah ifel takkan an lei riat tâk a.

¹⁵Atûnah hin ni mihei hih ni that inrimang vangin chu ner ming inthang iretuhei khan,

¹⁶‘PUMAPA khan hi mipuihei hih ṭongrikhâma ipe a înkung ramah khan a ṭhui inlût theino sikin ramchârah ai that inrimang tâk a nit,’ itin isîr duai an ti.

¹⁷Khasikin, atûnah hin, O PUMAPA nang kî ngên a nit, ‘Keimah, PUMAPA hih lungrivuai tak, lungkhamlianna sip, an sualna neh an siatna ngaidam ngaitu ki nit; khannisela, thil thônsual tênhei isua pai ngai ino, an pahei sualna sika an naihei, an tuhei, rikhûk ithum rikhûk ilika dên khoma kuttum itho ngai ki nit,’ itia ni lei iti tâk angkah khan ni sinthotheina inlang inla, ni ṭonginkung chu len ngêt roh.

¹⁹Khasikin, O PUMAPA, nang kî ngên a nit, ni lungkhamlianna natinsat tak sik neh hi mihei hih Aigupta rama rithok ata nî ngaidam ngai angkah khan atûn khom hi mipuihei siatna hih ingaidam nôk rangin nang kî ngên a nit,” a ti a.

²⁰PUMAPA khan, “Ni ngên lam angkan ngaidam ki ti.

²¹Khannisela, ki ringna neh ki roinpuinan leilung pumpui ai sip angkan ṭong ki înkung a nit,

²²Aigupta ram neh ramchâra ki roinpuina neh ki sinrikhêl thohei imu a, khangkah ten khoma ne la fia mai mai a, ki thu la pom inotuhei murdihei neh

²³ner ngainêptuhei rêng rêng hin an chibulhei zianga ṭongrikhâmna ipe ki înkung ram khah lût tlak no nih.

²⁴Khannisela, ki suak Kaleba hin chu, ringai dan dang a nei a, a lungril takin a ne zui sikin ani hi chu a va irfang ramah khan ṭhui inlût ki ta, archihei khan kha ram khah luang an ti.

²⁵Kha ram phâiah khan Amalek mihei neh Kanan mihei an om a: naktûk zîngah chu kîr nôk unla, Tuipui Sen ipanin ramchârah fe rei,” a ti a.

²⁶PUMAPA khan Mosia neh Arona ziangah,

²⁷“Hi mi pualoihei hih itena sôt im ki chungah an irphun rang? An riphunnahei hih kî riat rôn tâk a nit.

²⁸Atûn chu hi sâmna hih an ziangah peh rei, ‘Ki ringna chingin kî ti a nit, ke kuar riata nin iti angkah takin nin chungah thông ki ti.

²⁹Nin ruakhei chu hi ramchârah hin rithekin om a ti. Ki chungah nin riphun sikin nin lâia mi kum sôminika ten chungtianga mi rêng rêngin kha ram khah lût no tin u.

³⁰Ṭongrikhâma nangni peh rang kî ti ramah khan Jefunea naipa Kaleba neh Nuna naipa Josua ti no chu tute lût tlak no tin u.

³¹Khannisela, nin nainetehei min man an ta nin itihei hi chu ṭhui inlût ki ta, nin îdit ino ram khah inluang ki ti.

³²Nangni chu nin ruak ramchârah hin rithek chût a ti.

³³Nin naihei chu ramchârah kum sômilikah rivâk rivâk an ta, ramchârah nin ruak â tâl zoi phar mâkah chu nin iamom nona khah tuang an ti.

³⁴Ram va enthlât rangin sûn sômilikah an va thang a, sûnka sik kumkah, a rêngkan kum sômilikah îvâi nin ta, kum sômilika sung nin siatna khah nin ituang rang a nit. Khanchu, nin chunga ke lung hoinona hin im ai nit ngai reh tâng nin ti.

³⁵Nangmani mi pualoi ne doia ribûmhei chungah hihei hih kî tho ngêt rang a nit iti ṭong ki irkhâm a nit. Hi ramchârah hin thi riai nin ti, Keimah, PUMAPA hin kî ti a nit,’ ti rei,” a ti a.

³⁶Ram va enthlât ranga Mosia itir an hong kîr nôk tena ram thurchi a ṭhat no lama sîr a, PUMAPA chunga mipuihei inriphuntuhei khah chu PUMAPA khan an chungah ripui a tir a, an thi tâk a.

³⁸Ram va enthlât ranga fe mi sômleiinikahei lâiah khan Nuna naipa Josua neh Jefunea naipa Kaleba bang kha â dam isun chu an nit tâk a.

³⁹Mosia khan kha thuhei murdi khah Israela richihei â rilin chu iṭha takkan an ringai a siat tâk a.

⁴⁰Atûk zîngah chu an thoi a, itlângram irûn rangin an hong rithoka, “Hiten hih kin hong tâk a, atûn chu PUMAPA ne înkung pêk rama fe rangin kin hong irfo diam tâk a nit, kin lei îsual tâk a nit iti chu kin îpom a nit,” an ti a.

⁴¹Khannisela, Mosia khan, “Thluantlung no tin u iti ireh chakkan îtho rang im PUMAPA thupêk nin zôm no?

⁴²Nin ziangah PUMAPA om khâi mak, nin irâlhei nangni lei that rang ringotin fe no rei.

⁴³Amalek mihei neh Kanan mihei nin hang doi tikin, an khandaia thatin om nin ti; PUMAPA chu nung nin song tâk sikin nin ziangah PUMAPA chu om khâi no nih,” a ti a.

⁴⁴Khannisela, tlângram kha hang idoi ngêt rangin an fe tên tên a. Nikhomsela, PUMAPA Thuthlung bôm neh Mosia chu riabuk ata suak mak a.

⁴⁵Khanungchu, kha tlângrama om Amalek mihei neh Kanan mihei khan an lei doi a, an lei inê tâk a, Horma dênin an zuang ûm rizûl tâk a.