Read Biete RITEPNA 15 Bible Online

RITEPNA 15 - Biete bible

RITEPNA 15

¹PUMAPA khan Mosia ziangah,

²“Israela richihei khah iril roh: Nin omna rang nangni kî pêk ram khah nin tlung tikin chu,

³serâtchal hei, berachal hei, kêlchal hei, PUMAPA ziangah hâlrivâm thillan rangin hei, ṭonginkung len ribôlna thillan rangin hei, ngaihoi thillan rangin hei, hunbi neia nin ruaiṭhe thillan rangin hei, nin mang rang a nit; hi thillan ihâl inam hin PUMAPA chu a înlôm ngai a nit.

⁴PUMAPA ziangah hâlrivâm thillan rangin bera manih, kêl manih nin hong lanin chu a ran lu kipah bubâl thillan rang baidi ṭha chi herkah neh oliv riak litarka banah iin rua uain litarkah nin hong lan rang a nit.

⁶Khante, berachal nin lan rangin chu bubâl thillan rang baidi ṭha chi her inikah neh oliv riak litarkah neh arzâtka banah

⁷iin rua uain litarkah neh arzâtkah nin hong lan rang a nit.Hi meia thillanhei inam hin PUMAPA chu a înlôm ngai a nit.

⁸Hâlrivâm thillanin manih, ṭonginkung len ribôlna thillanin manih, ringeina thillanin manih serâtchal PUMAPA ziangah nin hong lanin chu,

⁹serâtchal lan rualah khan bubâl thillan rangin baidi ṭha chi her ithumkah, riak litar inikah neh

¹⁰iin rua uain litar inikah ilan sa rang a nit. Hi meia thillan inam hin PUMAPA chu a înlôm ngai a nit.

¹¹“Serâtchal hei, berachal hei, berapui hei, kêl hei nin hong lan rualin a lukipa nin hong lan sa rang zâk chu khangkah khan a nit.

¹²Nin mîring lan a tam dân izirin hi thil danghei khom hih nin hong lan intam rang a nit.

¹³Israel mi rêng rêngin chu farua thillan PUMAPA inlôm ngai ihâl rang an hong lan tikah khan kha angkah khan an tho rang a nit.

¹⁴Nam dang, nin lâia inzir manih, â om tot manih farua thillan PUMAPA inlôm ngai an lanin chu khangkah ngirah khan an tho rang a nit.

¹⁵Nin richi suanpâr idênin nangmani neh nam dang nin zianga omhei rang khom dân khatkah ringot a om rang a nit, PUMAPA maah nam danghei chu nangmani angkah chia nîng an ti.

¹⁶Nin ta rang neh nin zianga nam dang iomhei ta rangin dân munkah neh tho dân munkah bang om a ti,” a ti a.

¹⁷PUMAPA khan Mosia â sôn a, a ziangah,

¹⁸“Israela richihei iril roh; nangni ki pêk rang ram nin va tlung tikin,

¹⁹nin bu invâng masa nin nêk tenan chu PUMAPA ziangah ngaihoi thillanin a ṭhen nin khâi rang a nit.

²⁰Nin barli thar ata nin ibai siam masa tak lûmkah PUMAPA ziangah ngaihoi thillanin nin lan rang a nit; rîzôla nin bu chîl masa PUMAPA zianga ngaihoi thillana nin ilan ngai angkah khan nin lan rang a nit.

²¹Nin richi suanpâr idênin nin ibai suang masa tak khah PUMAPA ziangah ngaihoi thillanin nin lan mai ngai rang a nit.

²²“Mosia zianga PUMAPA thupêk hih mi tu manin tho no duai sela manih,

²³nam pumpuiin Mosia zianga PUMAPA thupêk murdi hih an tho no duaiin manih,

²⁴an thil thônsual khah an riat no sika a nitin chu hâlrivâm thillan rangin serâtchal an lan rang a nit; balam angkan bubâl thillan neh iin rua thillan uain an hong chôi sa rang a nit; amakhah PUMAPA inlôm ngai a nit. Sual ribôlna thillan rangin kêlchal an lan sa rang a nit.

²⁵Thiampu khan Israel murdi rangin rithârna siam a ta, ngaidam ni tâng an ti; an thil thônsual chu an îchâi duai tak tak a nit sik neh an sual ribôlna thillan hei, farua thillan hei PUMAPA ziangah an lan tâk sikin ingaidam ni tâng an ti.

²⁶Israela nam pumpui chu, an lâia nam dang iom sahei neh ingaidam ni tâng an ti, an rêngkan thil an îchâi duai a nit.

²⁷“Mimal khomin reh loia thil a thônsual duaiin chu sual ribôlna thillan rangin kêlrila khatkah kumka mi a lan rang a nit.

²⁸Reh loia PUMAPA maa thonsualtu ta rangah khan thiampu khan sual ribôlna thillan khah lan pêk a ta; khanchu, ingaidam ni tâng a ti.

²⁹Reh loia thonsual duai thu-ah Israel richihei lâiah khan Israel mi neh nam dang thlei loiin an rêngkan hi dân hih an zôm rang a nit.

³⁰“Khannisela, ireh chakka tho ngân ngân chu Israel mi manih, nam dang manih khom ni sela, PUMAPA musit a nit a; kha mi kha chu nin that rang a nit.

³¹PUMAPA thu khah a nôl a, a thupêk chu â siat ngân ngân sikin kha mi khah that inrimang rang a nit a, a sual mo chu pêl a ti,” a ti a.

³²Voikah chu Israelhei ramchârah an om lâiah khan mi khatkah sabatnî-ah khan thing a lâk a.

³³A thing lâk imutuhei khan Mosia neh Arona neh mipuihei ziangah khan an ṭhui a.

³⁴Ingkana tho rang im ai nit iti an riat zel thei no sikin an khum khap a.

³⁵PUMAPA khan Mosia ziangah “Kha mi khah ithat rang a nit, mipui murdi khan riabuk putiang lunga dêng that rang a nit,” a ti a.

³⁶Khanchu, PUMAPA thupêk angkan mipui murdi khan riabuk putiang an ṭhui a, lungin an dêng that tâk a.

³⁷PUMAPA khan Mosia ziangah,

³⁸“Israela richihei ziangah, an richi suanpâr idênin an silbom puan môr tin an itol rang a nit, a tol tinah khan pat dumpôl rinîm a kop rang a nit.

³⁹Kha puan môra pat rinîm itol khan ki thupêk murdi nangni inreh suak mai a ta, nin izôm mai rang a nit; khanchu, ki ziang ata tlân rimang khâi loia, nin lungril nuam lam neh nin mit lâk lam rizûlin om khâi no tin u.

⁴⁰Puanmôr itol khan ki thupêk murdi izôm rang nin nit iti hei, ki ta ranga rivong rithiang rang nin nit iti hei nangni inreh suak ngai a ti.

⁴¹Nin Pathian inih ranga Aigupta ram ata nangni ṭhui suaktu PUMAPA nin Pathian ki nit. Keimah hi PUMAPA nin Pathian chu ki nit hi,” a ti a.