Read Biete RITEPNA 16 Bible Online

RITEPNA 16 - Biete bible

RITEPNA 16

¹Levia chi, Kohatha panama mi, Izara naipa Kora khan Mosia ruaitu nitna chungchâng isêlin arhel a. Ani khah Reubena nama mi Eliaba naipahei Dathana neh Abirama hei, Peleta naipa Ona hei khan an thlop a. Israel mi, ruaitua an irthlang, mi rizanika sômringakan an thlop sa a.

³Mosia neh Arona ziangah an rêngkan a lômin an hong ribûma, “Nin ripâk rei tâk, mi murdi PUMAPA ta ei nit riai a, PUMAPA khan a ne iompui chit a nit; khasikin, nangmah Mosia îtho sik im, PUMAPA mihei chungah inlal bîka ni irsia?” an ti a.

⁴Mosian a riatin chu rinêngah â bok a, a ṭongṭai a.

⁵Khanungchu, Kora neh a lômahei ziangah khan, “Naktûk zîngah PUMAPA khan tuhei im ama tahei a zuang ifia rang a nit; ama ta, a mi rithlanghei bang khah mâichâmah an hong ai phal rang a nit.

⁶Kora, ni lômahei neh hingka hin tho rei, naktûk zîngah nin meiluak chôi unla,

⁷mei ri-al seh unla, PUMAPA mâichâmah khan namhoi hâl rei. PUMAPA khan tûm a irthlang riang ei ti. Nangmani Levia richihei khah a nit arpâk chu nin init,” a ti a.

⁸Mosia khan Kora ziangah, “Nangmani Levia chihei, ringai rei,

⁹Israel mipuihei lâi ata ama kôla om a, PUMAPA Puan-Ina sin itho rang hei, mipuihei matona dinga â nang murdi mipui lei itho pêk rangheia nangni ai serinran hih thil ichînte paia nin ibe mani?

¹⁰Kha sintum roinpui tak khah nangmah neh ni suapui Levia chihei murdi ân dong a, khan thiampu nitna ten khom lâ chang riai nin itum a nit hiteh na?

¹¹Nangmah neh ni lômahei hin Arona chunga nin inuar hih PUMAPA chunga rihel kêng nin init,” a ti a.

¹²Khanungchu, Mosia khan Dothana neh Abirama a koi a; nikhomsela, anni khan, “Hong no ning ung e.

¹³Aigupta ram ihoi tak ata hingkana ramchâr muna thi rang ringota ni ne hong iṭhui suak hih thil ichînte pai im ai nit? Kin chungah inlal takkan ni la om nôk sa rêk.

¹⁴Dût neh khuaitui luangna ramah ne ṭhui mak che hi te; loi neh grep rikul khom ne peh viat mak che hi te. Nê lêm nî tum a nit. Hong viat no ning ung e,” an ti a.

¹⁵Mosia chu a ning a thik a, PUMAPA ziangah, “Hi mihei thillan hih iham no roh. An chungah îte thonsual nei mang a, an sakuartung tak khom khatka lua lah pêk mang e,” a ti a.

¹⁶Mosia khan Kora ziangah, “Naktûkah nangmah neh ni lôma mi rizanikah sômringakahei khah Ritongna Puan-Inah nin hong rang a nit; Arona khom lei om a ti.

¹⁷Mahni meiluak chit chôi unla, mei ri-al seh unla, namhoi ihâl rang kha phul unla, mâichâmah nin chôi rang a nit,” a ti a.

¹⁸Khanchu, mahni meiluakah khan mei ri-al an sia chit a, namhoi khah an phul a, Ritongna Puan-In lûtnaah khan Mosia neh Arona hei neh khan an va ding tâk a.

¹⁹Khanungchu, Kora khan mipui murdi a bûm a, mipuihei khah Mosia neh Arona hei masongin Ritongna Puan-In kotbâiah khan ân ngîr a. Voikah zelin PUMAPA roinpuina vâr khah mipuihei mitmuah a zuang ilang tâk a.

²⁰PUMAPA khan Mosia neh Arona ziangah,

²¹“Hi mipuihei lâi ata hih rikiang ta u, anni hih lei inrimang vang rong,” a ti a.

²²Nikhomsela, Mosia neh Arona chu lingisikin rinêngah an ibok a, “O Pathian, mi murdi ringna nâr ni nit a. Mi khatka sual sikin mipui murdi chungah ni ning ai thik rang mani?” an ti a.

²³PUMAPA khan Mosia ziangah,

²⁴“Mipuihei chu Kora, Dothana neh Abiram hei puan in ata rikiang riai rangin iril rei,” a ti a.

²⁵Khanungchu, Mosia khah a thoi a, Dathana neh Abirama hei ziangah khan a fe a; Israel ruaituhei khan an zui a.

²⁶Mosia khan mipuihei ziangah, “Hi mi sualhei puan in ata suak rikiang riai rei, an neinun îte tôn no rei; khanonchu, an sual sikin nangni khom nin rimang sa duai lôiin,” a ti a.

²⁷Khanchu, Kora, Dathana neh Abirama hei puan in ata an suak rikiang tâk a. Dathana neh Abirama khom an puan in ata an hong suak a; an puan in kotbâi bulah khan an nupuihei, an naihei neh khan an ngîr a.

²⁸Mosia khan mipuihei ziangah, “PUMAPA khan hi thilhei itho rangin a ne itir a nit iti riang nin ti, keima lungril suaka tho ni mang e.

²⁹Hi mihei hih thi dân balama an thi a, Pathian kut an chungah a ṭum non chu Pathianin a ne itir ai nit ino nîng a ti.

³⁰Khannisela, PUMAPA khan thil nin lai riat ngai ino a zuang tho a, rinêng a bâi a-âng a, an thil nei murdi neh an iring puma mithi khuaah an lûtin chu hi mihei hin PUMAPA khah an lei inôl a nit ngêt tina nîng a ti,” a ti a.

³¹Kha thu murdi Mosia khan a ti zoi kaneh chu, Dathana neh Abirama hei nuaia rinêng khah a hong kak a;

³²an insungkuahei neh Kora lômahei murdi khah an neinun murdi neh â lem riai tâk a.

³³Khanchu, an neinun murdi neh mithi khuaah an iring pumin an ife tâk a nit; rinêng ikak khah ar-îp nôk a, anni chu an irmang riai tâk a nit.

³⁴Khantaka om sa Israel mi murdihei khan an ikhêk irî khah an riatin chu lâizâm an tho a, “Itlân rei, rinêngin ne lem sa duai a ti,” an ti a.

³⁵Khanungchu, PUMAPA khan mei a zuang iṭhum a, namhoi ihâltu mi rizanikah sômringakahei khah a zuang kâng inrimang vang tâk a.

³⁶PUMAPA khan Mosia ziangah,

³⁷“Thiampu Arona naipa Eleazara iril roh; mei ikâng that tâkhei sumsen meiluak chôi khah rikhôm sela, a meiholhei khah dâi putiang paih riseh; sumsen meiluak murdi kha chu thâr inrithiang tâk a nit a.

³⁸PUMAPA mâichâma hong ilan an nitah khan thil rithiang an hong init tâk a nit. Khasikin, an sual sika ithata om tâk mihei meiluak kha lan la, suk inla, mâichâm rikhûnan siam roh. Amakhah Israel richihei ta ranga risinsiana nîng a ti,” a ti a.

³⁹Khanchu, thiampu Eleazara khan sumsen meiluak khah a lâk a, mâichâm rikhûna sîngin â cher tâk a.

⁴⁰Amakhah Arona richi nino mi dang rêng rêng khan mâichâmah PUMAPA maah tutên namhoi an hong hâl rang ni mak; khanonchu, Kora neh a lômahei angkan an ithi rang a nit iti Israelhein an riat theina ranga risinsiana rang a nit tâk a. PUMAPA khan Mosia manga Eleazara zianga thu a pêk lam angkah takin hihei hih itho a nit.

⁴¹Atûkah khan Israel mipui murdi khan Mosia neh Arona khah an dem a, “PUMAPA mihei chu nin ithat a nit,” an ti a.

⁴²Mipuihein Mosia neh Arona an bûm vung vung lâiah khan Ritongna Puan-In tiang an hang ngat a; Ritongna Puan-In khah sûmin a zuang rikhû a, PUMAPA roinpuina vâr a zuang ilang a.

⁴³Mosia neh Arona chu an fe a, Ritongna Puan-In kottualah khan an ngîr a.

⁴⁴PUMAPA khan Mosia ziangah,

⁴⁵“Hi mipuihei lâi ata hih rikiang rei, lei inrimang vang rong,” a ti a. Khante, an ruaikah khan lingisikin rinêngah an ibok a;

⁴⁶Mosia khan Arona ziangah, “Ni meiluak khah chôi inla, mâichâma mei so va rût inla, mipuihei lâiah, an sual ribôlna rangin namhoi va hâl vak vak roh. PUMAPA ningthikna chu a zuang itlung pial tâk a nit hih; rimot roh, ripui ai lêng riphut thiai tâk a nit,” a ti a.

⁴⁷Arona khan Mosia ti lam angkah khan meiluak khah a chôi a, mipui ribûmhei lâiah khan â tlân lût a, mipui lâiah khan ripui rivoi khom an lei om tâk a; namhoi a hâl a, mipui sualna khah a bôl tâk a.

⁴⁸Â thi neh a la ringhei kârah khan â ding a, ripui chu arkiang tâk a.

⁴⁹Kora rihel sika thihei tep loiin ripuia thi murdi chu an rêngkan mi sângsômlei sângilika rizasarikah an nit.

⁵⁰Ripui khah arkiang tenan chu Arona khah Ritongna Puan-In kotbâiah Mosia ziangah khan a kîr nôk tâk a.