Read Biete RITEPNA 18 Bible Online

RITEPNA 18 - Biete bible

RITEPNA 18

¹PUMAPA khan Arona ziangah, “Nangmah neh ni naipahei neh Levia chihei hin Ritongna Puan-Ina sin thônchâi mo chu pêl nin ta; khanniseh, thiampu sin bîka thônchâi mo chu nangmah neh ni naipahei bang hin pêl nin ti.

²Nin suapui, Levia chihei khah Puan-Inah nangmah neh ni naipahein sin nin thonaa nangni ṭangpui rangin hong ṭhui rei.

³Nangni thlop mai an ta, Puan-In enkolna sin murdi chu an tho rang a nit. Khanniseh, Mun Rithianga mangrua rithianghei neh mâichâm thiliser chu an tôn rang ni mak, an tôn duaiin chu nangni khom anni khom nin ithi rang a nit.

⁴Puan-Ina sin murdiah nangni thlop an ta, an sintum murdi chu anmani ngêiin an infel rang a nit; mi dang mi narân paiin nangni an san rang ni mak e.

⁵Nangmah neh ni naipahei bangin Mun Rithiang neh Mâichâm chu nin enkol rang a nit. Khanchu, Israela richihei chungah ki ningthikna ṭuang nôk khâi no nih.

⁶Nin suapui, Levia chihei hi Israelhei lâi ata ki irthlang suakin, nang isan ranga thilpêka nang ipetu chu keimah hi ki nit. Anni chu Ritongna Puan-Ina sin itho ranga ki ta ranga serinran an nit.

⁷Khanniseh, nangmah neh ni naipahei bang hin Mun Rithiang taka om neh Mâichâma thiampu sin hi chu nin tho rang a nit. Thiampu sin hi nin sintum ranga nangni kî pêk a nit a; khasikin, mi narânin a hong tho sa a nitin chu ithat rang a nit,” a ti a.

⁸PUMAPA khan Arona ziangah, “Israela richihein ribôlna meia hâlrivâm thillana an ilan ti no ngaihoi thillan ki zianga an hong ilan murdi chu ni dongtum rangin nang kî pêk a nit iti remai roh; khahei khah nangmah neh ni naipahein kumkhuaka nin dongtum ranga nangni kî pêk a nit.

⁹Bubâl thillan hei, Sual ribôlna thillan hei, Siat ribôlna thillan hei an hong ilan, mâichâma hâl bân murdi chu nangmah neh ni naipahei dongtum rang a nit.

¹⁰Mun rithiang ngêiah kha sahei khah nin fâk rang a nit, ipa bangin ifah rang a nit, thil iser a nit.

¹¹“Khabanah khan, Israela richihein ngaihoi thillanna an hong ilan rêng rêng khom nin ta a nit, nangmah neh ni naipahei neh ni nainuhei nin rêngka ziangah kumkhuaka nin dongtumin nangni kî pêk a nit. Nin insungkua lâia mi rithiang kan fah thei an ti.

¹²“Israela richihein kum tin vâng masa a ṭha tak, oliv riak hei, uain hei, bu hei, ki zianga an hong lan rang murdi chu nang kî pêk a nit.

¹³An rama thei irâ vâng masa ki zianga an hong ilan murdi khom nin dongtum rang a nit. Nin insungkuaa mi rithianghei kan fah thei an ti.

¹⁴“Israelhei thillan rêng rêng lanna bi irît thap nino murdi chu nin dongtum korong rang a nit.

¹⁵“Miriam khom, ran khom, suak masa tak, sûl iongtu, Israelhein PUMAPA an ipêk ngai chu nin ta rang a nit. Khannisela, nai lutîr neh ifa rithiang ino ran chu ritlan thei nîng a ti.

¹⁶Naite thlaka ten a nitin chu ritlanna man khah mun rithianga mang lâia varin tangkarua sekel ringaka rikin ritlan rang a nit.

¹⁷Khannisela, serâtte hei, berate hei, kêlte hei suak masa chu ritlan rang ni mak; serinran an nit. Ribôlna thillana mang rang a nit; a thisen chu mâichâma rithe rang a nit a, a thâi khom mâichâma hâl rang a nit, kha thillan inam khan PUMAPA chu a înlôm ngai a nit.

¹⁸Ngaihoi thillana a lung-er neh a malpui changtiang ni ta ai nit angkan a sa khah ni ta nîng a ti.

¹⁹“Israela richihein ki zianga ngaihoi thillan an hong ilanhei chu ni nainuhei, ni naipahei neh nin kumkho dongtum rangin nangni kî pêk a nit. Amahih nangmah neh ni naipahei neh ni nainuhei ranga kumtluang ichi thuthlung iseh thei ino chu nîng a ti,” a ti a.

²⁰PUMAPA khan Arona ziangah, “Nangma dongtumin ram ni nei rang ni mak a, Israela richihein ram nang an sem sa rang ni mak. Keimah, PUMAPA hi ner chon, Israelhei lâia ni dongtum chu ki nit,” a ti a.

²¹PUMAPA khan, “Levia chihei khah Puan-In ienkol sin an tho manin Israela richihein ki zianga sômka khatkah an hong ichôi murdi chu kî pêk a nit.

²²Atûna rithokin chu Israela richi, mi danghei khan Ritongna Puan-In khah an hong nâi rang ni khâi mak; khanonchu, thil thônchâi duai an ta, an ithi rang a nit.

²³Atûna rithokin chu Levia chihei bang khan Ritongna Puan-Ina sin khah thông an ta, a mophurna tinrêng pêl an ti. Hi dân hih nin richi suanpâr idêna dân rang a nit. Levia chihei hin Israela richihei lâiah in-loi-ram idet an nei rang ni mak.

²⁴Israela richihei sômka khatkah, ngaihoi thillana ki zianga an hong ilan khah an dongtum rangin ki înran pêk a nit. Khasikah khan kêng, ram risemnaah Israela richihei lâiah dongtum nei no tin u itia ki lei îril a nit,” a ti a.

²⁵PUMAPA khan Mosia ziangah,

²⁶“Levia chihei khah iril roh; Israel mihei sômka khatkah, nin dongtum ranga PUMAPA nangni ipêka rithokin sômka khatkah PUMAPA ta rang ngaihoi thillanin nin pêk rang a nit.

²⁷Nin ngaihoi thillan khah loisin itho ngaihein an bu vâng masatak neh uain sôm masatak an ilan ngai ritlukpui angkana nangni pom pêk nîng a ti.

²⁸Khangkan Israela richihei ata sômka khatkah nin idong, PUMAPA ziangah sômka khatkah kha ngaihoi thillanin nin hong lan mai ngai rang a nit. Kha PUMAPA ta ranga ngaihoi thillan khah thiampu Arona nin hong pêk rang a nit.

²⁹Nin thil dong murdi lâia â ṭha tak khah PUMAPA ta rangin nin lan mai ngai rang a nit; bu thar neh uain ithar angkana ringai nîng a ti.

³⁰Â ṭha tak nin lan zoiin chu a dang kha chu nangmanin nei nin ta, amakhah loisin mihein an thil invâng an lan zoia an rîzôla bu la om neh an sômkhura uain la om anmanin an idong ngai angkana be nîng a ti.

³¹Amakhah Ritongna Puan-In enkolna sin nin tho thalo a nit a, nin insungkua kan tak mun khomah fah thei nin ti.

³²Â ṭha tak PUMAPA ziangah nin lan tâkin chu a dang kha chu fah khom unla, thiamno changin om no tin u. Khannisela, â ṭha tak PUMAPA peh loiin Israelhei thilpêk rithiang inbor tlak no rei; nin inborin chu nin ithi rang a nit,” a ti a.