Read Biete RITEPNA 19 Bible Online

RITEPNA 19 - Biete bible

RITEPNA 19

¹PUMAPA khan Mosia neh Arona â sôn a, an ziangah,

²“Israelhei ziangah hi PUMAPA thupêk hih iril rei. Israela richihei khan serâtrila sen, demnaboi, ringkol lan ribât tlak ngai ino hong ikâi rangin iril rei.

³Thiampu Eleazara ziangah an pêk rang a nit; ani khan riabuk dâiputiang kâi a ta, a mu chung ngêiah ân that rang a nit.

⁴Khanungchu, thiampu Eleazara khan sial thisen ichînkah kha lâng a ta, a kutṭim ichia a ta, Ritongna Puan-In tiang isongin voisarikah arthe rang a nit.

⁵Sialrila khah a vun hei, a tak hei, a thisen hei neh a êk hei, a rêngkan ama mu chung ngêiah khan ân hâl rang a nit.

⁶Khanungchu, thiampu khan Sidar thing hei, husop hei, patsen hei lâng a ta, serâtrila an hâlna meiah khan a hâl rang a nit.

⁷Kha rizoiin chu thiampu khan a silbomhei risûnfâi a ta, tui risil a ta; khanungchu, riabukah khan lût thei a ti; nikhomsela, kholoi idênin rithiang ino la nîng a ti.

⁸Serâtrila hâltu khom khan a silbomhei risûnfâi a ta, tui risil a ta; nikhomsela, kholoi idênin rithiang ino la nîng a ti.

⁹Khanungchu, mi inimna nei ino khan serâtrila rivâm khah lakhôm a ta, Israel mipuihei mang rangin riabuk putiang mun ifâiah iṭha takkan siang a ti. Amakhah sual rithârna tui an irthe ngaiah khan iphul rang a nit.

¹⁰Serâtrila rivâm rikhômtu khom khan a silbomhei risûnfâi a ta; nikhomsela, kholoi idênin rithiang ino nîng a ti. Hihei hih Israela richihei neh an lâia om nam dang ta ranga kumkho dân rang a nit.

¹¹“Tu ruak khom ni seh, mithi ruak itôn rêng rêng chu sûn sarika sung rithiang ino nîng a ti.

¹²Kha mi khan a sûn thumnî neh a sûn sarinî-ah khan rithârna tui khah rithe a nit rang a nit; khanchu, hong rithiang a ti; khannisela, a sûn thumnî neh a sûn sarinî-ah khan arthâr non chu rithiang no ni a, a înim mai rang a nit.

¹³Tu ruak khom ni sela, mithi ruak itôn rêng rêng chu arthâr non chu mi nim ni mai a ti. Rithârna tui khah a chungah rithe a nit non chu mi nim a nit a, rithiang nona khah a chungah ai om mai a nit. Kha mi khan PUMAPA mun rithiang a înnim a nit a, ani khah Israel mihei lâi ata ipai rang a nit.

¹⁴“Puan in sungah mi a thin chu, a thi lâia puan ina om murdihei neh puan in sunga lût murdihei chu sûn sarika sung rithiang ino nîng an ti.

¹⁵Bûrbêl hei, tuibêl hei khom sîng ino[7] murdi chu sûn sarika sung â nim a nit.

¹⁶Mi tukhomin ramtui khomualah khandaia mi ithat ruak manih, thi ngai balama thi ruak manih, miriam ru manih, ithlân manih a tônin chu sûn sarika sung rithiang ino nîng a ti.

¹⁷“Khangkana nim kha chu hingkan ithâr rang a nit: Tui iluang rithiang bêlin thâl an ta, sual rithârna rang serâtrila rivâm kha an phul rang a nit.

¹⁸Mi rithiang, inimna nei ino khan husop lâng a ta, tuiah khan ichiang a ta, puan in hei, a sunga tinmatua hei, khantaka mi om murdihei khah rithêng a ti. Khangkah ngirin mi tukhom, miriam ru manih, ramtui khomuala sâra thi ruak manih, thi ngai balama thi ruak manih, ithlân manih itôntuhei khah arthe rang a nit.

¹⁹Mi rithiang, inimna nei ino khan mi rithiang ino khah a sûn thumnî neh a sûn sarinî-ah khan tui khah arthe rang a nit; khanchu, a sûn sarinî-ah khan rithiang ino mi khan a silbomhei risûnfâi a ta, tui risil a ta; khanchu, inî tlâk tenan chu hong rithiang tâng a ti.

²⁰“Khangkana rithiang nona nei mi khan arthâr nuam non chu â nimna khah boi no ni a, kha mi khan PUMAPA mun rithiang a înnim a nit a, Pathian mihei lâi ata ipai rang a nit.

²¹Rithârna tui rithetu khom khan a silbomhei arsûk infâi rang a nit; rithârna tui itôntuhei murdi khah kholoi idênin rithiang ino nîng an ti. Hi dân hih kumkhuaka nin mang rang a nit.

²²Mi rithiang inon ai tôn murdi chu â nim nîng a ta; kha mi inimna nei va tôntu murdi khom khah kholoi idênin rithiang ino nîng an ti,” a ti a.