Read Biete RITEPNA 2 Bible Online

RITEPNA 2 - Biete bible

RITEPNA 2

¹PUMAPA khan Mosia neh Arona ziangah hi thu hih a pêk a:

²Israela richihei khan riabuk an siamin an panam neh an rui chit risinsiana puanzâr itârin Ritongna Puan-In isong korongin riabuk an siam rang a nit.

³Nisua tianga an panam ritlek itâra puan in idâng ranghei chu Juda pôlhei nîng an ti: Juda richihei lupui chu Aminadaba naipa Nasona a nit a,

⁴an tam dân chu mi sîngsarikah sângilikah rizarukkah an nit.

⁵Anmani kôl zela puan in idâng ranghei chu Isakara chihei an nit. Isakara richihei lupui chu Zuara naipa Nathanela a nit a;

⁶an tam dân chu mi sîngringakah sângilikah rizalikah an nit.

⁷Khanungchu, Zebulun chihei an nit, an panam lupui chu Helona naipa Eliaba a nit a;

⁸an tam dân chu mi sîngringakah sângsarikah rizalikah an nit.

⁹Anni pôl hih Juda pôla tep an nit, an rêngkan chu mi nuailei sîngiriatkah sângirukkah rizalikah an nit. Annihei hih kal ithok masa mai ngai rang an nit.

¹⁰Sim tiang panga an panam ritlek itâra puan in idâng ranghei chu Reuben pôlhei an nit. Reubena richihei lupui chu Sedeura naipa Elizura a nit a;

¹¹an tam dân chu mi sîngilikah sângirukkah rizarngakah an nit.

¹²Khanung Simeona chihei om an ta; Simeona richihei lupui chu Zurisadaia naipa Selumiela a nit;

¹³an tam dân chu mi sîngringakah sângikuakkah rizathumkah an nit.

¹⁴Gada chihei om nôk an ta; Gada richihei lupui chu Deuela naipa Eliasafa a nit;

¹⁵an tam dân chu mi sîngilikah sângringakah rizarukkah sômringakah an nit

¹⁶Annihei hih Reubena pôla tep an nit; an rêngkan mi nuailei sîngringakah sânglei rizalikah sômringakah an nit. Anni hih Juda pôlhei inunga a lôm inikna rithok rang chu an nit.

¹⁷Khanungchu, Ritongna Puan-In khah an rizôn tikin Levia chihei khah a lâi takah Reubena pôlhei inung zelah khan fêng an ti. Pôl tin khah riabuka an puan in rizôp lam angkah takin an panam puanzâr chit nuaiah a pôl pôlin an fe rang a nit.

¹⁸Tlâk tiang panga an panam ritlek itâra puan in idâng ranghei chu Efraim pôlhei an nit. Efraima richihei lupui chu Amihuda naipa Elisama a nit a;

¹⁹an tam dân chu mi sîngilikah neh rizarngakah an nit.

²⁰An kôl zelah khan Manasea chihei om an ta; Manasea richihei lupui chu Pedazura naipa Gamaliela a nit;

²¹an tam dân chu mi sîngithumkah sânginikah rizanikah an nit.

²²Khanung, Benjamin chihei om an ta; Benjamin richihei lupui chu Gideonia naipa Abidana a nit;

²³an tam dân chu mi sîngithumkah sângringakah rizalikah an nit.

²⁴Annihei hi Efraim pôla tep an nit, an rêngkan mi nuaikah neh sângiriatkah rizakah an nit. Annihei hih a lôm ithumna rithok rang chu an nit.

²⁵Mâr tiang panga an ritlek itâra puan in idâng ranghei chu Dana pôlhei an nit. Dana richihei lupui chu Amisadaia naipa Ahiezera a nit;

²⁶an tam dân chu mi sîngirukkah sânginikah rizasarikah an nit.

²⁷An kôl zela puan in idâng ranghei chu Asera richihei an nit. Asera richihei lupui chu Okrana naipa Pagiela a nit;

²⁸an tam dân chu mi sîngilikah sânglei rizarngakah an nit.

²⁹Khanung Naftalia richihei om an ti. Naftalia richihei lupui chu Enana naipa Ahira a nit;

³⁰an tam dân chu mi sîngringakah sângithumkah rizalikah an nit.

³¹Annihei hih Dana pôla tep an nit a, an rêngkan mi nuailei sîngringakah sângsarikah rizarukkah an nit. Annihei hih a pôl nung ita taka rithok rang an nit.

³²Hihei hih Israela richi, pôl tina a insungkua kuaa thlei chita riming an irziakhei chu an nit, an rêngkan mi nuaiirukkah sângithumkah rizarngakah sômringakah an nit.

³³Mosia zianga PUMAPA thupêk angkan Levia richihei kha chu Israelhei ritepnaah hin inṭang sa ni mak e.

³⁴Khaangkan, Mosia zianga PUMAPA thupêk lam angkah khan Israelhei khan an tho a; a pôl pôlin riabuk an siam a, an panam ritlek chit nuaiah a rui ruiin an ife ngai a nit.