Read Biete RITEPNA 20 Bible Online

RITEPNA 20 - Biete bible

RITEPNA 20

¹Israel mipuihei khah thla khatnaah khan Zin ramchâr an tlung a, Kades munah khan riabuk an khuar a. Kha munah khan Miriami chu a thi a, an phûm tâk a.

²An riabuk khuarnaah khan tui omak a, khasikah khan Mosia neh Arona hei makungah mipuihei khah an hong riphun a,

³“PUMAPA Puan-In kottuala kin suapuihei an thi lâiah khan Pathianin ne lei that ta sela â ṭha ok rang nôm na!

⁴Îtho rang im kin sial-ui-ar neh ithi rang ringota PUMAPA mihei hih ramchârah hin nin ne iṭhui hi?

⁵Îtho rang im Aigupta ram ata hingkana ram iṭôl takah hin nin ne iṭhui inlût hi? Bubâl hei, theipui hei, grep hei, theisen hei lak omak a. Iin rang tui tak ilua khom om ino a nit hih,” an ti a.

⁶Mosia neh Arona khah mipuihei ata an rikiang a, Ritongna Puan-In kotbâiah lingisikin an ibok a; khanchu, PUMAPA roinpuina vâr an ziangah a zuang ilang a.

⁷PUMAPA khan Mosia ziangah,

⁸“Thuthlung Bôm maa irol iom khah lan la; khanungchu, nangmah neh Arona khan mipuihei khah koibûm unla, an mitmu ngêiah, soa lungpui soh, tui isua rangin thu peh rei. Khangkan lungpui ata khah mipuihei neh an ranhei in rang tui a zuang isuak rang a nit,” a ti a.

⁹PUMAPA thupêk angkan Mosia khah a fe a, irol khah a va lâk tâk a.

¹⁰Mosia neh Arona khan mipuihei khah lungpui kôlah khan an bûm a, Mosia khan an ziangah, “Rihel ngaihei, ringai rei, nin in rang hi lungpui ata hih tui nangni kin îsua pêk rang mani?” a ti a.

¹¹Mosia khan irol khah a lâng a, lungpui khah voinikah a hang itôk a; khanchu, tui a hong pût suak zur zur a, mipuihei murdi neh an ranhei khan an in tâk a.

¹²Khannisela, PUMAPA khan Mosia neh Arona ziangah khan, “Israela richihei mitmuah nin ne iam zoi tlia inlangin ne chôiinrisâng mak chei; khasikin, ki pêk rang ramah khan hi mipuihei ṭhui inlûttu ni no tin u,” a ti a.

¹³Israel mihei khan PUMAPA chunga an riphunna muna tui hi Meriba tui an ibe tâk a nit; anmani sikah khan arthiangzia a înlang tâk a nit.

¹⁴Mosia khan Kades ata khah Edom rêng ziangah mi a tir a, “Nin suapui Israelhein dengtheina itam takkah an isik khah lei reh tâng ni ta.

¹⁵Kin pi neh puhei khah Aigupta ramah an rithon a, kum itam takkah Aigupta ramah khan kin om tâk a, Aigupta mihei khan keini neh kin pi neh puhei an nuam an ne lo a.

¹⁶Khanchu, ne ṭangpui rangin PUMAPA kin isam a, ani khan kin rôl khah a lei riat a, vântirtôn a zuk tir a, Aigupta ram ata a ne iṭhui suak a nit. Atûnah hin ni ramrî dep khua Kadesah kin iom a nit.

¹⁷Ringai ihoi takkan nin ram hih ipâl thleng rangin ne phal roh; nin loia manih, nin grep rikula manih fe no ning ung a, nin tuisunsua tuihei khom in no ning ung a, lamilianah khan fe thal kin ta, ni ram kin khêl mâkah chu changtiang manih, voitiang manih khom pêt no ning ung e,” a ti a.

¹⁸Khannisela, Edom mihei khan, “Kin ram nin pâl thleng rang phal mang ung e. Ipâl thleng nin tumin chu, nangni doi rangin khandai neh kin hong irthok rang a nit,” itin an sam a.

¹⁹Israel mihei khan, “Lamilianah fe thal kin ta; keimanin manih, kin ranhein manih nin tui kin in duaiin chu a man nangni pêng kin ti, thil dang îte tho loiin fe thal thal kin ti,” an ti a.

²⁰Edom mihei khan, “Nin pâl rang phal mang ung” an ti a. Khanchu, Israelhei lei idan rangin Edom rêng khah sipai itam takkah neh a hong rithok tâk a.

²¹Edom mihei khan an ram ipâl thleng an phal no sikin Israel mihei khah lam dang tiang an fe tâk a.

²²Israel naihei khah an rêngkan Kades ata an suak a, Hor tlâng an va tlung a.

²³Hor tlâng khah Edom ramrî depa om a nit. Kha munah khan PUMAPA khan Mosia neh Arona khah â sôn a; an ziangah,

²⁴“Israel richihei zianga ipe ki înkung ramah khan Arona chu lût no nih; nin ruaikan Meribaah khan ki thupêk isêla nin rihel sikin ani chu ai thi rang tâk a nit.

²⁵Arona neh a naipa Eleazara khah Hor tlângah hong ṭhui roh.

²⁶Amakhan Arona thiampu zakorfual kha lîp pêk inla, a naipa Eleazara inhâk roh; kha munah khan Arona chu ai thi rang tâk a nit,” a ti a.

²⁷PUMAPA thupêk angkah khan Mosia khan a tho a, mipui murdi mitmuah Hor tlângah khan an fe tâk a.

²⁸Khanchu, Mosia khan Arona thiampu zakorfual khah a lîp pêk a, Eleazara khah ân hâk a; itlângsîpah khan Arona chu a thi tâk a; Mosia neh Eleazara chu itlânga rithokah khan an zuang ṭum a.

²⁹Israel mipuihei murdi khan Arona thi thu khah an riatin chu an rêngkan sûn sômithumkah an sûn a.