Read Biete RITEPNA 21 Bible Online

RITEPNA 21 - Biete bible

RITEPNA 21

¹Kanan ram sim tianga om Kanan mi Arad rêng khan Israel mihei khah Atharim lampuiah an hong iti a riatin chu Israel mihei khah a lei doi a, mi ṭhenkah chu ring manin a man a.

²Khanungchu, Israel mihei khan PUMAPA ziangah ṭong an inkung a, “Hi mihei hih kin kutah ni ne pêkin chu anmani neh an khuahei hih lah riai kin ta, inrimang vang kin ti,” an ti a.

³Khanchu, PUMAPA khan Israel mihei thu a lei riat a, Kanan mihei khah an kutah a pêk a, Israelhei khan an that riai a, an khuahei khom khah an isiat pêk vang a; a mun rimingah khan Horma[8] an be a.

⁴Israelhei kha Hor tlânga rithokah khan an fe a, Edom lôina lam, Tuipui Sen tiang lamah khan an fe tâk a, lampui arkual sikin mipuihei khah an ning â hal a.

⁵Mipuihei khan Pathian neh Mosia an nuar a, an riphun a, “Ithôm Aigupta ram ata hi ramchâra thi rangin teh ni ne iṭhui suak? Bu lak om ino, tui lak om ino, hi Manna chanlamboi khom hih kin chim tâk,” an ti a.

⁶Khanungchu, PUMAPA khan irûl a mi chuk inah chi ân pung pêk a, Israel mi itam takka khah an ichuk that tâk a.

⁷Mipuihei kha Mosia ziangah an hong a, a ziangah, “PUMAPA chungah neh nangma chungah kin rêngkah hin kin lei îsual tâk a nit; kin lâi ata irûl hih inboi rangin PUMAPA ne ngên pêk roh,” an ti a. Khanchu, Mosia khan mipuihei khah a ṭongṭai pêk a.

⁸PUMAPA khan Mosia ziangah, “Irûl a mi chuk inah chi rilim siam inla, mi tin mu thei rangin thingthluan lêrah târ roh; khanchu, irûl îchuk murdîn amakhah an enin chu dam an ti,” a ti a.

⁹Mosia khan dârin irûl rilim a siam a, thingthluan lêrah a târ a, irûl îchuk murdîn dâr irûl khah an en ngânin chu an dam mai tâk a.

¹⁰Israelhei khah an fe mai a, Obota munah riabuk an khuar a.

¹¹Obota rithokah khan an fe nôk a, Moab ram sua tiang pang Abarima khoramah riabuk an khuar nôk a.

¹²Khantak ata khah an fe nôk a, Zered phâiah riabuk an khuar nôk a.

¹³Khantaka rithokah khan an rithon nôk a, Amorhei ramrîa rithoka hang infor ramchâr, Arnon vadung mâr tiang pangah khan riabuk an khuar nôk a. Arnon chu Moab ramrî, Moab neh Amor ramrî vadung a nit.

¹⁴Khasika khan kêng, “PUMAPA Ridoina,” iti lekhabuah khan “Sefa phâia Vaheb khua neh Arnon phâizôl hei,

¹⁵itlâng pang phâizôl ritha zun, Ar khua dên neh Moab ramrî va sun dap kha,” iti a lei init.

¹⁶Khantaka rithokah khan Beer[9] an iti mun khah an tlung a; kha mun khah tuisunsua omna a nit. PUMAPA khan Mosia ziangah, “Mipuihei chu koi bûm inla, tui pêng ki ti,” a ti a, kha tuisunsua khah ai pêk a nit.

¹⁷Kha lâiah khan hi la hih Israelhei khan an sak a: “O tuikuang, tuipût hong isua roh; Zâiin nang lei lôm kin ti.

¹⁸Rêng naihei neh nam ruaituhei ngêi ichoi tuikuang, Rêng irol neh irol danghei ngêia choih chu,” itin. Ramchâra rithokah khan Matanaah an rithon nôk a;

¹⁹Matana rithokah khan Nahaliela; Nahaliela rithokah khan Bamotha;

²⁰Bamothaa rithokah khan Moab ram phâizôl Pisga tlâng thuai an tlung a, kha tlângsîpa rithokah khan ramchâr a îlang riai a nit.

²¹Israelhei khan Amor rêng Sihona ziangah palâi an tir a.

²²“Ni ram nen pâl thleng roh. Keimani neh kin ranhei khan lampui rikan no ning ung a, nin loia manih, nin grep rikula manih pêt no ning ung a, nin tuisunsuahei ata tui khom in no ning ung e. Ni ram kin khêl mâkah chu rêng lamilianah khan fe thal thal kin ti,” an ti a.

²³Khannisela, Sihona khan Israela mihei chu a ram ipâl rang khah phal mak a, Sihona khan a sipaihei a bûm a, ramchâra Jahaz munah an fe a, Israelhei khah an doi tâk a.

²⁴Nikhomsela, Israel mihei khan mi itam takkah an lei that a, an ram mâr tiang, Arnon vadunga rithoka Jabok vadung idênin an lâk pêk a. Jabok vadung mâr tiang kha chu Amona richihei ram a nit; Amonhei khan an ramrî khah iṭha takkan an lei irung khap a nit.

²⁵Israelhei khan Amorhei khopui murdi khah an lâk riai a, khopuiheiah khan Israelhei khah an om tâk a. Hesbon neh a kôlvêla khuahei murdi khom an ilua pêk riai a nit.

²⁶Hesbon khua khah Amorhei rêng Sihona khopui tak a nit. Sihona khan Moab rêng masa khah a lei doi a, Arnon vadung idênin Moab ram khah a lei ilâk pêk tâk a nit.

²⁷Khasika khan kêng la phuatuhein: “Sihona khopui Hesbonah hong unla, Inding indet nôkin lei siam inṭha rei.

²⁸Hesbona khopuia rithokin Sihona sipaihei chu mei angkan an fe suak a; Moab ram Ar khopui khah a kâng inrivâm a, Arnon vadung mâr tiang tlângramhei chu a kâng infâi vang a.

²⁹Moab mihei, nin chung ân khôk vang na! Khemos chubai ûntuhei, rimangna nin chungah a tlung tâk! Nin pathian khan ipahei chu lâizâm itho rangin a siam a, Nupanghei chu Amorhei rêng Sihona suak rangin a pêk tâk.

³⁰Atûn chu an richi suanpârhei inrimangin an om tâk, Hesbona rithoka Dibon idênin, Nasima rithoka Medeba kôla om Nofa dênin,” itin an iphua a nit.

³¹Khangkah khan a nit, Amorhei ramah khan Israelhei chu an iom a nit.

³²Jazer khopui doina rang lam inṭum va enthlât rangin Mosia khan mi a tir a. Khante, Israelhei khan kha khopui neh a kôlvêla khuahei khah an lâk a, kha khuaheia om Amor mihei khah an ûm isua vang a.

³³Khanungchu, Israelhei khah an kîr nôk a, Basan lampui tiang an fe a; Basan rêng Oga khan lei idan itumin a mihei a lei bûm a. Edrei munah khan Israelhei khah a lei doi a.

³⁴PUMAPA khan Mosia ziangah, “Ani khah ṭi no roh. Amah neh a mihei neh a ram khom ni kutah nang kî pêk rang a nit. Hesbona om Amorhei rêng Sihona chunga ni tho lam angkah takin a chungah khom ni tho rang a nit,” a ti a.

³⁵Khanchu, Israelhei khan Oga neh a naihei khah an that a, a mihei murdi khom izua rêng rêng nei loiin an that infâi vang a; a ram chu an lua pêk tâk a.