Read Biete RITEPNA 22 Bible Online

RITEPNA 22 - Biete bible

RITEPNA 22

¹Israel mihei khah an rithon thiai mai a, Jordan dung nisua tiang Jeriko ridîn Moab ram phâiah khan riabuk an khuar a.

²Zipora naipa Moab rêng Balaka khan Israel mihein Amorhei an tho dân murdi khah a lei riat a.

³Israel mihei khah an tam tak tak sikin amah neh a mipuihei murdi kha rilônthingin an om tâk a.

⁴Moabhei khan Midian ruaituhei ziangah, “Serâtchalin loisûl an îpet suat suat ngai angka hin hi hatpuihei hin ei vêla mi murdi an ne ifâk zoi rang a nit hi,” an ti a.

⁵Kha lâia Moab rêng chu Zipora naipa Balaka a nit. Eufratis vadung rikama Pethora khua, a suapuihei omna Amaw rama om, Beora naipa Balaama koi rangin mi a tir a, “Ringaita, nam khatkah Aigupta rama rithoka hong isuak an om a; a ram zel an dâp a, kin ram ne lah pêk rangin kin kôlah an iom a nit. Ki ta rangin chu an irât rai a nit; khasikin, ringai ihoi takkan hong inla, hi mihei hih vâni ne hong sâm pêk roh. Khanchu, inê thei kin ta, kin ram ata hih kin ûm suak thei duai lôi im. Ṭhat nî vurhei chu ṭhat ivurin an om ngai a, vâni nî sâmhei chu vânisalin an om ngai iti kin riat a,” iti rangin mi a tir a.

⁷Khanchu, Moab ruaituhei neh Midian ruaituhei khah vânisâm man rang ichôiin an fe tâk a; Balaama ziang an va tlung a, Balaka thucha khah an iril a.

⁸Balaama khan an ziangah, “Vuanzân chu hin riak unla, PUMAPA khan thu a ne ril lam tak chu naktûk nin ziangah ithlun ki ti,” a ti a. Khanchu, Moab ruaituhei khah Balaama inah khan an riak tâk a.

⁹Balaama ziangah Pathian a zuang a, “Ni ina riakhei hih tuhei im an init,” a ti a.

¹⁰Balaama khan Pathian ziangah, “Zipori naipa Moab rêng Balaka mi tirhei an nit. Ani khan ki ziangah, ‘Ringai ta, Aigupta rama rithoka hong nam khan leilung an dâp a; hong inla vâni ne sâm pêk roh; khanchu, doi thei kin ta, kin ram ata kin ûm isua thei tâk duai im,’ itin mi a hong itir a nit,” a ti a.

¹²Pathian khan Balaama ziangah, “Ni fe rang ni mak, kha mihei khah vâni ni sâm rang ni mak e, ṭhat kî vurhei an nit,” a ti a.

¹³Atûk zîngah chu Balaama khah a thoi a, Balaka palâihei ziangah khan, “Nin ramah kîr nôk ta rei; PUMAPA khan nin zianga fe rang a ne iphal ino a nit,” a ti a.

¹⁴Khanchu, Moab ruaituhei khah an thoi a, Balaka ziangah an kîr a, “Balaama kha kin ziangah zuang nuam mak e,” an ti a.

¹⁵Khanchu, Balaka khan ruaitu tam ual, matonahei nêka roinpui ual a tir nôk a.

¹⁶Balaama ziangah an fe a, “Balaka rithoka thucha an iril a, ‘Ki zianga hong rang hih îte rêng rêngin nang khap no riseh.

¹⁷Loman roinpui tak tak nang pêng ki ta, ki zianga nî ti kangân chu nang tho pêk ki ti. Ringai ihoi takkan hong inla, hi mihei hih vâni ne sâm pêk roh,’ a ti,” an ti a.

¹⁸Khannisela, Balaama khan Balaka mihei khah a sâm a, an ziangah, “Balaka hin a rêng ina sum neh rângkachak ne peh vang rang khom sela, PUMAPA ki Pathian thu hih ichîntekah khom kî khêl thei ino a nit.

¹⁹Nikhomsela, mi danghei tho lam angkan vuanzân chu hin riak unla, PUMAPA khan ki ziangah ingkan im a ti nôk ngân la hang ringai hi rong,” a ti a.

²⁰Kha zânah khan Balaama ziangah Pathian khah a zuang a, “Hi mihei hih nang ikoia hong an nitin chu, thoi inla, an zianga fe rangin risiam roh; khannisela, nang ki îril ringot bang ni tho rang a nit,” a ti a.

²¹Khanchu, Balaama khah zîngah a thoi a, a sakuartung ân rifûk a, Moab ruaituhei ziangah khan a fe tâk a.

²²Balaama a fe sikah khan Pathian ning a thik a; lei idan rangin PUMAPA vântirtôn khah lampuiah a lei ngîr a. Balaama khah a sakuartung chungah a chuang a, â som inikahei khan an zui sa a.

²³Sakuartung khan PUMAPA vântirtôn, khandai ichôia lampuia ding khah a mu a; khanchu, sakuartung kha lampui ata khah a pêt a, ramnuaiah a fe tâk a. Balaama khan sakuartung khah lampuia infe nôk itumin â tôk a,

²⁴PUMAPA vântirtôn khah grep rikul lung idâi neh idâi kâr, lamrichêpna takah a lei iding a.

²⁵Sakuartung khan PUMAPA vântirtôn khah a mu a, lung siadâi khah a va neng a, Balaama ke khah idâiah khan a epde a. Khanchu, Balaama khan sakuartung khah â tôk nôk a.

²⁶PUMAPA vântirtôn kha a pên ual viatah arthon a, lampui richêpna tak, changtiang manih, voitiang manih khom pêtna om nona mun takah khan â ding a.

²⁷Hi zoroah hin chu sakuartung khan PUMAPA vântirtôn kha a mun chu â bok ṭian tâk a. Balaama kha a ning a thik ok a, â rolin sakuartung khah â tôk rak rak tâk a.

²⁸Khanungchu, PUMAPA khan sakuartung khah ân ṭong a, Balaama ziangah khan, “Îngân im nang ki lo a, hingkana ṭum ithumkah zel ni ne îtôk hi?” a ti a.

²⁹Balaama khan sakuartung ziangah khan, “Ni nuamning ni ne lo sika a nit; khandai chôi vâng inlang chu nang kî that pial rang tâk a nit,” a ti a.

³⁰Sakuartung khan Balaama ziangah, “Atûn ten idêna ni chuang maina ngai ni sakuartung kî nit ino mani? Hingka hin nang ki tho tâk ngai ngân im a?” a ti a. Ani khan, “Tho ngai mak che” a ti a.

³¹Khanungchu, PUMAPA khan Balaama mit khah ân vâr pêk a, PUMAPA vântirtôn khandai ichôia lampuia ding khah a mu tâk a; khanchu, Balaama kha rinêngah lingisikin â bok tâk a.

³²PUMAPA vântirtôn khan a ziangah, “Ithôm hingkana ṭum ithumkah zel ni sakuartung hi ni îtôk? Ni fe nona rangah ni fe sikin nang lei idan rangin kî zuang a nit.

³³Ni sakuartung khan a ne mu a, ki maah voi thumkah ai pêt a nit khah; pêt no sela chu nang kî that rang tâk a nit, sakuartung kha chu that no ning e,” a ti a.

³⁴Balaama khan PUMAPA vântirtôn ziangah, “Ki îsual tâk a nit; ne dan rangin lampuiah ni lei iding iti kî riat ino a nit; khasikin, atûnah hin kî fe mai hih â dik ino a nitin chu ki in tiang kîr nôk ki ti,” a ti a.

³⁵Khannisela, PUMAPA vântirtôn khan Balaama ziangah, “Hi mihei ziangah hin fe roh; khannisela, ni zianga ki thu ril ringot bang ni ril rang a nit,” a ti a. Khanchu, Balaama khah Balaka milianhei ziangah khan a fe tâk a.

³⁶Balaka khan Balaama a hong iti a riatin chu Moab ramrî Arnon vadung panga khopui, Ar khopui idênin a lei va don a.

³⁷Balaka khan Balaama ziangah, “Ṭhatnemringai takkan nang ikoi rang mi ki hong tir masaah khan ithôm ni hong nuam no? Thilpêk roinpui nang pe tluk thei no ning nî sôn mani?” a ti a.

³⁸Balaama khan Balaka ziangah, “En ta, hi ki zuang tâk hite. Khannisela, atûnah hin thu sîr theina ritha im ki neia? Pathianin ki bâia thu ai sia bang kî ril rang a nit,” a ti a.

³⁹Khanchu, Balaama kha Balaka ziangah khan a fe tâk a, Huzot khua an va tlung a.

⁴⁰Amakhan Balaka khan sial hei, bera hei ithatin ribôlna a lan a, a sa ṭhenkah kha Balaama neh a zianga milian iomhei khah a pêk a.

⁴¹Atûk zîngah chu Balaka khan Balaama khah a ṭhui a, Bamot Baal munah a fepui a; kha muna rithokah khan Israel mipui ichînkah chu an mu thei a.