Read Biete RITEPNA 23 Bible Online

RITEPNA 23 - Biete bible

RITEPNA 23

¹Balaama khan Balaka ziangah, “Hin Mâichâm sarikah ne siam pêk inla, serâtchal sarikah neh berachal sarikah ne hong kâi pêk roh,” a ti a.

²Balaka khan Balaama ti lam angkah khan a tho a; Balaka neh Balaama khan mâichâm tinah khan serâtchal khatkah neh berachal khatkah chit an lan a.

³Khanungchu, Balaama khan Balaka ziangah, “Ni hâlrivâm thillan kôlah hin lei ngîr ṭian roh. Kei chu hang fen fiar ki ta, PUMAPA chu ne sôn rangin a zuang duai khom a nit thei a, ki zianga a ne îril murdi chu nang iril ki ti,” a ti a. Khanchu, a khât bangin itlângsîpah khan a hang fe a.

⁴Pathianin Balaama khah a lei ritongpui a. Balaama khan a ziangah, “Mâichâm sarikah ki siam a, mâichâm tinah serâtchal khatkah neh berachal khatkah kî lan chit a nit,” a ti a.

⁵PUMAPA khan Balaama bâiah khan thu a sia a, Balaka zianga zu sîr nôk rangin a tir kîr nôk tâk a.

⁶A zuang tlungin chu Balaka neh Moab milianhei kha hâlrivâm thillan mâichâm kôlah khan an lei ngir ṭian mai a.

⁷Balaama khan hingka hin thu â sam tâk a: “Aram tlângram ata Moab rêng Balakan a ne koi a, ‘Jakobhei hi vâni ne sâm pêk roh, Hong inla, Israelhei ne dem pêk roh,’ a ti a.

⁸Ingkan im Pathianin vâni ai sâm ino khah keiman vâni ki sâm thei rang a? Ingkan im Pathianin ai dem ino khah ki dem thei rang a?

⁹Lungpui chunga rithokin anni chu ki mu thei a, Itlânga rithokin anni chu an îlang riai a nit. Ringai ta, anni chu a rana om rang nam an nit; Nam dang angkah pai ni mak e.

¹⁰Jakobhei, richi suanpâr chu tuipuia ṭiai angkana tam an nit, Tep zoiloi an nit. Pathian mihei lâia khatka angkan ki thi le khom thîng ki ta, Mi fel angkan rithlaringam takkan thîng ki ti,” a ti a.

¹¹Khanungchu, Balaka khan Balaama ziangah, “Ni ne tho dân hih ingka tliam ai nit tâk? Ke râlhei vâni sâm rangin nang ki hong ṭhui a; khanniseh, ṭhat kêng nî vur tâk a,” a ti a.

¹²Ani khan a sâm a, “PUMAPA khan ki bâia thu ai sia ringot bang kêng kî ril suak thei,” a ti a.

¹³Khanungchu, Balaka khan Balaama ziangah, “Mun dangah lei fe nôk rei; an rêngka ni mu riai thei nona mun, a ṭhen bang ni mu theina rangah khan lei fe rei; khantakah khan chu vâni sâm ngam ni ti,” a ti a.

¹⁴Khanchu, Pisga tlângsîpa Zofim[10] munah khan a ṭhui a, kha mun khomah khan mâichâm sarikah a siam a, mâichâm tinah khan serâtchal khatkah neh berachal khatkah a lan chit a.

¹⁵Balaama khan Balaka ziangah, “Soa son PUMAPA ki va sôn sungin ni hâlrivâm thillan kôlah hin lei ngîr ṭian roh,” a ti a.

¹⁶PUMAPA khan Balaama khah a lei ritongpui a, a bâiah khan thu a sia a, “Balaka zianga kîr nôk tan la, a ziangah va sîr roh,” a ti a.

¹⁷Khanchu, a kîr nôk a, Balaka neh Moab milianhei khah hâlrivâm thillan mâichâm kôlah khan an lei ngîr ṭian mai a. Balaka khan a ziangah, “PUMAPA khan im a lei ril?” a ti a.

¹⁸Khanchu, Balaama khan hi rillôkna thu hih a ril tâk a: “Balak, Thoi inla, ringai roh, Zipora naipa, ki thu ringai roh.

¹⁹Pathian hi milakbûr miriam pai angkah ni mak a, Lung rilet diai ngai miriam khom ni mak. A înkung tâk chu a len ngêt ngai a, A lei iril tâk chu a înpuitling ngêt ngai a nit.

²⁰Ringai ta, ṭhat ivur rangin a ne tir a, Pathianin ṭhat ai vur tâk khah indanglam thei ni mang e.

²¹Jakobhei rang vânduaina zel mu mang a, Israelhei rang inkhôk buaina zel mu mang e. PUMAPA, an Pathian khan a ompui a; Ani chu Rêngin an inei khap a nit.

²²Aigupta rama rithokin Pathianin a ṭhui suak a, Ani chu an ta rangin â rungtu ṭha tak, Selechal angkah a nit.

²³Jakobhei chu doi inê thei rual ni mak a, Israelhei chu dôi ritha ingam chi ni mak e. Mihein Israelhei an muah khan, ‘Pathian sintho chu arkhêl vang na!’ tîng an ti.

²⁴En ta u, Israel nam chu sakeibaknei zîng ithoi angkah an nit, Sa that ranga rithok suak chu; Sa a sê a, a sân phor mâkah, A thisen â dôk infâi riai mâka chu ringam nôk khâi ngai ino angkah hi an nit,” a ti a.

²⁵Khanungchu, Balaka khan Balaama ziangah, “Israelhei vâni sâm lak nuam mak che a, khan ṭhat ilua chu vur no roh,” a ti a.

²⁶Nikhomsela, Balaama khan a sâm a, “PUMAPA khan a ne îril murdi chu kî tho ngêt rang a nit, nang ki ti pêk tâk khate,” a ti a.

²⁷Balaka khan Balaama ziangah, “Hong roh, mun dangah lei fe rei, khantaka rithokah khan chu Pathianin hi mihei hih vâni ni sâm rangin ṭha a ti duai lôi im,” a ti a.

²⁸Khanchu, Balaka khan Balaama khah Peor tlângsîpah a ṭhui a, khantak ata kha chu ramchâr khah a zuk ilang thei riai a.

²⁹Balaama khan Balaka ziangah, “Hi munah hin mâichâm sarikah ne siam pêk nôk inla, serâtchal sarikah neh berachal sarikah khom hong kâi nôk roh,” a ti a.

³⁰Balaka khan Balaama ti lam angkah khan a tho a, mâichâm tinah khan serâtchal khatkah neh berachal khatkah a lan chit a.