Read Biete RITEPNA 24 Bible Online

RITEPNA 24 - Biete bible

RITEPNA 24

¹Israelhei ṭhativur khah PUMAPA lungdo a nit iti Balaaman a riat tâk a; khasikin, matona a lei tho ngai lam angkan thlasân rangin infiar nuam khâi mak a. Ramchâr tiang khah a zuk thlîr a,

²Israel mihei chu a nam nama puan in an izar dûl khah a mu a. Pathian ritha a chungah a zuang tlung a,

³Hi rillôkna hi a ril tâk a. “Beora naipa Balaama thucha, Ifel takka mu theitu thucha chu,

⁴Pathian thuhei iretu thu, Tinrêngthotheia inlârna dongtu, Ibok raka, nikhomsela, mit ivâr tâka thuhei chu:

⁵O Jakobhei puan in chu a va ṭhat vang na! O Israelhei nin omna inhei chu â en a hoi vang na!

⁶Itûm kung inrân dûl angkan arthâ duai a, Vadung panga rikul iring zun angkan, PUMAPA iphun aloe mun angkan, Vadung panga sidar thinghei angkah a nit.

⁷Rua tui itam takkah dong an ta, Tui tamna munah chimuhei song[11] an ta, An rêng chu Agaga nêkan a roinpui a; A lal ram chu roinpui tak nîng a ti.

⁸Aigupta ram ata â ṭhui suaktu Pathian chu, An ta rangin riki ṭha tak inei sele angkana rât a nit. An irâl, nam danghei khah inrimang vang an ta, An ruhei khah ikhiak an ta, an thalheiah khan kâp inver thal an ti.

⁹Anni chu sakeibaknei angkah an nit a, A in lâiin tûm a thoi ngam rang a? Israelhei ṭhat ivurtu kangân chu ṭhat ivurin om sela, Vânisâmtu kangân chu vânisalin om riseh,” a ti a.

¹⁰Khanchu, Balaama chungah khan Balaka khah a ning a thik tâk a; Balaka khan Balaama ziangah, “Ke râlhei vânisâm rangin nang ki koi a, khan voithumkah sar ṭhat ni vur tâk a.

¹¹Khasikin, ni khua tiang fe ta roh; roinpui takka nang chôiinrisâng ki lungril a nit a; nikhomsela, PUMAPA khan nang ai phal ino a nit hih,” a ti a.

¹²Balaama khan Balaka ziangah, “Balaka hin a rêng ina sum neh rângkachak murdi ne peh riai rang khom sela, PUMAPA thu chu â ṭha tiang manih, â seh tiang manih khom, keima lungril suakin chu kî khêl thei ino a nit, PUMAPA ne îril ringot bang kêng kî ril thei, nang kî ti pêk tâk ni mak im a?” a ti a.

¹⁴Balaama khan Balaka ziangah, “Atûn chu ki mihei ziangah kî kîr nôk rang tâk a nit a; nikhomsela, ki fe maah hin hi mihei hin, hi nunga ni mihei chunga an tho rang nang lei iril thlâm rong,” a ti a.

¹⁵Khanungchu hi rillôkna hi a ril tâk a: “Beora naipa Balaama thucha, Ifel takka mu theitu thu chu.

¹⁶Pathian thuhei ringai a, Chungnungtaka zianga rithoka riatna dongtu thu, Tinrêngthotheia inlârna mutu, Ibok raka; nikhomsela, mit hong ivâr tâka thuhei chu.

¹⁷Sûn matona om rang dân ki mu a, Atûn zela rang ni mak a, ilah taka rang ki mu a; Jakoba rithokin ârsi hong suak a ta, Israela rithokin rêng irol hong cher a ta, Moab ram pumpui sun chit a ta, Setha richihei intlôm a ti.

¹⁸Â râl ngai Edom neh Seirhei chu inê a ta, A ram chu dong pêk a ti, Israelhei chan chu ṭha bîk a ti.

¹⁹Jakoba rithoka hong isuak rêng khan, Khuaa la om isunhei chu inrimang vang a ti,” a ti a.

²⁰Khanungchu, Balaama khan inlârnan Amalek tiang a ngat a, hi rillôkna hi a ril tâk a: “Amalek nam chu ritha nei tak a nit a, Nikhomsela, a mongna chu kumkhuaka rimangna a nit,” a ti a.

²¹Khante, Ken mihei tiang ma a song a, hi rillôkna hih a ril tâk a: “Ni omna mun chu a det a, Ner bu chu lungpuia kâi a nit.

²²Nikhomsela, Ken mihei chu rimang vang an ta, Asuria rêngin suakah nangni a ṭhui tenan chu,” a ti a.

²³Balaaman hi rillôkna khom hih a ril a: “Pathian khah a châng tenan tûm â ring thei rang a?

²⁴Kitim rama rithokin rikuangin hong an ta, Asuria neh Eber chu inê an ta; Khannisela, anni khom kumkhuakan rimang an ti,” a ti a.

²⁵Khanungchu, Balaama khah a thoi a, a khua tiang a kîr nôk tâk a; Balaka khom a kîr tâk a.