Read Biete RITEPNA 25 Bible Online

RITEPNA 25 - Biete bible

RITEPNA 25

¹Israelhei Sitim phâiah an om lâiah khan, ipahei khan khantaka om Moab nungâkhei khah an châipui a.

²Hi nupanghei hin an pathianhei zianga an ribôlnaheiah khan an fial a. Khanchu, Israelhei khan an fâk a, Peor muna Baal pathian khah chubai an ûn sa tâk a.

³Khasikah khan Israelhei chungah PUMAPA ning a thik tâk a.

⁴Khanchu, PUMAPA khan Mosia ziangah, “Mipuihei ruaitu murdi chu ṭhui inla, ki thupêk izômin hi mi pualoihei hih sûn khovârah[12] ikhâi that roh; khanchu, PUMAPA ningthik inrît tak khah Israelhei chung ata rikiang a ti,” a ti a.

⁵Mosia khan Israel ruaituhei ziangah khan, “Nin nam lâiah Peor muna Baal chubai iûntuhei murdi khah that rei,” a ti a.

⁶Ritongna Puan-Ina kot bula lunginah taka an ṭap lâi takin Mosia neh Israel mipui ribûmhei mitmuah, Israel mi khatkan Midian nupang khatkah a puan in sungah a ṭhui inlût a.

⁷Thiampu Arona nai Eleazara naipa Finehasa khan a mun chu mipui ribûmhei lâi ata khah a suak a, ifei a chôi a,

⁸Israel mi neh nupang khah puan inah khan arzûl thal a, an ruaikan an phûngah a sun iver thal a. Khanchu, Israelhei chunga rî lêng khah arngam tâk a.

⁹Nikhomsela, rî sikah khan mi sînginikah sângilikah chu an ithi phâk a nit.

¹⁰PUMAPA khan Mosia ziangah,

¹¹“Finehasa thil tho sikin Israelhei chunga ki ningthik chu a irkiang tâk a nit. Ani khan keima bana pathian dang chubai iûn chu a theimâk a, khasikah khan Israel richihei chu ki înrimang vang khâi ino a nit.

¹²Khasikin, amah neh archihei rang rualrichanna thuthlung kî siam a nit.

¹³Amah neh a chi suanpârhei chu kumkhuakan thiampu det nîng an ti; a Pathian ta rangin ṭhatnem arngai tak tak a; khasikin, Israela richihei an sual sika thi rang ngaidamna a îthlun pêk a nit, iti iril roh,” a ti a.

¹⁴Israela mi, Midian nupang sika thi tâk chu Simeona nam lupui Salua naipa Zimria a nit.

¹⁵Khante, Midian nupang an ithat tâk kha Midian nam rêng khatkah, Zura nainu, Kozbii a nit.

¹⁶PUMAPA khan Mosia ziangah,

¹⁷“Midianhei hih rûn unla, inrimang vang rei.

¹⁸Peor munah nangni an lêm a, ripui lêng lâia an isun that tâk, an rêng nainu Kozbii manga nin chungah thil ṭha no tak an tho sikah khan,” a ti a.