Read Biete RITEPNA 26 Bible Online

RITEPNA 26 - Biete bible

RITEPNA 26

¹Ripui a hek nungah khan PUMAPA khan Mosia neh thiampu Arona naipa Eleazara ziangah,

²“Israel mipui lâia râl idoi thei tâk, ipa kum sôminika chungtianga mi murdi khah a panam nama thleiin tep riai rei,” a ti a.

³Khanchu, Mosia neh thiampu Eleazara khan thupêk an zôm a, kum sôminika chungtianga ipa murdi chu an koi bûm a. Jeriko ridîn, Jordan rikam, Moab phâizôlah khan an ribûm tâk a. Hihei hih Israela richi Aigupta ram ata hong isuakhei chu an nit:

⁴

⁵Israela nai lutîr, Reubena richihei: Hanoka, Hanok panamhei bul; Palua, Palu panamhei bul;

⁶Hezrona, Hezron panamhei bul; Karmia, Karmi panamhei bul chu an nit.

⁷Hi hei hih Reubena namhei an nit a, an rêngkan ipa mi sîngilika sângithumka rizasarika sômithumkah an nit.

⁸Palua hin Eliaba a nei a;

⁹Eliaba hin Nemuela, Dathana, Abirama hei a nei a. Dathana neh Abirama chu Kora pôla mihei khah an nit. Annihei hih PUMAPA chungah an rihel a, Mosia neh Arona doituhei kha an nit.

¹⁰Rinêng a kak a, Kora neh annihei kha â lem inrimang a, Kora nungzuitu mi rizanikah sômringakah khom kha meiin a kâng inrivâm a; anni chu Israel mipuihei ta ranga risinsiana an hong nit tâk a.

¹¹Khannisela Kora naihei kha chu thi sa mak e.

¹²Simeona richihei: Nemuela, Nemuela panamhei bul; Jamina, Jamin panamhei bul; Jakina, Jakin panamhei bul;

¹³Zera, Zer panamhei bul; Saula, Saul panamhei bul chu an nit.

¹⁴Hihei hih Simeona richi, ipa an itep theikah chu an rêngkan mi sînginika sânginika rizanikah an nit.

¹⁵Gada richihei: Zefona, Zefon panamhei bul; Hagia, Hagi panamhei bul; Sunia, Suni panamhei bul;

¹⁶Oznia, Ozni panamhei bul; Eria, Eri panamhei bul;

¹⁷Aroda, Arod panamhei bul; Arelia, Areli panamhei bul chu an nit.

¹⁸Gada richi, ipa an itep theikah chu an rêngkan mi sîngilikah neh rizarngakah an nit.

¹⁹Juda khan Era neh Onana a nei a; Era neh Onana kha Kanan ramah an thi a.

²⁰A panam nama thleiin Juda richihei chu: Sela, Sela panamhei bul; Pereza, Perez panamhei bul; Zera, Zer panamhei bul chu an nit.

²¹Khante, Pereza richihei chu: Hezrona, Hezron panamhei bul; Hamula, Hamul panamhei bul chu an nit.

²²Hihei hih Juda richihei, ipa an itep theikah chu an rêngkan mi sîngsarika sângirukka rizarngakah an nit.

²³A panam nama thleiin Isakara richihei chu: Tola, Tol panamhei bul; Pua, Pu panamhei bul;

²⁴Jasuba, Jasub panamhei bul; Simrona, Simron panamhei bul chu an nit.

²⁵Hihei hih Isakara richi, ipa an itep theikah chu an rêngkan mi sîngirukka sângilika rizathumkah an nit.

²⁶A panam nama thleiin Zebuluna richihei chu: Sereda, Sered panamhei bul; Elona, Elon panamhei bul; Jaleela, Jaleel panamhei bul chu an nit.

²⁷Hihei hih Zebuluna richi, ipa an itep theikah chu an rêngkan mi sîngirukkah neh rizarngakah an nit.

²⁸A panam nama thleiin Josefa richihei: Josefa khan naipa inikah Manasea neh Efraima a nei a.

²⁹Manasea richihei: Makira, Makir panamhei bul; Makira khan Gileada a neia, Gileadhei richibul kha a nit.

³⁰Hi panamhei hih Gileada richihei chu an nit: Iezera, Iezer panamhei bul; Heleka, Helek panamhei bul;

³¹Asriela, Asriel panamhei bul; Sekema, Sekem panamhei bul;

³²Semida, Semid panamhei bul; Hefera, Hefer panamhei bul;

³³Hefera naipa Zelofehada khan nai ipa nei loiin nai nupang bang a nei a; a nai nuhei riming chu Malaii, Novaii, Hoglaii, Milkaii neh Tirzaii hei an nit.

³⁴Hihei hih Manasea richi, ipa an itep theikah chu an rêngkan mi sîngringaka sânginika rizasarikah an nit.

³⁵A panam nama thleiin Efraima richihei chu: Shothela, Shothel panamhei bul; Bekera, Beker panamhei bul; Tahana, Tahan panamhei bul chu an nit.

³⁶Shothela khan Eran panamhei bul Erana khah a nei a.

³⁷Hihei hih Efraima richi, ipa an itep theikah chu an rêngkan mi sîngithumka sânginika rizarngakah an nit. Khi panamhei murdi khih Josefa richihei chu an nit.

³⁸A panam nama thleiin Benjamina richihei chu: Bela, Bel panamhei bul; Asbela, Asbel panamhei bul; Ahirama, Ahiram panamhei bul;

³⁹Sefufama, Sefufam panamhei bul; Hufama, Hufam panamhei bul chu an nit a.

⁴⁰Khante, Bela khan Arda neh Naamana a nei a. Arda chu Arda panamhei bul a nit a, Naamana chu Naaman panamhei bul a nit.

⁴¹Hihei hih Benjamina richi, ipa an itep theikah chu an rêngkan mi sîngilika sângringaka rizarukkah an nit.

⁴²A panam nama thleiin Dana richihei chu: Sohama, Soham panamhei bul chu a nit.

⁴³Hihei hih Dana richi, ipa an itep theikah chu an rêngkan mi sîngirukka sângilika rizalikah an nit.

⁴⁴A panam nama thleiin Asera richihei chu: Imnaa, Imna panamhei bul; Izvia, Izvi panamhei bul; Beria, Beri panamhei bul chu an nit.

⁴⁵Beria richihei chu: Hebera, Heber panamhei bul; Malkiela, Malkiel panamhei bul chu an nit.

⁴⁶Asera khan nai nupang a nei a, arming chu Seri a nit.

⁴⁷Hihei hih Asera richi, ipa an itep theikah chu an rêngkan sîngringaka sângithumka rizalikah an nit.

⁴⁸A panam nama thleiin Naftalia richihei chu: Jazeela, Jazeel panamhei bul; Gunia, Guni panamhei bul;

⁴⁹Jezera, Jezer panamhei bul; Silema, Silem panamhei bul chu an nit.

⁵⁰Hihei hih Naftalia richi, ipa an itep theikah chu an rêngkan mi sîngilika sângringaka rizalikah an nit.

⁵¹Israela richi ipa an itep thei murdi chu an rêngkan mi nuaiirukkah sânglei rizasarika sômithumkah an nit.

⁵²PUMAPA khan Mosia ziangah,

⁵³“Hi namhei hih an panam tam dân izirin ram hi ni sem pêk rang a nit.

⁵⁴Panam â tam ualhei kha ram â lian ual pêng ni ta, â roi ualhei kha â chîn ual ni pêk rang a nit, atûna ritepna hi an tam dân sûtna rang a nit.

⁵⁵Khannisela, thlasânin ram chu isem rang a nit a; an chibulhei nam riming ridot dân angkah takin ram chu dong an ti.

⁵⁶Thlasân lam angkah takin ram chu â tamhei neh â roihei ziangah isem rang a nit,” a ti a.

⁵⁷A panam nama thleiin Levia richihei chu: Gersona, Gerson panamhei bul; Kohatha, Kohath panamhei bul; Meraria, Merari panamhei bul chu an nit.

⁵⁸Hihei khom hih Levia richihei an nit; Libnia ruihei, Hebrona ruihei, Mahlia ruihei, Musia ruihei, Kora ruihei an nit. Khante, Kohatha khan Amrama a nei a.

⁵⁹Amrama khan Levia nainu Jokebedi khah nupuiin a nei a; Jokebedi kha Aigupta rama suak a nit. Ani khan Arona neh Mosia neh an farnu Miriami khah ai nei pêk a nit.

⁶⁰Arona khan naiipa ilikah Nadaba, Abihua, Eleazara neh Ithamara a nei a.

⁶¹Nadaba neh Abihua khan mang rithiang ino mei, PUMAPA maa namhoi hâlna rangin an mang a, an ithi tâk a nit.

⁶²Levia richi itep thei murdi ipa thlaka ten chung tianga chu an rêngkan mi sînginika sângithumkah an nit. Israel mihei lâiah ram indong sa an nit no sikin Israel mihei ritepna bu-ah inchuang sa an init ino a nit.

⁶³Jeriko ridîn, Jordan vadung rikam, Moab phâizôla an om lâia Mosia neh Thiampu Eleazaran an tep lâiah khan Israela richihei chu khi zâka khih an nit.

⁶⁴Sinai ramchâra riteppui masaa Mosia neh thiampu Aronan Israel mi an itephei kha khatkah khom â dam om khâi mak.

⁶⁵PUMAPA khan, “Ramchârah an ithi riai rang a nit,” a lei iti angkah khan Jefunea naipa Kaleba neh Nuna naipa Josua ti no chu tute â dam om khâi mak e.