Read Biete RITEPNA 27 Bible Online

RITEPNA 27 - Biete bible

RITEPNA 27

¹Josefa naipa Manasea khan Makira a nei a; Makira naipa kha Gileada a nit; Gileada khan Hefera a nei a, Hefera khan Zelofehada a nei a, Zelofehada khan nainuhei Malaii, Novaii, Hoglaii, Milkaii, Tirzaii hei ai nei a nit.

²Anni khah Ritongna Puan-In kotbâiah Mosia neh thiampu Eleazara neh ruaituhei neh mipuihei murdi makungah an hong a, an iding a.

³“Ramchârah khan kin pa chu a thi tâk a, PUMAPA chunga rihel ranga ribûm, Kora pôlah khan chu ṭang mak a; nikhomsela, ama sual sikin a thi a, naiipa nei mak a.

⁴Naiipa a nei no sik ringotin kin pa riming chu a panamhei lâi ata ai boi rang im ai nit? Kin pa suapuihei lâiah dongtum ram ne peh sa rei,” an ti a.

⁵Mosia khan an thu chu PUMAPA makungah â thlun a.

⁶PUMAPA khan Mosia ziangah,

⁷“Zelofehada nainuhei ngênna khah â dik a nit; an pa suapuihei lâiah dongtum ram ni pêk rang a nit, an pa dongtum chu ni pêk ngêt rang a nit.

⁸Israela richihei ziangah, ‘Mi, naiipa nei loiin a thin chu archon khah a nainuhei nin pêk rang a nit.

⁹Nainu khom a nei non chu archon khah ân zirpuihei nin pêk rang a nit.

¹⁰Inzirpui khom a nei non chu archon khah a pa inzirpuihei nin pêk rang a nit.

¹¹A pa khan inzirpui a nei non chu archon khah ama rinâipui tak a suapui nin pêk rang a nit, aman lua vang a ti. Keimah, PUMAPA hin Mosia thu kî pêk angkan Israela richihei ta rangin hi dân hih dân idet nîng a ti,’ itin iril roh,” a ti a.

¹²PUMAPA khan Mosia ziangah, “Abarim tlângah khin hang lui inla, Israela richihei ki pêk rang ram khah hang thlîr roh.

¹³Ni hang thlîr zoin chu nen zirpuipa Arona angkan ni chipuihei ziangah iṭhui ni tâng ni ti.

¹⁴Zin ramchârah, ki thupêk angkan ni tho no sik neh ki chungah mipuihei Meriba munah an riphun lâiah khan, nin ruaikan, an mitmuah nin ne chôiinrisâng no sikah khan,” a ti a. Meriba chu Zin ramchâra, Kades muna tuinâr khah a nit.

¹⁵Mosia khan PUMAPA ziangah,

¹⁶“PUMAPA Pathian, ringna murdi nâr, ni mipuihei ruaitu, an ma ruaia, anmani ṭhui suak a, ṭhui inlûttu rang mi iphun pêk rangin nang kî ngên a nit,” a ti a.

¹⁸PUMAPA khan Mosia ziangah, “Nuna naipa Josua khah ṭhui inla, ani kha lungril inei tak a nit a, a chunga ni kut ringat roh.

¹⁹Ani kha thiampu Eleazara neh mipuihei maah khan inngîr inla, an mitmu ngêiah, nang ithûltu a nit iti inpuang roh.

²⁰Israela richi mipuihei murdîn a thu an ôi theina rangin nangma thuneina ngêi khah lan roh.

²¹Urim neh Thumim imanga ki lungdo reh ngai rang chu thiampu Eleazara nîng a ta; khangkan Eleazara thu ringai mai pumin Josua khan Israel mipuihei murdi chu lam tinrêngah roisakpui ngai a ti,” a ti a.

²²Mosia khan PUMAPA thupêk angkah khan a tho a. Josua khah a ṭhui a, thiampu Eleazara neh mipuihei murdi maah khan ân ngîr a.

²³PUMAPA thupêk angkah takin, Mosia khan Josua lu chungah a kut arngat a, ama thûltu rangin ân puang tâk a.