Read Biete RITEPNA 28 Bible Online

RITEPNA 28 - Biete bible

RITEPNA 28

¹PUMAPA khan Mosia ziangah,

²“Israela richihei kha thu peh roh: A zoro dik thapah Pathian zianga bubâl thillanhei khah ilan rang a nit, amah inlôm ngai meia thillan namhoi khah lan ngai rei.

³“Bubâl thillan, PUMAPA zianga nin lan ngai rang chu hingka hin a nit: Nîn tin hâlrivâm thillan, kumka mi berachal inikah, demnaboi nin lan mai ngai rang a nit.

⁴Beratuai khatkah kha zîngah lan nin ta, a dang khatkah kha kholoi tiang nin lan rang a nit.

⁵Bera khatkah lan rualin Bubâl thillanin baidi ṭha chi herkah, oliv riak iṭha chi litarkah neh inripol nin lan rang a nit.

⁶Amahih Sinai tlânga rithoka kôlnisua kipa hâlrivâm riai ranga an bubâl thillan ngai chu a nit; amakhah PUMAPA inlôm ngai tak chu a nit.

⁷Berate khatkah lan rualin iin rua thillan uain litarkah PUMAPA mâichâmah ibun ngai rang a nit.

⁸Kholoiah berate khatkah khom kha, zîng tianga lan lam angkah takin ilan rang a nit, iin rua thillan uain neh khan. Amakhah farua thillan a nit a, kha thillan inam khan PUMAPA chu a înlôm ngai a nit.

⁹“Sabatnî-ah khan beratuai kumka mi, demnaboi inikah neh bubâl thillan, baidi ṭha chi her inikah, oliv riak neh met inripol neh uain thillan kha ilan rang a nit.

¹⁰Sabatnî kipah nîn tina hâlrivâm thillan banah hi hâlrivâm thillan hih uain thillan neh ilan ngai rang a nit.

¹¹“Thla thar nî kipah PUMAPA ziangah hâlrivâm thillanin hihei hih nin lan rang a nit. Serâtchaltuai inikah, berachal khatkah neh kumka mi berachaltuai sarikah, demnaboi korong a nit rang a nit.

¹²Serâtchaltuai khatkan Bubâl thillan rang baidi ṭha chi oliv riak neh inripol her ithumkah, berachal khatkan Bubâl thillan rang baidi ṭha chi oliv riak neh inripol her inikah,

¹³Berachaltuai khatkan baidi herkah chit ilan rang a nit. Hi hâlrivâm thillan neh bubâl thillan inam hin PUMAPA chu a înlôm ngai a nit.

¹⁴Khante, iin rua thillan chu serâtchal khatkah hin uain litar inikah, berachal khatkah hin uain litarkah neh arzâtkah, beratuai ikipah hin uain litar khatkah chit ilan rang a nit. Amahih kum thluana thla thar nî tina hâlrivâm thillana lan ngai rang chu a nit.

¹⁵Kôlnisua kipah hâlrivâm thillan neh uain thillan ilan ngai banah sual ribôlna thillanin kêlchal khatkah ilan sa rang a nit.

¹⁶“PUMAPA chôiinrisâng nan Kalkan Kût khah thla khatna, a sûn sômleiilinî-ah khan imang ngai rang a nit.

¹⁷Kha thla a sûn sômleiringanî-ah khan ruaiṭhepui chu iphut nîng a ta, sûn sarika sung chu bairiam bang ifah rang a nit.

¹⁸A sûn masatak nî-ah khan inkhômpui rithiang nei nin ta, sin îte nin tho rang ni mak.

¹⁹Farua thillanin hâlrivâm thillan khah PUMAPA ziangah nin lan rang a nit. Serâtchaltuai inikah, kumka mi berachaltuai sarikah, demnaboi korong nin hong lan rang a nit.

²⁰Hi rualah hin Bubâl thillanin serâtchal tuai khatkah hin baidi her ithumkah, berachal khatkah hin baidi her inikah,

²¹berachaltuai ikipah hin baidi herkah chit nin lan sa rang a nit.

²²Mipui ranga rithârna siam pêkna rangin sual ribôlnan kêlchal khatkah nin lan sa rang a nit, khangkah khan mipui sual nin thâr rang a nit.

²³Amahih zîng tina thillan, hâlrivâm thillan nin ilan mai ngai bana nin lan rang a nit.

²⁴Khangkah khan sûn sarika sung chu PUMAPA ziangah farua thillan hi nin lan mai rang a nit. Kôlnisua kipa hâlrivâm thillan neh iin rua thillan uain nin lan ngai bana nin lan rang a nit.

²⁵A sûn sarinî-ah khan inkhômpui rithiang nei nôk nin ta, sin îte nin tho rang ni mak.

²⁶“Nin bu thar vâng masa, Bubâl thillana PUMAPA zianga nin hong lan zoro, Pôl Kût sûn masa tak khomah khan inkhômpui rithiang nei nin ta; sin îte nin tho rang ni mak.

²⁷Hâlrivâm thillanin serâtchaltuai inikah, berachal khatkah, kumka mi berachaltuai sarikah, demnaboi korong nin lan rang a nit; kha thillan inam khan PUMAPA chu a înlôm ngai a nit.

²⁸Bubâl thillanin baidi ṭha chi, oliv riak neh inripol, serâtchaltuai khatkah hin baidi her ithumkah, berachal khatkah hin baidi her inikah,

²⁹beratuai ikipah hin baidi herkah chit nin lan rang a nit.

³⁰Mipuihei ranga rithârna siamna rangin sual ribôlnan kêlchal khatkah nin lan sa rang a nit, khangkah khan mipuihei sual nin thâr rang a nit.

³¹Kôlnisua kipa hâlrivâm thillan neh bubâl thillan neh uain thillan banah khahei khah nin lan sa rang a nit.