Read Biete RITEPNA 3 Bible Online

RITEPNA 3 - Biete bible

RITEPNA 3

¹Sinai tlânga PUMAPAN Mosia â sôn lâiah khan Arona neh Mosia richihei chu hihei hih an nit.

²Arona khan naipa ilikah a nei a: a uliantak khah Nadaba a nit a, a danghei chu Abihua, Eleazara neh Ithamara hei an nit.

³Anni hih thiampu sin itho ranga riak inrithu-a inran an nit.

⁴Khannisela, Nadaba neh Abihua chu Sinai ramchârah mei rithiang ino manga namhoi an hâl sikin, PUMAPA maah khan an thi a, anni hin nai nei mak a; Eleazara neh Ithamara bang kha an pa Arona dam lâia thiampu sin itho chu an nit.

⁵PUMAPA khan Mosia ziangah,

⁶“Levia chihei khah ṭhui inla, thiampu Arona sin itho pêk rangin phun roh.

⁷Anni khan Ritongna Puan-Ina sin inang murdi thông an ta, thiampuhei neh mipuihei sin an tho rang a nit.

⁸Ritongna Puan-In sunga thil iom murdi enkol an ta, Israela mihei rithûlin Ritongna Puan-Ina sin khah thông an ti.

⁹Levia chihei bang khah Arona neh a naipahei mang ranga Israela richihei lâi ata kî pêkhei chu an nit.

¹⁰Arona neh a naipahei kha thiampu sin itho mai rangin ni phun rang a nit; mi dang tukhom kha sin itho tuma hong inrol kangân chu ithat rang a nit,” a ti a.

¹¹PUMAPA khan Mosia ziangah,

¹²“Ringai roh, Levia chihei hih ki ta an nit tâk. Aigupta mihei nai lutîr murdi ki that lâiah khan, Israelhei nai lutîr murdi chu a miriam neh an mîring khom ki dongtum ranga ki înran a nit. Nikhomsela, atûnah hin Israela richihei nai lutîr sûl iong masa tak rithûlin keimah ngêiin Levia chihei hih kî nei tâk a nit; anni chu ki dongtum bîk an init rang a nit. Keimah hi PUMAPA chu ki nit,” a ti a.

¹³

¹⁴Sinai ramchârah PUMAPA khan Mosia ziangah,

¹⁵“Levia richihei chu a panam namin neh a rui ruiin tep inla ipa murdi chu thla khatka ten chungtianga mi chu ni tep riai rang a nit,” itin thu a pêk a.

¹⁶Khanchu, Mosia khan PUMAPA thupêk lam angkah khan a tho tâk a.

¹⁷Levia khan naipa ithumkah a nei a: Gersona, Kohatha neh Meraria hei an nit. Anni hih panam riming riputna chibulhei an nit.

¹⁸Gersona khan naipa inikah a nei a: Libnia neh Simeia an nit.

¹⁹Kohatha khan naipa ilikah a nei a: Amrama, Izara, Hebrona neh Uziela hei an nit.

²⁰Meraria khan naipa inikah a nei a. Malia neh Musia an nit. Hihei riming hih an richihei khan an panam rui rimingin an înriput a nit.

²¹Gersona panama tephei chu Libni ruihei neh Simei ruihei hi a nit.

²²Ipa murdi thla khatka ten neh a chungtianga mi an itephei chu mi sângsarikah rizarngakah an nit.

²³Hi panamhei hin an puan in chu Ritongna Puan-In thlang tiang pangah an siam rang a nit.

²⁴An panam lupui chu Laela naipa Eliasafa a nit.

²⁵Anni hih Ritongna Puan-In enkoltu tak nîng an ta, inchung hei, a thua nôk hei, a kotbâi puanzâr hei,

²⁶a tual rikulna puanzâr hei, mâichâm ivêla puanzâr hei, a kottual lûtna puanzâr hei khah an kutah om a ta, hi thilhei chungchânga isin rua om murdi chu â sintu an init rang a nit.

²⁷Kohatha panama tephei chu Amram ruihei, Izhar ruihei, Hebron ruihei, neh Uziel ruihei hi an nit.

²⁸Ipa murdi thla khatka ten neh chungtianga mi an itep chu mi sângiriatkah rizarukkah an nit a, mun rithiang enkoltu ranghei an nit.

²⁹Hi panamhei hin an puan in chu sim tiang pangah khan an siam rang a nit.

³⁰Kohatha panamhei lupui chu Uziela naipa Elijafana a nit.

³¹An enkol rang chu Thuthlung Bôm hei, docham hei, meiser siana hei, mâichâm hei, mun rithianga thiampu mangrua bûrbêl hei, Mun Rithiang tak lûtna puanzâr hei a nit.Hi thilhei chungchânga itho rua om murdihei chu anmani mophurna a nit.

³²Thiampu Arona naipa, Eleazar chu Levia chihei ruaitu tak a nit; mun rithiang enkoltuhei thu lâkna tak a nit.

³³Meraria panama tephei chu Mali ruihei neh Musi ruihei rikop hi an nit.

³⁴Ipa murdi, thla khatka ten neh a chungtianga mi an itephei chu mi sângirukkah rizanikah an nit.

³⁵Hi panamhei hin an puan in chu mâr tiang pangah khan an siam rang a nit. Meraria panamhei lupui chu Abihaila naipa Zuriela a nit.

³⁶Meraria chihei sintum tak chu Puan-In inrifom a nit a, a bangruhei, a chopuihei, â ṭhungnahei neh a kâina ruihei an enkol rang a nit. Hi thilhei chungchânga itho rua om murdi chu anmani mophurna a nit.

³⁷Khabana a tualzôl rikulna chopuihei, arngatnahei, â kildetna neh a ruihei khom an enkol rang a nit.

³⁸Puan-In sak tiang pang, kot mâiah khan Mosia neh Arona neh a naipahei khan omna an siam rang a nit. Anni bang hih a nang zoro kipa Israela richihei rithûla Mun rithianga sinithotu rang an nit; mi dang tukhom hi sin hong itho tum kangân chu ithat rang a nit.

³⁹PUMAPA thupêk angkah khan Mosia neh Arona khan Levia chihei kha, a rui ruia thleiin an tep a, an rêngkan mi sînginikah sânginikah an nit.

⁴⁰PUMAPA khan Mosia ziangah, “Israel richihei nai lutîr murdi, ipa thla khatka ten neh a chungtianga murdi chu tep inla an riming riziak roh. Nikhomsela, Levia chihei chu Israelhei nai lutîr murdi rithûlin ki ta an init rang tâk a nit. Israelhei ran suak masatak murdi rithûlin Levia chihei ran khah ki ta rangin inran sa roh; keimah hi PUMAPA chu ki nit,” a ti a.

⁴¹

⁴²Mosia khan PUMAPA thupêk angkah khan a tho a, Israelhei nai lutîr ipa murdi a tep a,

⁴³a ulian indônin thla khatka ten neh a chungtianga mi murdi riming khah arziak suak a; an rêngkan mi sînginikah sânginikah rizanikah sômsarikah ithumka an nit.

⁴⁴PUMAPA khan Mosia ziangah,

⁴⁵“Israelhei nai lutîr murdi rithûlin Levia chihei chu ki ta an nit tâk thu inpuang roh. Israelhei ran suak masatak rithûl khomin Levia chihei ran khah ki ta ai nit rang tâk a nit.

⁴⁶Israelhei nai lutîr hi Levia chihei nêkan mi rizanikah sômsarikah ithumkan an tam ual a, khahei ritlanna khah Israelhei khan an pêk rang a nit.

⁴⁷Mi khatka ritlanna man chu tangkarua sekel ringakah nîng a ta, sekel chu Tempila mang lâi sekel angkah chia rik a nit rang a nit.

⁴⁸Ritlanna sum hih Arona neh a naipahei ipeh rang a nit,” a ti a.

⁴⁹Mosia khan Levia chihei mizon bana â chuang nai lutîrhei ritlanna sum,

⁵⁰mun rithianga sekel imanga rikhî tangkarua sekel sânglei rizathumkah sômirukka ringakah khah a lâk a,

⁵¹PUMAPA thupêk angkan Mosia khan ritlanna sum khah Arona neh a naipahei a pêk tâk a.