Read Biete RITEPNA 30 Bible Online

RITEPNA 30 - Biete bible

RITEPNA 30

¹Mosia khan Israel nam ruaituhei ziangah, “Hihei hih PUMAPA thupêk a nit:

²Mi tukhomin PUMAPA zianga thil ipeh rang ṭonginkung manih, riserinran ranga ṭongrikhâmna manih a neiin chu a len ngêt rang a nit a, a ṭongrikhâm lam angkah takin a tho ngêt rang a nit.

³“A pa ina la om nungâk khomin PUMAPA zianga thil ipeh rang ṭonginkungin manih, riserinran ranga ṭongrikhâmna manih a nei a,

⁴a pa khan a ṭongrikhâmna khah a riat a, a dâirekin chu a ṭongrikhâm lam angkah takin a tho ngêt rang a nit.

⁵Khannisela, a pa khan a phal non chu a ṭongrikhâmnaah khan rinang no nih, ilen rangin a pa khan a phal no sikin PUMAPA khan ani chu izâ a ti.

⁶“Tum sik pialin manih, ngaituan sei ok loiin manih nupang, pasal la nei inon ṭonginkungna manih, riserinran ranga ṭongrikhâmna manih nei sela, kha sungah khan pasal nei ta seh,

⁷a pasalin a riat a, a dâirek pêkin chu a ṭongrikhâmna khah a len ngêt rang a nit.

⁸Khannisela, a pasalin a riat a, ilen rangin a phal non chu a ṭongrikhâmnaah khan rinangna nei no nih; PUMAPA khan ani chu izâ a ti.

⁹“Nupang lêngṭûl tâkin manih, numeiin manih chu a ṭonginkung manih, a ṭongrikhâm manih khah a len ngêt rang a nit.

¹⁰“Pasal inei mai nupangin ṭonginkung manih, ṭongrikhâm manih nei sela,

¹¹a pasalin a riat a, a dâirek pêkin chu a len ngêt rang a nit.

¹²Khannisela, a pasalin a riat a, ilen rang a phal noa a nitin chu a ṭonginkung manih, a ṭongrikhâmna manih ata khah rinangna nei no nih. A ṭongrikhâmna len rangin a pasalin a phal no sikin PUMAPA khan ani chu izâ a ti.

¹³Nupangin, ṭonginkung manih, ṭongrikhâm manih ai nei rêng rêng chu a pasalin ai phalin ai phal ino thei a nit.

¹⁴Khannisela, a pasalin a riat nî zela a khap non chu, a ṭonginkung manih, a ṭongrikhâm manih angkah takin a tho ngêt rang a nit. A riat nî zelah khan a sêl no sikin ai namindetpui tina a nit.

¹⁵Nungah a pasalin a nupui ṭongrikhâmna khah a ṭhet inboipuiin chu a len no sika rinangna khah a pasal khan a pêl rang a nit,” a ti a.

¹⁶Hihei hih pasal nei ino a pa ina la om mai nungâkhei manih, pasal nei lâiin manih ṭongrikhâmna chungchânga tho dân ranga Mosia zianga PUMAPA thupêkhei chu a nit.