Read Biete RITEPNA 31 Bible Online

RITEPNA 31 - Biete bible

RITEPNA 31

²“Israelhei phuba khah Midianhei chungah lah roh. Kha rizoin chu ni chibulhei ziangah nî fe rang tâk a nit,” a ti a.

³Khanchu, Mosia khan mipuihei ziangah, “Midianhei idoi rangin râlthlukin rifo rei; Midianhei chungah PUMAPA phuba nin lâk rang a nit.

⁴Israel nam ikipa rithokin mi sângkah chit, ridoinaa fe rang, nin rithlang rang a nit,” a ti a.

⁵Khangkah khan Israel nam ikipa rithokin mi sângkah chit an rithlang suak a, an rêngkan mi sâng sômlei sânginikah an nit.

⁶Mosia khan mi sâng sômlei sânginikahei khah thiampu Eleazara naipa Finehasa lômin ridoi rangah khan a tir a; bûrbêl rithianghei neh riningna tum rang bekul khah an chôi a.

⁷Mosia zianga PUMAPA thupêk lam angkah khan Midianhei khah an rûn a; ipa murdi an that a.

⁸An mi thathei lâiah khan Midianhei rêng ringakah Evia, Rekema, Zura, Hora neh Reba hei khom an ṭang sa a. Beora naipa Balaama khom ridoinaah khan an ithat sa a nit.

⁹Israel mihei khan Midian nupanghei khah an naihei neh an man a; an ranhei, an bera lômhei, an neinun murdihei khah râllâkin an lâk a.

¹⁰Kha rama an omna khuahei, an riabukhei murdi khah an hâl inrivâm pêk a.

¹¹Miriam neh ran an imanhei neh an râllâk sum murdi an thôt riai a,

¹²Mosia neh thiampu Eleazara neh Israel mipuihei ziangah, an riabuk mun Moab phâizôl, Jeriko ridîn, Jordan rikamah khan an zuang ṭhui a.

¹³Mosia neh thiampu Eleazara neh mipui ruaituhei kha riabuk ata an suak a, pasalṭhahei khah an lei va don a.

¹⁴Ridoina bual ata hong sipai ruaitu, sângka chunga ruaituhei neh rizaka chunga ruaituhei chungah khan Mosia khah a ning a thik tâk a.

¹⁵Ani khan an ziangah, “Ithôm nupanghei khah an iringin nin lai zua?

¹⁶Ringai rei, Balaama roisakin Peor munah khan Israela richihei chu PUMAPA chunga porinche takka om rangin an iṭhui insual a nit. Khasikah khan kêng Israela richihei chungah ripui a zuang inlêng tâk a nit.

¹⁷Khasikin, atûnah hin naipang ipa murdi chu that unla, nupang mi ichâipui tâk murdi khom that sa rei.

¹⁸Nupang mi lai châipui ino arthiang murdi chu nin ta rangin zua rei.

¹⁹Tukhom mi that neh mi thi ruak itôn murdi chu riabuk putiang sûn sarika sung nin riak rang a nit. A sûn thumnî neh a sûn sarinî-ah khan nangmani neh nin nupang hong manhei khom nin rithâr rang a nit.

²⁰Silbom rêng rêng hei, savuna siam thil rêng rêng hei, samula siam murdihei, thinga siam thil murdihei khom nin thâr ngêt rang a nit,” a ti a.

²¹Thiampu Eleazara khan ridoina bual ata hong ikîr nôk tâkhei ziangah khan, “Mosia zianga PUMAPA thupêk chu hihei hih a nit.

²²Rângkachak hei, tangkarua hei, sumsen hei, thîr hei, rângva hei, sisâr hei meia hâla seh thei zel ino chu meiah liai nin ta; khanchu, hong rithiang tâng a ti, rithârna tui kha chu rithe rang a nit.

²³Meia hâl thei ino murdi chu rithârna tuia nôkin nin thâr rang a nit.

²⁴Nin silbomhei khom a sûn sarinî-ah khan risûnfâi nin ta, hong rithiang tâng nin ta; khanungchu, riabukah khan hong lût thei tâng nin ti,” a ti a.

²⁵PUMAPA khan Mosia ziangah,

²⁶“Nangmah neh thiampu Eleazara neh mipui ruaituhei khan râllâk thil an hong ichôi murdi, miriam neh ranhei khom ikhop san tep riai rei.

²⁷Rizât bangkan bâk inikan ṭhen unla, bâkkah kha ridoinaa fehei peh unla, bâkkah kha Israel mipuihei peh rei.

²⁸Ridoina fehei dongtuma rithokin miriamhei, serâthei, sakuartunghei, berahei, kêlhei murdi rizarngaka kipah khatkah PUMAPA ta rang lah pêk inla,

²⁹khahei khah PUMAPA ta ranga ngaihoi thillanin thiampu Eleazara peh roh.

³⁰A bâkkah Israela richihei dongtuma ata khom miriamhei, serâthei, sakuartunghei, berahei, kêlhei murdi sômringaka ata khatkah lah pêk inla, khahei khah PUMAPA Puan-In enkoltu Levia chihei peh roh,” a ti a.

³¹Khanchu, PUMAPA thupêk lam angkan Mosia neh thiampu Eleazara khan an tho tâk a.

³²Ridoinaa fehein anmani ta ranga thil an ilâk tep loiin râllâk thil an hong ichôi murdi chu hi zâkah hih a nit: Kêl neh bera nuaiirukka sîngsarika sângringakah; serât sîngsarika sânginikah; sakuartung sîngirukka neh sângkah; nupang mi lai châipui ngai ino sîngithumka sânginikah an nit.

³³

³⁴

³⁵

³⁶A bâkkah ridoinaa fehei dongtum khah kêl neh bera nuaiithumka sîngithumka sângsarika rizarngakah a nit a; PUMAPA ta ranga lâk inran chu rizarukka sômsarika ringakah a nit. Serât chu sîngithumka sângirukkah a nit a; PUMAPA ta ranga lâk inran chu sômsarika inikah a nit. Sakuartung chu sîngithumka rizarngakah a nit a; PUMAPA ta ranga lâk inran chu sômirukka khatkah a nit. Miriam chu sînglei sângirukkah an nit a; PUMAPA ta ranga lâk inran chu sômithumka inikah an nit.

³⁷

³⁸

³⁹

⁴⁰

⁴¹Khanchu, PUMAPA thupêk angkah takin PUMAPA ta ranga serinran khah ngaihoi thillanin Mosia khan thiampu Eleazara a pêk tâk a.

⁴²Ridoinaa fehei dongtum neh khan mipuihei dongtum khah arzât bang a nit a: kêl neh bera nuaiithumka sîngithumka sângsarika rizarngakah a nit a; serât sîngithumka sângirukkah a nit a; sakuartung sîngithumka rizarngakah a nit a; miriam sînglei sângirukkah an nit.

⁴³

⁴⁴

⁴⁵

⁴⁶

⁴⁷Israel mipuihei dongtuma rithokin Mosia khan sômringaka kipah khatkah, miriam khom ran khom a lâk a, PUMAPA thupêk angkan Ritongna Puan-In enkoltu Levia chihei a pêk a.

⁴⁸Khanungchu, sipai ruaitu, sângka chunga ruaituhei, rizaka chunga ruaituhei khah Mosia ziangah an hong a,

⁴⁹a ziangah, “Epu, kin lôma kin îrui chithei khah kin tep a, tute armang arpai om mang ung e.

⁵⁰Khasikin, kin mimal chita kin ilâk, rângkachaka siam rivona thilhei, kebunhei, bânbunhei, riming namna kutsabithei, kuarbethei, ritheihei keimani dong ranga kin ilâkhei hih, PUMAPA khan kin ringna a ne vênginzôk pêk manin PUMAPA ta ranga thillanin kin hong ilan a nit,” an ti a.

⁵¹Mosia neh thiampu Eleazara khan rângkachaka siam rivona thilhei murdi khah an lei lâk a.

⁵²Sipai ruaituhein PUMAPA zianga ngaihoi thillana an hong ilan rângkachak murdi khah her rizathumkah vêl a nit.

⁵³Sipai narânhei khan chu an râllâk thilhei khah anmanin an idong thal tâk a nit.

⁵⁴Mosia neh thiampu Eleazara khan rângkachak khah an chôi a, PUMAPA khan Israela richihei khah a riatmai theina rangin Ritongna Puan-Inah khan an sia tâk a.