Read Biete RITEPNA 32 Bible Online

RITEPNA 32 - Biete bible

RITEPNA 32

¹Reubena neh Gada namhei khan mîring an nei intam ok a. Jazer ram neh Gilead ram khah mîring vâina ranga mun iṭha tak a nitin an riat a;

²khanchu, Mosia neh thiampu Eleazara neh Israel nam ruaituhei ziangah khan an hong a,

³“PUMAPA ṭangpuina sika Israel mipuihein an înê tâk ram Atarot hei, Dibon hei, Jazer hei, Nimra hei, Hesbon hei, Eleale hei, Sibma hei, Nebo hei, Beon hei hih ran vâina ranga ram iṭha tak a nit a; khante, keini lakin ran kin nei intam a;

⁵khasikin, ṭha nin ti lam a nitin chu Jordan dung rikan loiin hi ram hih kin lua rangin ne peh rei,” an ti a.

⁶Mosia khan, Gada namhei neh Reubena namhei ziangah khan, “Nin suapuihei chu ridoinaah fêng an ta, nangni chu hin nin lei iom ṭian rang mani?

⁷Ithôm PUMAPA ipêk rama lût loi ranga Israela richihei lungril indôpin nin isiam rang hi?

⁸Kades-Barnea rithoka ram va enthlât ranga mi ki tir lâi khomah khan hingka ngirah hin nin puhei khan mi dang lungril indôpin an isiam a nit.

⁹Eskol phâizôl idênin an fe a, ram kha an mu a; khannisela, an hong kîr nôk tenan chu PUMAPA ipêk ramah khan an fe ngam nona rangin Israel richihei lungril zâmzal an sak a.

¹⁰Khanchu, kha nî-ah khan PUMAPA ning a thik a,

¹¹‘Aigupta ram ata hong isuak, kum sôminika ten chungtianga mi rêng rêng khan Abrahama hei, Isaka hei, Jakoba hei zianga ṭongrikhâma ipe ki înkung ram khah tlung tlak no nih, an ne izui tak tak ino a nit;

¹²Keniz mi Jefunea naipa Kaleba neh Nuna naipa Josua hei ruai bang hin tlung an ti, anni hin chu an ne izui tak tak a nit,’ itin ṭong a irkhâm tâk a nit.

¹³PUMAPA kha Israelhei chungah a ning a thik a, PUMAPA mitmua thil ṭhano thotuhei rikhûka mi murdi an vun riai mâkah chu ramchârah kum sômilikah a ne învâi tâk a nit hi.

¹⁴Atûnah hin nin pahei angkah nin nit hih, mi sual lôm, Israelhei chunga PUMAPA ning thikna inrît tak iṭhum nôk rang nin nit hih.

¹⁵Nangmani, Reubena namhei neh Gada namhei hin PUMAPA chu nin izui nuamino tak tak a nitin chu ramchârah hin ani khan ne mah rak nôk a ta, hi mihei murdi hih nin înrimang riai rang a nit,” a ti a.

¹⁶Mosia khah an va nâi a, a ziangah, “Kin ranhei rang rikulhei siam kin ta, kin nainetehei rang kulpui inei khuahei siam bak kin ta;

¹⁷khanungchu, riamrei ichôiin kin chipuihei ma iruai mai kin ta, an omna rang mun kin inlua mâkah chu kin chipui Israelhei lâiah ridoinaah fe mai kin ti. Kha sungah khan kin nainetehei chu hi muna mi omhei sikin kulpui inei khuaheia khan lei om riseh.

¹⁸Israel mi tinin an ram chuan rang an lua chit mâkah chu kin in tiang kîr no ning ung.

¹⁹Kin lua rang chu hi tiang Jordan nisua tiang pang a nit sikin Jordan râl kiang tiang pang neh a khêl tiang chu luapui no ning ung e,” an ti a.

²⁰Mosia khan an ziangah, “Khangkan nin iti tak tak a nitin chu PUMAPA maah ridoina fe rangin risiam diam rei.

²¹Nin lâia râlkâp mi murdi chu Jordan râl kiang tiang pang kâi nin ta, PUMAPA khan irâlhei khah a ûmsuak a, ram khah â nê vang mâkah PUMAPA ruaina nuaiah ei irâlhei khah nin doi rang a nit.

²²Ram khah ilah zoi riai a nit ten a, nin hong ikîr nôk a nit bangin, PUMAPA chungah neh Israelhei chungah thiam nin ichang a nit; hi ram khom hih PUMAPA khan nin lua rangin ṭha ti ngêt a ti.

²³Khannisela, nin ṭonginkung angkan nin tho non chu, PUMAPA chungah thil nin ithonsual nîng a ta; nin sualna sikin nin ituang ngêt rang a nit.

²⁴Khasikin, nin nainetehei rang kulpui inei khuahei siam unla, nin berahei rang rikul siam rei; khannisela, nin ṭonginkung angkah khan nin tho rang a nit,” a ti a.

²⁵Gada namhei neh Reubena namhei khan Mosia ziangah, “Epu, ni thupêk angkah takin thông kin ti.

²⁶Kin nupuihei, kin naihei neh kin ran murdihei chu Gilead ram khuaheiah hin lei om an ta;

²⁷keini chu PUMAPA ruaina nuaiah ridoinaa fe rangin kin irsiam diam a nit. Ni ti lam angkah takin Jordan râl chu kâi kin ta, irâl doi kin ti,” an ti a.

²⁸Khanchu, Mosia khan an chungchâng thu-ah khan thiampu Eleazara neh Nuna naipa Josua neh Israel nam ruaituhei khah thu archa a,

²⁹“Gada namhei neh Reubena namhei ridoi ranga rifo murdihei hin Jordan nangni an rikanpui a, PUMAPA ruaina nuaiah irâl nangni an doipui a, ram kha nin inen chu Gilead ram hih an lua rangin nin pêk rang a nit.

³⁰Khannisela, Jordan hong rikan loi a, irâl nangni an doipui non chu Kanan ramah, nin lâiah, dongtum nin pêk sa rang a nit,” a ti a.

³¹Gada namhei neh Reubena namhei khan, “Epu, PUMAPA thupêk angkah takin thông kin ti.

³²PUMAPA ruaina nuaiah Jordan râl ikâiin Kanan ram lût kin ta, irâl khah doi kin ti; khan kin lua rang ram kha chu Jordan nisua tiang pang ram hi ni mai riseh,” itin an sâm a.

³³Mosia khan Gada namhei neh Reubena namhei neh Josefa nai Manasea nam rizâtkahei khah Amor rêng Sihona neh Basan rêng Oga ram khah an khopui murdi neh a kôlvêl ram murdi khah a pêk a.

³⁴Gada namhei khan kulpui inei khua: Dibon, Atarot, Aroer,

³⁵Atirot-Sofan, Jazer, Jogbeha,

³⁶Beth-nimra, Beth-Haran khuahei kha an inding ṭhat nôk a, bera rikulhei khom an siam a.

³⁷Reubena namhei khan Hesbon, Eleale, Kiriathaim,

³⁸Nebo, Baal Meon (arming ithleng tâk a nit) neh Sibma khuahei khah an inding ṭhat nôk a. An khopui inding ṭhat nôkhei kha riming ithar an be a.

³⁹Manasea naipa Makira panamhei khan Gilead ram khah an rûn a, an lâk a, khantaka om Amor mihei khah an ûm isua a.

⁴⁰Khanchu, Mosia khan Gilead ram kha Makira panamhei a pêk a, kha munah khan an om tâk a.

⁴¹Manasea nai ngir Jaira khan khantaka khua ṭhenkahei khah a va rûn a, a va lâk a, “Jaira khuahei,” a be tâk a.

⁴²Noba khom khan Kenat neh a kôlvêl khuahei a rûn a, a va lâk a, ama riming riputin Noba a be tâk a.