Read Biete RITEPNA 33 Bible Online

RITEPNA 33 - Biete bible

RITEPNA 33

¹Mosia neh Arona ṭhui ruaina nuaiah Israela richihein Aigupta ram ata a nam namin an suak a, an inzin dân chu hingka hin a nit.

²PUMAPA thupêkin, an inzinna mun, riabuk an siamna tin khah Mosia khan arziak a; an fena lampui chu hingka hin a nit.

³Israela richihei khan thla khatna, a sûn sômleiringaka nî Kalkan Kût masatak an mang nî tûkah khan Aigupta ram khah Rameses khopuia rithokin Aigupta mihei mu chung ngêiah khan an suak zun zun a,

⁴Aigupta mihei lak chu an nai lutîr PUMAPA ithat pêkhei iphûmin an buai a, PUMAPA khan hi thilhei ai thoah hin, ani chu Aiguptahei pathian khomin ai ngam ino a nit iti a înlang a nit.

⁵Israela richihei khah Rameses ata an suak a, Sokotah riabuk an khuar a.

⁶Sokot ata an suak a, ramchâr tongtîra Ethamah riabuk an khuar a.

⁷Etham ata an suak a, Baal-Zefon kôla Pi-Hahirot tiang an rikual a, Migdol kôlah riabuk an khuar a.

⁸Pi-Hahirot ata an suak a, Tuipui Sen an rikan a, Sur ramchâr an lût a; Sur ramchârah sûn thumka lam an lôn nungin Mara-ah riabuk an khuar a.

⁹Mara ata an suak a; tuipût sômleiinikah neh itûm kung sômsarika omna mun Elim an tlung a, amakhan riabuk an khuar a.

¹⁰Elim ata kha an suak a, Tuipui Sen rikamah riabuk an khuar a.

¹¹Tuipui Sen rikam ata kha an suak a, Sin ramchârah riabuk an khuar a.

¹²Sin ramchâr ata kha an suak a, Dopkaah riabuk an khuar a.

¹³Dopka ata kha an suak a, Alus-ah riabuk an khuar a.

¹⁴Alus ata kha an suak a, Refidimah riabuk an khuar a, kha munah khan mipuihei tui in rang ai om ino a nit.

¹⁵Refidim ata kha an suak a, Sinai ramchârah riabuk an khuar a.

¹⁶Sinai ramchâr ata kha an suak a, Kibrot-Hatavaah riabuk an khuar a.

¹⁷Kibrot-Hatava ata kha an suak a, Hazerotah riabuk an khuar a.

¹⁸Hazerot ata kha an suak a, Ritmaah riabuk an khuar a.

¹⁹Ritma ata kha an suak a, Rimon-Perezah riabuk an khuar a.

²⁰Rimon-Perez ata kha an suak a, Libna-ah riabuk an khuar a.

²¹Libna ata kha an suak a, Risaah riabuk an khuar a.

²²Risa ata kha an suak a, Kehelathaah riabuk an khuar a.

²³Kehelatha ata kha an suak a, Sefer tlângah riabuk an khuar a.

²⁴Sefer tlâng ata kha an suak a, Harada-ah riabuk an khuar a.

²⁵Harada ata kha an suak a, Makhelotah riabuk an khuar a.

²⁶Makhelot ata kha an suak a, Tahatah riabuk an khuar a.

²⁷Tahat ata kha an suak a, Tera-ah riabuk an khuar a.

²⁸Tera ata kha an suak a, Mitka-ah riabuk an khuar a.

²⁹Mitka ata kha an suak a, Hasmonaah riabuk an khuar a.

³⁰Hasmona ata kha an suak a, Moserotah riabuk an khuar a.

³¹Moserot ata an kha suak a, Bene-Jakanah riabuk an khuar a.

³²Bene-Jakan ata kha an suak a, Hor-Hagidgadah riabuk an khuar a.

³³Hor-Hagidgad ata kha an suak a, Jotbata-ah riabuk an khuar a.

³⁴Jotbata ata kha an suak a, Abronah riabuk an khuar a.

³⁵Abrona ata kha an suak a, Ezion-Geberah riabuk an khuar a.

³⁶Ezion-Gebera ata kha an suak a, Zin ramchârah riabuk an khuar a, (amakhah Kades an ti sa ngai.)

³⁷Khante, Kades ata kha an suak a, Edom ram idepsek Hor tlângah khan riabuk an khuar a.

³⁸Thiampu Arona khah PUMAPA thupêkin Hor tlângah khan a hang fe a, Israela richihei Aigupta ram ata an hong suak kum sômilina, a thla ringana, a sûn khatnî-ah khan hi tlângah hin ai thi tâk a nit.

³⁹Arona kha Hor tlânga a thiah khan kum rizalei sôminika ithumkah a nit.

⁴⁰Kanan ram sim tianga omhei, Kanan mi, Arad rêng khan Israela richihei hong khah a lei riat a.

⁴¹Hor tlâng ata kha an suak a, Zalmonah riabuk an khuar a.

⁴²Zalmon ata kha an suak a, Punonah riabuk an khuar a.

⁴³Punon ata kha an suak a, Obotah riabuk an khuar a.

⁴⁴Obot ata kha an suak a, Moab ramrî dep Ije-Abarimah riabuk an khuar a.

⁴⁵Ije-Abarim ata kha an suak a, Dibon-Gadah riabuk an khuar a.

⁴⁶Dibon-Gad ata kha an suak a, Almon-Diblathaimah riabuk an khuar a.

⁴⁷Almon-Diblathaim ata kha an suak a, Nebo tlâng kôla Abarim tlângheiah khan riabuk an khuar a.

⁴⁸Abarim tlânghei ata kha an suak a, Jeriko ridîn Jordan rikam Moab phâizôlah riabuk an khuar a.

⁴⁹Jordan rikam, Moab phâizôlah khan Beth-Jesimota rithoka Abel-Sitim idênin riabuk an khuar a.

⁵⁰Jeriko ridîn, Jordan rikam, Moab phâizôlah PUMAPA khan Mosia ziangah,

⁵¹“Israel mihei iril roh: Jordan dung nin rikan a, Kanan ram nin lût tikin chu,

⁵²kha rama om murdihei khah nin ûmisua vang rang a nit. An lung mirmil murdihei neh an mirmil inluanhei murdi iseh pêk riai rang a nit; an bôlkuanghei khom nin isiat pêk vang rang a nit.

⁵³Ram khah luang nin ta, khan om nin ti; nin lua ranga ram khah nangni kî pêk chu a nit.

⁵⁴Nin panam tam dân izirin thlasânin ram khah nin risem rang a nit, a panam itam ualhei khah ram rizat ual pêng nin ta, a panam iroi ualhei khah ram ichîn ual nin pêk rang a nit. Thlasâna a chuk lam tak khah nin dongtum ram nîng a ta, nin lua rang a nit.

⁵⁵Khannisela, kha rama omhei khah nin ûmisua nuam non chu, nin lai zuahei khah nin mit idoitu inim nîng an ta, nangni sun mai an ti. Nin ramah khan lungzîng nangni an isak mai rang a nit.

⁵⁶Nin ûmisua vang noa a nitin chu anni inrimang rang kî tum angkah khan nangmani nangni inrimang ki ti, ti roh,” a ti a.