Read Biete RITEPNA 34 Bible Online

RITEPNA 34 - Biete bible

RITEPNA 34

¹PUMAPA khan Mosia ziangah,

²“Israela richihei khah iril roh: Ram nangni kî pêk Kanan ram nin lût tikin ramrî rang chu hingka hin nîng a ti.

³Sim tiang ramrî khah Zin ramchâr ata Edom ram sun a ti, sak tiang ramrî kha Tuipui Ithi mong ata riphut a ta;

⁴sim tiang pangah ikôiin Akrabim fena ṭumah ife thalin Zin ramchâra Kades-Barnea suak a ti. Khanungchu, mâr tiang kôi nôk a ta, Hazar Adarah fêng a ta, Azmona fe thal a ti.

⁵Khantak ata khah Aigupta ramrî phâizôl tiang kôi a ta, Mediteranean tuipui sun a ti.

⁶“Thlang tianga nin ramrî chu Mediteranean tuipui nîng a ti.

⁷“Mâr tianga nin ramrî chu Mediteranean tuipui ata Hor tlâng idênin fêng a ta,

⁸khantak ata Hamath fena ṭumah fe thal a ta, Zedad-ah suak a ta,

⁹Zifronah fe thal a ta, Hazar-Enanah mong a ti.

¹⁰“Sua tianga nin ramrî chu Haza-Enan ata Sefam idênin fe thal a ta,

¹¹khantak ata kha sim tiang ikôiin fe thal a ta, Ain sak tiang Ribla panin fêng a ta, Galili dîl sak tiang tlâng pangah zuk fe thal a ti.

¹²Khante, ramrî khan Jordan dung rûl thal a ta, Tuipui Ithi-ah khan zu mong a ti. “Hihei hih nin ram kil ilika ramrî chu nîng a ti,” a ti a.

¹³Mosia khan Israela richihei ziangah, “Hi ram hih a nit thlasâna nin risem rang ram, nam ikuakkah neh arzâtkahei zianga PUMAPA ipêk ram chu a nit.

¹⁴Reubena namhei neh Gada namhei neh Manasea nam rizâtkahei khomin an panam tam dân izirin an ram lua rang khah an risem tâk a,

¹⁵Jordan dung râl, Jeriko ridîn, sak tiang ram khah an ilua tâk a nit,” a ti a.

¹⁶PUMAPA khan Mosia ziangah,

¹⁷“Thiampu Eleazara neh Nuna naipa Josua khan mipuihei lua rang ram khah an sem pêk rang a nit. Ram semnaa, an risanpui rangin nam tina rithokin ruaitu khatkah chit rithlang sa rang a nit,” a ti a.

¹⁸PUMAPA irthlang mihei chu hihei hih an nit: Juda namah Jefunea naipa Kaleba; Simeona namah Amihuda naipa Selumiela; Benjamina namah Kislona naipa Elidada; Dana namah Joglia naipa Bukia; Manasea namah Efoda naipa Haniela; Efraima namah Siftana naipa Kemuela; Zebuluna namah Parnaka naipa Elijafana; Isakara namah Azana naipa Paltiela; Asera namah Selomia naipa Ahihuda; Naftalia namah Amihuda naipa Pedahela;

²⁹Hi mihei hih Kanan rama Israela richihei lua rang ram isem ranga PUMAPA khan thu ai pêkhei chu an nit.