Read Biete RITEPNA 36 Bible Online

RITEPNA 36 - Biete bible

RITEPNA 36

¹Josefa richi, Manasea nai, Makira naipa Gileada panama ruaituhei khah Mosia neh ruaitu danghei ziangah an hong a,

²anni khan, “PUMAPA khan Israela richihei khah thlasâna an lua rang ram isem pêk rang thu nang a pêk a. PUMAPA khan kin suapuipa Zelofehada dongtum khah a nainuhei ipeh rangin thu nang a pêk sa a.

³Khannisela, anni khan Israela richihei lâia mi, nam dang tukhom pasalin nei sela, kin pi neh puhei ram an ilua khah an pasalhei nam khan dong an ta, khangkan kin ram dong khah lep inchîn ai nit rang a nit.

⁴Israela richihei ranga Jubili kum a hong tlung tikin kha ram khah kin ramah ikhop ni loiin an pasalhei nam ramah ikhop rang ni tâng a ta, khangkan kin pi neh puhei nam ram dongtum khah kin îchân thal rang tâk a nit,” an ti a.

⁵Khanchu, Mosia khan PUMAPA thupêk kha Israela richihei khah â ril a, “Josefa richihei hin an itîn dik a nit.

⁶Zelofehada nainuhei chungchânga PUMAPA thupêk chu hingka hin a nit: An panam lâia mi bang pasalin ṭha an iti tak nei thei an ti.

⁷Khanchu, Israel nam khatka ram khah nam dang dang ramah ithon thei ni no nih. Israelhei khan an pi neh puhei nam ram kha, kha namhei ngêi khan an dong mai rang a nit.

⁸Israela richihei lâia richon luatu rang nai nupang murdi chu an pi neh puhei ram an lua chit mai theina rangin a ram ineitu nam lâia mi ngêt pasalin an nei rang a nit.

⁹Nam khatka ram khah nam dang ramah ithon rang ni mak a, mahni nam ram kha an dong thal ngêt rang a nit,” a ti a.

¹⁰Mosia zianga PUMAPA thupêk angkah khan Zelofehada nainuhei khan an tho a.

¹¹Malaii, Tirzaii, Hoglaii, Milkaii, Novaii hei khan an pa chipuihei khah pasalin an nei tâk a.

¹²Josefa nai, Manasea nam sunga mihei kha pasalin an nei a, an ram kha an pahei ram ai nit thal mai tâk a nit.

¹³Moab phâi, Jeriko ridîn, Jordan dung rikamah hi thupêkhei neh dânhei hih Israelhei ta ranga Mosia zianga PUMAPA ipêkhei chu a nit.