Read Biete RITEPNA 4 Bible Online

RITEPNA 4 - Biete bible

RITEPNA 4

¹PUMAPA khan Arona neh Mosia ziangah,

²“Levia chihei lâia Kohatha panamhei a rui ruiin neh a insungkua kuaa thleiin,

³ipa kum sômithumka ata kum sômringaka sunga mi Ritongna Puan-Ina sin itho thei rang murdi riming riziak suak riai rei.

⁴Ritongna Puan-Ina Kohatha richihei sin tho rang chu thil rithiang takhei ienkol a nit.

⁵“Riabuk rithon rang zoro kipah Arona neh a naipahei khah Puan-In sungah lût an ta, Mun rithiang puanzâr khah lîp an ta, amakhan Thuthlung bôm khah an rikhû rang a nit.

⁶Kha chungah khan savun iṭha chin rikhû nôk an ta, a chung taka puan dum rikhû an ta; khanchu, a zônfung an ikhop rang a nit.

⁷“Ibai iser siana docham chungah khan puan dumpôl dâp an ta, amakhan khêng hei, namhoi bêl hei, berbu hei, rihûm hei, uain lanna kuritung neh a bun suakna rang kilâthei an sia rang a nit. Risam tlak loia ibai iser docham chunga an isia ngai khah amakhan an sia rang a nit.

⁸Khahei khah puan sendukin rikhû an ta; a chungah khan savun iṭha chi rikhû nôk an ta, a zônfung an ikhop rang a nit.

⁹“Meiser siana neh a meiser hei, a châiche hei, meiluakkhêng hei, riak bûr murdihei khah puan dumpôlin an rikhû rang a nit.

¹⁰Kha mangrua murdihei khah savun iṭha chi rikhû an ta, an rizônna rangah khan an sia rang a nit.

¹¹“Rângkachaka inluan mâichâm khah puan dumpôlin rikhû an ta, savun iṭha chin rikhû nôk an ta, a zônfung an ikhop rang a nit.

¹²Mun rithianga mangrua bûrbêlhei murdi chu la vang an ta, puan dumpôlin ifûn an ta, savun iṭha chi rikhû an ta, an rizônna rangah khan an sia rang a nit.

¹³Mâichâma mei rivâm khah luak infâi an ta, a chungah puan senduk rikhû an ta,

¹⁴a chungah khan mâichâma sinthona mangrua murdi: meilâkna hei, sa thurna kuaikim hei, vutluak hei, tâbor hei khah siang an ta; savun iṭha chi rikhû an ta, a zônfung an ikhop rang a nit.

¹⁵“Riabuk rithon rang fengin Arona neh a naipahein hi mangrua neh bûrbêl rithianghei murdi hih an rikhû zoi tenan Kohatha panamhei khan an rizôn ngai rang a nit. Nikhomsela, thil rithianghei khah an tôn rang ni mak, an tônin chu an ithi rang a nit. “Khahei khah Ritongna Puan-Ina Kohatha panamhei sintum rang chu a nit.

¹⁶“Meisera chok rang riak hei, namhoi hei, risam loia ibai iser thillan hei, rithu rua riak hei, biakbûk pumpui neh a sunga thil iom murdi, PUMAPA ranga serinranhei chu Thiampu Arona naipa Eleazara kuta om a nit,” a ti a.

¹⁷PUMAPA khan Arona neh Mosia â sôn a, an ziangah,

¹⁸“Kohatha panamhei chu Levia chihei lâi ata an rimang vang nona rangin hingka hin tho rei.

¹⁹Thil rithianghei hih an tôn duai a, an thi riai nona rangin Arona neh a naipahei khan an tho rang neh an rizôn rang chit khah an inmu ngai rang a nit.

²⁰Khannisela, Kohatha richihei khan Puan-In an lût a, thiampuhein thil rithiang rizôn ranga an inrifûk lâi an en duaiin chu an ithi rang a nit,” a ti a.

²¹PUMAPA khan Mosia ziangah,

²²“Levia richihei lâia Gersona panamhei khom a rui ruiin neh a sungkua kuan ithlei inla,

²³ipa kum som ithumka ten ata kum sômringaka ten kâra mi, Ritongna Puan-Ina sin itho thei tâk murdi tep inla, an riming riziak suak riai roh.

²⁴Annihei sintum chu hi thilhei ipêl neh rizôn hih a nit:

²⁵Puan-Ina puanzâr hei, a chung rikhûna hei, a chung inrithuana hei, arkhûna savun iṭha chi hei, a kotbâi puanzâr hei,

²⁶Puan-In neh mâichâm tual rikulna puanzâr hei, a tualzôl lûtna kotbâi puanzâr hei, ruihei neh hihei inrifomna ranga mangrua murdihei ipêlin rizôn an ta, hi thilhei chungchânga ithorua murdi chu an tho rang a nit.

²⁷Arona neh a naipahein sintum an înkung pêk neh pêltum an iti pêk murdi chu Gersona panamhei khan an tho rang a nit a, khahei ibîk pêk rangin thu nen nei rang a nit.

²⁸Khahei khah Ritongna Puan-Ina Gersona panamhei mophurna a nit; thiampu Arona naipa Ithamara ruaina nuaiah thiltinrêng an tho rang a nit.

²⁹“Meraria panamhei chu, a rui ruiin, a sungkua kuan ithlei inla,

³⁰ipa kum sômithumka ten ata kum sômringaka ten kâra mi, Ritongna Puan-Ina sin itho rang tâk murdi tep inla, an riming riziak suak riai roh.

³¹Ritongna Puan-Ina an sintum rang chu hihei hih a nit: Puan-In mangrua thingphêk inribuhei, bangruhei, chopuihei, a bul inṭhungnahei,

³²Puan-In tual rikulna chopuihei, a bul inṭhungna hei, â kildetna hei, a ruihei neh a mangrua murdihei ipêl neh rizôn a nit. Mi tin pêl rang riming isâm chitin a pêltum indang pêk rang a nit.

³³Khahei khah Meraria panamhei tho tum chu a nit. Thiampu Arona naipa Ithamara ruaina nuaiah an tho ngai rang a nit,” a ti a.

³⁴PUMAPA thupêk angkan Mosia hei, Arona hei neh mipui ruaituhei khan Levia chi panam ithumkahei Kohatha panam hei, Gersona panam hei neh Meraria panam hei riteppui chu an nei a. Riteppui khah a rui ruiin, a sungkua kuan an tep a, ipa kum sômithumka ten ata kum sômringaka ten kâra mi Ritongna Puan-Ina sin itho thei murdi chu an tep riai a. An tam dân chu hingka hin a nit: Kohatha panamah mi sânginikah rizasarikah sômringakah an nit; Gersona panamah mi sânginikah rizarukkah sômithumkah an nit; Meraria panamah mi sângithumkah rizanikah an nit; an rêngkan mi sângiriatkah rizarngakah sômiriatkah an nit.

⁴⁹Mosia zianga PUMAPA thupêk angkan Mosia khan mi tin riming ân chuang chit a; mi tin an tho rang neh an pêltum chit a înkung pêk riai a nit.