Read Biete RITEPNA 5 Bible Online

RITEPNA 5 - Biete bible

RITEPNA 5

¹PUMAPA khan Mosia ziangah,

²“Israela richihei chu iril roh, iphâr murdi hei, an taksaa thil isuak inei murdi hei neh mithi ruak tôn sika nimhei murdi chu riabuk ata an isua riai rang a nit.

³Khangkana inimna neihei chu ûmisua riaiin dâiputiang nin sia rang a nit; riabukah khan kei khom kî om ngai a nit a, riabuk khah an innim duai lôiin,” a ti a.

⁴Israel mihei khan Mosia zianga PUMAPA thu sîr khah an zôm a, riabuk ata ûmisua paiin dâiputiang an sia tâk a.

⁵PUMAPA khan Mosia ziangah,

⁶“Israela richihei chu iril roh, PUMAPA chungah iamom loiin tukhomin mi chungah thil ṭhano tho sela, thupha a chôi rang a nit.

⁷A thonsual man chu rikip takkan a thung rang a nit a, khabanah a bâk ringaka ṭhena bâkkah a thonsualna pa khah a pêk sa rang a nit.

⁸Khannisela, siat man lei itêltu rang khah a thi tâk a, suapui ngamsunga mi a lei idong thei rang a nei non chu, siat man khah thiampuhei dongtum rangin PUMAPA ziangah ilan rang a nit. Amahih sual ribôlna thillan berachal bana ipeh rang a nit.

⁹Israela richihein khangkana thilpêk khah an hong lanin chu a lei idongtu thiampu dongtum nîng a ti.

¹⁰Thiampuhei khan thillan an lei idong rêng rêng chu anmani ta rang ai nit rang a nit,” a ti a.

¹¹PUMAPA khan Mosia ziangah,

¹²“Israela richihei chu hingka hin iril roh: Pasal tukhomin a nupui khah ama chungah iamom loiin, mi dangin an izâlpuia, an ichâipuia ben îk khap ta sela; nikhomsela, a pasal khan chu rianfel ual mak a, a nupui khan ai ip khap khom a nit theia, khan a châi ngêt iti riatpuitu om ual mak a, iman suak khom ni ual ino, a pasal khan a sabei sei ngit ta sela manih, anitnole a pasal thîkthu siat sikin a nupui châi viat ino khah îk khap ta selan manih chu,

¹⁵kha mi khan a nupui khah thiampu ziangah ṭhui a ta, barli baidi herkah ilan ngai ranga bituk zâk kha, siriak ṭang iloiin, namhoi khom ṭang loiin a hong chôi sa rang a nit; amakhah nupui sabeisei ikâihei fiana rang thillan, an pasalhein an hong chôi rang chu a nit.

¹⁶“Thiampu khan nupang khah matiang hong ṭhui a ta, PUMAPA mâichâm maah inding a ta;

¹⁷ipil bêlin tui rithiang sung a ta, Puan-In iṭuanga pilvut khah isôk a ta, tuiah khan a phul rang a nit.

¹⁸Thiampu khan kha nupang sam khah sût pêk a ta, îk sika fiana rang baidi thillan ichînkah kha ân fûn rang a nit. Thiampu khan vânisalna thluntu tui ikhâ bêl khah a kutin a chôi rang a nit.

¹⁹Khanungchu, thiampu khan nupang khah vâni inrisâm a ta, nupang ziangah khan, ‘Mi dang tutên nang an zâlpui no a, ni pasal chungah thil porinche ni tho tlak non chu vânisalna thluntu hi tui ikhâ ata hih nî zôk a nit.

²⁰Khannisela, ni pasal ata kho dang ingata ni lei porinchea, ni pasal ni no mi dangin nang a zâlpui tâkin chu zôk no tin e.

²¹PUMAPA khan ni chipuihei lâiah vânisalin nang siam riseh.

²²Hi vânisalna thluntu tui hih ni phûngah a lûtin, ni phûng indil sela, ni malpui kâr inzûr riseh,’ a ti rang a nit. “Nupang khan, ‘Amen, Amen,’ a ti rang a nit.

²³“Khanungchu, thiampu khan hi vânisâmna thuhei hih riziak a ta, kha a irziakhei khah tui ikhâah khan risûnfâi a ta,

²⁴a phûng innah zel thei tui ikhâ khah ân in maah khan,

²⁵îk sika fiana rang thillan baidi nupang kuta a înfûn khah thiampu khan lah pêk a ta, PUMAPA maah ilanin vai a ta, mâichâmah chôi a ti.

²⁶Khanungchu, thiampu khan baidi thillan khah a rêngkan ilan a nit iti entîrnan ichînkah a kutin isôk a ta, mâichâmah khan hâl a ti. Kha rizoiah khan nupang khah tui chu ân in rang a nit.

²⁷Nupang khan tui a hang in tenan chu hingka hin hong nîng a ta; a lei porinche a, a pasal chungah thil a lei ithonsual a nitin chu vânisalna thluntu tui ikhâ khah a sung a lût kaneh nat rikhêl tak tuang a ta, a phûng hong indil a ta, a malpui kâr hong zûr a ta; khanchu, nupang khah a chipuihei lâiah vânisal hong ni tâng a ti.

²⁸Khannisela, nupang khah a porinche no a, arthiangin chu îte ti no nia, nai la vong thei mai a ti.

²⁹“Hingka hin nupui, a pasal chungah iamom loia, kho dang ingat a, a pasal ni no mi dang neh ichâihei chung thu rêl rang dân chu a nit.

³⁰A pasalin mi dang neh a nupui khah a îk ngêt tâkin chu thiampu khan nupang khah PUMAPA maah inding a ta, hi thilhei hih a lei tho rang a nit.

³¹A pasal kha chu idik no khom sela tuang no nia, khan nupang khan chu a tuang rang a nit,” a ti a.