Read Biete RITEPNA 6 Bible Online

RITEPNA 6 - Biete bible

RITEPNA 6

¹PUMAPA khan Mosia ziangah,

²“Israela richihei chu hingka hin iril roh: Ipân manih, nupangin manih Nazarithei[2] ṭonginkung angkana ṭonginkungna neia PUMAPA ta rangin arlanin chu,

³uain neh zu rêng rêng a ngei rang a nit. Uain thûr neh zu thûr khom a in rang ni mak a, grep tui khom a in rang ni mak, grep irâ khom, â thar manih phoi inchâr manih khom a fâk rang ni mak.

⁴Nazarit ṭonginkunga arser inran sungkah chu grepa rithoka siam rêng rêng a fâk rang ni mak a, a ru neh arkôl tak khom a fâk rang ni mak.

⁵“Nazarit ṭonginkunga arkhuap sung kârkah chu a sam a ep rang ni mak a, arkhamul khom a voi rang ni mak. PUMAPA ta ranga arlan sungkah chu ser inran ai nit a nit; a sam a zuan, arkhamul khom a zua rang a nit.

⁶PUMAPA ta ranga arser inran sungkah chu mithi ruak a tôn rang ni mak.

⁷A nu neh a pa ruak khom, a urênghei ruak khom itônin innimin a om rang ni mak, Pathian ta ranga arser inranna khan ai khuap a nit.

⁸Nazarit mi a nit sungkah chu PUMAPA ta ranga serinran a nit.

⁹“A kôlah mi thi thut sela, a ruakin a sam khah itôn duaiin innim sela, sûn sarikah ngâk a ta; khanungchu, a sam kha voi inkol vang a ta, arkhamul khom voi a ta; khanchu, thâr inrithiang ai nit rang a nit.

¹⁰A sûn iriatnî-ah khan vaṭhu bopka manih, pharvali bopka manih Ritongna Puan-In kotbâiah thiampu ziangah a hong chôi rang a nit.

¹¹Thiampu khan khatkah kha sual ribôlnan lan pêk a ta, khatkah kha hâlrivâm thillanin hâl a ti, mithi ruakin a tôn sika rithârna khah siam pêk a ti. Kha nî ngirah khan a sam chu a lan thar nôk rang a nit.

¹²Nazarit mi rangin PUMAPA ziangah rilan inthar nôk a ta, Siat ribôlna thillanin berachal tuai kumka mi hong lan a ta, matona Nazarit a nitna khah innim a nit tâk sikin kha serinrana a lei om sung kha chu tepboi ai chang rang tâk a nit.

¹³“Nazarit mi khan ama riser inranna sûnbi â tluk tenan chu hihei hih a tho rang a nit. Ani khah Ritongna Puan-In kotbâiah hong a ta,

¹⁴PUMAPA ta ranga thillanin hihei hih a hong chôi rang a nit: hâlrivâm thillan rang berachal tuai, kumka mi, demnaboi khatkah hong chôi a ta; sual ribôlna thillan rangin berate apui, kumka mi, demnaboi, khatkah hong chôi a ta; ringeina thillan rangin berachal, demnaboi, khatkah a hong lan rang a nit.

¹⁵Khabanah, bubâl thillan rangin chol pol ino bairiam khamlukah; baidi ṭha chia siam, oliv riak neh met inripol ibai lûm neh oliv riak inâl ibaithliam riphânhei khah iin rua thillanhei neh khan an lan rang a nit.

¹⁶“Hihei murdi hih thiampu khan PUMAPA maah hong chôi a ta, sual ribôlna thillan neh hâlrivâm thillan khah lan a ti.

¹⁷Berachal khah Ringeina thillanin lan a ta, kha rualah khan bubâl thillanin khamlua chol pol ino baihei kha iin rua thillan uain neh khan PUMAPA ziangah lan a ti.

¹⁸Khante, Nazarit mi khan a sam iser khah Ritongna Puan-In kotbâi bulah khan voi inkol a ta, Ringeina thillan lannaah khan a hâl rang a nit.

¹⁹“Khanungchu, thiampu khan berachal dâr but inmin neh khamlua chol pol ino bailûm khatkah neh baithliam khatkah kha lâng a ta, Nazarit mi kut chungah khan a pêk rang a nit.

²⁰Kha rizoiin chu, thiampu khan ngaihoi thillanin PUMAPA maah khahei khah lan a ta; amahih thiampu dong rang nîng a ta, thiampu dongtum pial ngaihoi thillana ipeh ngai a lung-er neh a malpui bana a dong rang a nit. Kha rizoiin chu Nazarit mi khan uain in thei tâng a ti.

²¹“Hihei hih Nazarit mi tho ranghei chu a nit; khannisela, kha mi khan itho rang bituk nêka tam thillan PUMAPA ziangah ipe a lei inkung tâkin chu, ân kung lam angkah takin a tho ngêt rang a nit,” a ti a.

²²PUMAPA khan Mosia ziangah,

²³“Arona neh a naipahei iril roh, hingka hin Israela richihei chu ṭhat an vur rang a nit:

²⁴“PUMAPA khan ṭhat nangni vurin nangni donsui mai riseh.

²⁵PUMAPA khan a mêl chu nin chungah invâr sela, lung nangni inkham mai riseh.

²⁶PUMAPA khan nin tiang mâi ngat sela, thlangamna nangni peh riseh.

²⁷“Khangkah khan Israela richihei chungah ṭhatvurnan ker ming an chingin chu keiman ṭhatvur ki ti,” a ti a.