Read Biete RITEPNA 8 Bible Online

RITEPNA 8 - Biete bible

RITEPNA 8

¹PUMAPA khan Mosia ziangah,

²“Arona kha meiser â chokin a meiser sarikah khan matiang a el pam rang lam takkan a sia rang a nit iti iril roh,” a ti a.

³Arona khan a zôm a, meiser khah matiang isongin a sia tâk a.

⁴Meiser siana khah a ngul bul ata â ṭanghei, a pâr rilim murdi neh khan rângkachaka inluan a nit; PUMAPA khan Mosia zianga arlim ân mu lam angkah taka meiser siana khah isiam a nit.

⁵PUMAPA khan Mosia ziangah,

⁶“Levia chihei chu Israela richihei lâi ata inran inla,

⁷hingka hin thâr roh: An chungah thârna tui[3] rithe inla, an tak pumpui mul voi infâi sela, an puanhei risûnfaiin tui risil riseh; khanchu, thâr inrithiang chang an ti.

⁸Khanungchu, serâtchal tuai khatkah neh a ruala lan sa rang bubâl thillan rangin baidi ṭha chi oliv riak neh met inripol hong chôi sela; sual ribôlnan serâtchal dang nangman ni hong kâi sa rang a nit.

⁹Khanungchu, Israel mipui murdi koi bûm inla, Levia chihei chu Ritongna Puan-In maah khan nen ngîr rang a nit.

¹⁰Levia chihei, PUMAPA ziangah ni lan lâiin Israela richihei khan Levia chihei lu-ah khan an kut an ringat rang a nit.

¹¹Khanchu, PUMAPA sinthotu an nit theina rangin Arona khan Levia chihei khah Israela richihei lâi ata khah ki ta inih rangin Ngaihoi thillanin PUMAPA ziangah a lan rang a nit.

¹²Levia chihei khan serâtchal inika ruai lu-ah khan an kut ringat an ta; an ribôlna rangin sechaltuai khatkah khah sual ribôlna thillanin a lan pêk rang a nit, sechaltuai dang khatkah kha hâlrivâm thillanin a lan rang a nit.

¹³“Levia chihei chu Ngaihoi thillanin ki ziangah lan ni ta, Arona neh a naipahei iruaina nuaiah ni sia rang a nit.

¹⁴Israela richihei lâi ata Levia chihei chu serinran ni ta; khanchu, ki ta an init rang tâk a nit.

¹⁵Levia chihei khah ni thâr a, ni serinran zoi tenan chu Ritongna Puan-Ina sin itho thei inrup ni tâng an ti.

¹⁶Israela richihei nai lutîr, sûl iongtu, ki dongtumhei murdi rithûla ki rangtuma kî nei tâk an nit; anni neitu chu keimah bang ki nit.

¹⁷Aigupta mihei nai lutîr murdi ki that inrimang lâiah khan Israel mihei nai lutîr murdi neh an ran suak masatakhei kha chu ki ta rang bîka kî zua an nit.

¹⁸Atûn chu Israela richihei nai lutîr murdi rithûlin Levia chihei hih kî nei tâk a nit.

¹⁹Arona neh a naipahei kutke ranga an zianga Israelhei thilpêk an nit; Israel mihei rang Ritongna Puan-Inah khan sin thông an ta; Israel mihei khan Mun Rithiang an hong nâi rai a, an chungah thil ṭhano a tlung duai nona rangin Mun Rithianga vântlâng an fe rang khah anni hin lei khap ngai an ti,” a ti a.

²⁰Khanchu, Mosia zianga PUMAPA thupêk angkah khan Mosia neh Arona neh Israel mipui ribûmhei khan Levia chihei chu an serinran tâk a.

²¹Levia chihei chu tui an risil a, an puanhei an risûk a; Arona khan PUMAPA ziangah Ngaihoi thillanin anni chu a lan a, anmani thâr inrithiang nan sual ribôlna thillan khom a lan pêk a.

²²Levia chihei chungchânga PUMAPA thupêk murdi khah mipuihei khan an tho tâk a. Khanchu, Levia chihei kha Ritongna Puan-Inah khan Arona neh a naipahei nuaiah sin an tho tâk a.

²³PUMAPA khan Mosia ziangah,

²⁴“Kum sôminika ringakah an tlukin Levia chihei chu Ritongna Puan-Inah sin an tho chit rang a nit.

²⁵Kum sômringakah an kâi tenan chu an ringam rang tâk a nit.

²⁶Hi nungtiangah hin an Levi chipui, Ritongna Puan-In ienkola sin ithohei kha la san thei an ta; khanniseh, anmani tum bîkin chu îte an tho rang ni khâi mak e. Levia chihei sintho dân rang chu hingka hin ni rêl pêk rang a nit,” a ti a.