Read Biete RITEPNA 9 Bible Online

RITEPNA 9 - Biete bible

RITEPNA 9

¹Aigupta ram an hong mâk nung a kum inikna, a thla khatnaah khan Sinai ramchârah PUMAPA khan Mosia â sôn a, a ziangah,

²“Israela richihei khan hi thla a sûn sômleiilinî, ni tlâka rithokin Kalkan kût chu tho rang dân inkung thlâm iom angkah khan a zoro thapah khan nin mang rang a nit,” a ti a.

⁴Khanchu, Mosia khan Israela richihei kha Kalkan kût imang rangin â ril a.

⁵Khaangkan, Sinai ramchârah khan thla khatna, a sûn sômleiilinî kholoia rithokah khan Kalkan kût chu an mang tâk a. Mosia zianga PUMAPA thupêk angkah takin Israela richihei khan tinrêng an tho a.

⁶Khanniseh, mi ṭhenkahei, mithi ruak an tôn sika lei rithiang khâi ino an om a, kha mihei khan a nikhua takah khan chu Kalkan kût khah mang thei khâi mak a. Khanchu, Mosia neh Arona ziangah an fe a,

⁷khahei khan an ziangah, “Mithi ruak kin tôn a nang sikin kin irthiang ino a nit a; Israel mi danghei angkah ngirin PUMAPA ziangah thillan kin ilan sa thei ino rang im ai nit,” an ti a.

⁸Mosia khan an ziangah, “PUMAPA thu ki dong mâkah chu dâirek unla, lei ngâk hi rei,” a ti a.

⁹PUMAPA khan Mosia ziangah,

¹⁰“Israela richihei chu iril roh. Nin lâia mi manih, nin richihei lâia mi manih, mithi ruak an tôn sika rithiang ino manih, khualah a lei ithang manih nin om duaia; nikhomsela, Kalkan kût imang an nuam ngitin chu,

¹¹thlaka nungah, a thla nikna a sûn sômleiilinî kholoiah khan imang rang a nit. Kalkan kût bera sa khah chol pol ino bairiam neh palbob neh khan ifah rang a nit.

¹²A sa fâk bân khah atûk idênin îte izua rang ni mak a, a ruhei khom ikhiak viat rang ni mak e. Kalkan kût mang rang dân inkung thlâm iom angkah takin imang rang a nit.

¹³Khannisela, rithiang chakka, khual thangna nei khom ni ual loia Kalkan kût hi a mang nuam non chu a chipuihei lâi ata ûmisua rang a nit; a zoro thapah khan PUMAPA zianga thil lan khah a lan nuam no sikin kha mi khan thonsual mo chu pêl a ti.

¹⁴“Nin lâia om nam dangin Kalkan kût hi imang sa a nuamin chu mang rang dân inkung thlâm iom angkah khan a mang rang a nit. Hi rama mi rêng rêng, a ram mi neh ram dang mi, mang rang dân chu munkah ar-ang nat a nit,” a ti a.

¹⁵Ritongna Puan-In an inding zoi nî-ah khan, kha Puan-In khah sûmin a zuang rikhû a. Zânah chu Puan-In chungah khan sûm khah meichok angkana vârin a om a.

¹⁶Khangkah khan sûmin a tuam mai a, zânah mei angkana vâr khah a om mai a.

¹⁷Sûm khan Puan-In khah arkiang ikipah Israela richihei khan an riabuk an rithon a, sûm idingna kipah riabuk an ikhuar ngai a nit.

¹⁸PUMAPA thupêk angkah takin Israela richihei khan riabuk khah an rithona, a thu ngirin riabuk khah an ikhuar ngai a nit; sûm khan Puan-In arkhû sungkah chu an omna ngaiah an iom mai ngai a nit.

¹⁹Sûm khan isôt takka sung Puan-In khah arkhû khomin PUMAPA thu khah an zôm a, rithon ngai mak e.

²⁰A kârah chu sûm khan Puan-In khah sôt ino te bang arkhû khomin PUMAPA thupêk angkan riabuk khah an irthonin, PUMAPA thupêk angkan an irthon ino a nit.

²¹A kârah chu sûm khan zânkah bang, kholoia rithoka atûk zîng idên ten bang a om zoro a om a; sûm khah arlâng risâng kaneh an irthon mai ngai a nit.

²²Sûm khah sûnnika manih, thlaka manih, kumka manih, a nêka sôt ual manih khom Puan-In chungah a om sung kârkah chu an riabukah khan an om mai a, rithon ngai mak; khanniseh, sûm khah arlâng risângin chu an irthon ngai a nit.

²³Mosia zianga PUMAPA thupêk angkah takin riabuk an ikhuarin, riabuk an irthon ngai a nit.