Read Biete MIKA 2 Bible Online

MIKA 2 - Biete bible

MIKA 2

¹An khum lâizôla thil ṭhano ngaituatuhei neh thil ṭhano tho tumtuhei chu an chung ân khôk vang na! Zîngah khua a hong vârin an tum lam angkah takin zoron ṭum an mu kaneh thil ṭhano an tho a.

²Mi loimunhei an rizuk a, an lâk pêk a; inhei an rizuk a, an sut pai zel a. Mi danghei insungkua an nuam an lo a, an richonhei khom îte ihoih pêk ngai mak.

³Khasikin, PUMAPA khan, “Nin chungah thil ṭhano thlun rangin ki ngaitua a; khantaka rithokah khan zôk tlak no tin u; ripâk takkan lôn thei khâi no tin u, buaina zoro ṭhano tak nin isik rang tâk a nit.

⁴Kha zoro tenan chu nangmani phengsanin ṭâ la peitem iom tak phua an ti: Inram chitin ei om tâk e! PUMAPA khan ei ram kha a lâk inrimang a. Suaka ne ṭhuihei ziangah khan ai pêk tâk a nit, la tîng an ti,” itin.

⁵Khasikah khan PUMAPA khan a mihei ziangah ram khah a pêk kîr nôk tenan nangmani lâiah tutên dongtum nei no tin u.

⁶Mihei khan, “Kin ziangah thu ril no roh. Kha thuhei murdi khah inpuang no roh. Pathianin mualphoi ne sak tlak no nih.

⁷Israel mihei hih vânisâmna nuaia om ni sôn mani? PUMAPA khan lungdiarna a irsam tâk mani? Kha thilhei khah ai tho titak rang mani? Idik taka om ngaihei ziangah khan lungrivuai takkan ai ṭong ngai ni mak im a?” an ti a.

⁸Khante, PUMAPA khan a sâm a, “Ki mihei chu irâlhei angkan nin doi a. Irâl buala rithoka hong ikîrtuhei khan insungah chu râlringamna om a ti an ti a. Nikhomsela, nangmani nin lei om a, râlringam taka ina hong ikîrhei khah an silbom zakorfualhei nin lîp pai pêk a.

⁹Ki mi nupanghei khah an in ihoi tak ata nin ûm isua a; an naihei zianga ṭhatvurna kî pêkhei khah nin lâk pêk a.

¹⁰Thoi unla, ro pai rei; hi munah hin zôkna om khâi mak. Nin siatna sikin hi mun hih a siat a, inram ai nit rang tâk a nit.

¹¹“Uain neh zu nangmani rangin luang a ti,” itia milak neh lêmna thu rila rivâk vêlhei angkana bang khah hi mihei hin zânthlaa an îdit chu a nit.

¹²“Nikhomsela, o Jakobhei, nin rêngkan nangni koi bûm nôk ki ta, Israel mi la om isunhei chu ṭhui bûm nôk ki ti. Phûla bera lôm ilêng dûl dûl neh rikulsunga hong ilût zun zun angkan nangni ṭhui bûm ki ta, nin ram chu mipuiin la hong dâp nôk a ti,” a ti a.

¹³Pathian khan anmani ta rangin lampui iong pêk a ta, bôi ata khah anni chu ruai isuang a ti. Khopui kotpui khah nêr isim an ta, zôk an ti. Khante, an rêng kha an matonah lôn a ta, PUMAPA ngêi khan an ma iruai a ta, anni khah ruai isuang a ti.