Read Biete MIKA 3 Bible Online

MIKA 3 - Biete bible

MIKA 3

¹O nangni Israel ruaituhei, ringai rei, roirêl dikna kha nin ringai poimo rang ni mak im a?

²Khannisela, thil iṭha nin nel a, thil ṭhano nin ringaiinnat a. Ki mihei kha an iring pumin an vun nin lâi pêk a, an ruhei ata taksa khah nin khok a.

³Ki mihei khah nin fâk rimang a, an vun nin lâi pêk a, an ruhei nin ikhiak pêk a; bêla suang ranga sa richan nôi angkan anni khah nin richan nôi a.

⁴Zoro a hong itlung thiai mai tâk a nit, khatik tenan chu PUMAPA khah isam nin ta; nikhomsela, ani khan nangni sâm no nih. Nin sin siat lam angkah takin nangmani ata a mâi nangni thup pêk tâng a ti.

⁵Ipeh rang ineihei ziangah ringeina om a ti iti inkung a, ipeh rang nei inohei ziangah chu ridoina ai om rang, itia ṭhitu zânthlahei khan ki mihei chu an lêm a.

⁶Kha zânthlahei ziangah PUMAPA khan, “Zânthlahei, nin sûn â hek rang mâng mâng tâk a nit. Inlârna nin mu nona rangin nin ziangah zân zuang tlung a ta; thla nin sân thei nona rang dôran nin ziangah zîng richel zuang om a ta, sûn khom nin chungah zân thim ni tâng a ti,” a ti a.

⁷Matiang thil mutheituhei chu izak takkan om an ta, thlasân ithiamhei chu mualinphoi takkan om an ti. A nit, Pathianin a sâm khâi no rang sikin an rêngkan mâimôk takkan om an ti.

⁸Nikhomsela, keimah chu, Jakobhei ziangah an sinsiatna inreh rang neh Israelhei zianga an sualna inreh rangin PUMAPA Rithla khan sinthotheina hei, dikna hei neh râtna heiah khan a ne înritluk a nit.

⁹O nangni Jakoba neh Israel insungkuahei chunga ruaitu neh roirêltuhei, roirêl dikna ringainêp a, thudik milak inchang ngaihei ki tiang nin ikuar sung rei.

¹⁰Zion Pathian khopui Jerusalem chu thisenin neh siatnaa nin isin inding a nit.

¹¹Kha khopui roirêltuhei khan fâkinrûk sabei pumin roi an rêl a, thiampuhei khan lo ringot itûngin dân kha mi an inrisei a, zânthlahei khan sum itûngin thu an înpuang a nit. Khangkah dôran khom an rêngkan PUMAPA chu an zianga om maiin a la iriat a nit. “Thil ṭhano ei chungah tlung no nih, PUMAPA ei ziangah a om,” an la iti ngai a nit.

¹²Khasikah khan, nangmani sikin Zion chu loi angkan tukilet nîng a ta, Jerusalem chu thil isia bukna nîng a ta, Tempil omna tlâng chu rampui chang a ti.