Read Biete MIKA 4 Bible Online

MIKA 4 - Biete bible

MIKA 4

¹Sûn nungkhônheiah khan chu hingka hin nîng a ta, PUMAPA omna tlâng chu, Tlâng dang danghei nêka roinpui tak ni tâng a ta, Tlâng ichînhei chungah khan itôt lûr a ti. Amakhan nam tinrênghei fe zun zun an ti.

²Nam itam takkahei chu fêng an ta, an mihei khan, “Tho hong unla, PUMAPA tlângah, Jakoba Pathian inah khan fêng ei ti u; Khanchu, aman a lampui thurchihei kha nen risei a ta, A lampuiheiah khan lôn ei ti,” tîng an ti.

³Ani khan nam itam takka lâiah roirêl a ta, Ilah takka nam irât takhei lâiah khom rêl a ti. Anni khan an khandaihei kha âlkâina rangin suk an ta, An ifeihei chu theikung iṭang sâtna chemheiin icher an ti. Nam dangin nam dang chungah khandai ilek khâi no nia, Ridoi dân khom risei khâi no nih.

⁴Mi tinhei chu an grep rui nuaiah neh, An theipui kung nuaiah iṭhung an ta; Tute ṭi khâi no nih. Amahih Tinrêngthothei PUMAPA ṭongbâi suak a nit.

⁵Nam tinin mahni Pathian chit chubai ûn an ta; nikhomsela, keini chu PUMAPA kin Pathian chu kumkhuantluangkan chubai ûn mai kin ti.

⁶PUMAPA khan, “Zoro a hong itlung thiai a nit, khatikin chu kebâihei bûm ki ta, bôia tânghei neh ki kuttum ituanghei kha bûm inrichin ki ti.

⁷Kebâihei kha â thi ban la om isunin siam ki ta, ilah takka ûm isuaa omhei kha nam roinpui takin siam ki ti. Kha zoroa rithokin chu Zion tlângah kumkhuakan an chungah roirêl tâng ki ti,” a ti a.

⁸O nangmah, Jerusalem, bera enkoltu angkana Pathianin a mihei a enkolna mun, rampumpuia rêng iṭhungna khopui la ni nôk ni ta; a nit, nen lalna masa khah zuang tlung a ti. Jerusalem mihei chu an ram ipeh nôk nîng an ti.

⁹Îtho sik im iring taka nî ṭap ngûi ngûi? Ithôm nupang naiha isê angkana ina nî tuang? Rêng ni nei no sika mani, a nit nole, ni roisaktuhei an fam zoi tâk sika mani?

¹⁰O Zion nainu, nupang naiha isê angkan ina tuang inla, khêkiroi roh; atûn chu khopuia rithoka fe suakin, ramah nî om rang tâk a nit. Babilon idên dapkan fêng ni ta; amakhan ne râlhei kut ata PUMAPA khan nang san isua a ti.

¹¹Nam itam takkah chu nangma doi rangin an ribûm a, anni khan “Jerusalem chu porinche takkan om sela, ei mit hin Zion siatripna chu mu riseh,” an ti a.

¹²Nikhomsela, hi nam itam takkahei hin PUMAPA lungril khah reh mak a, a roiinrifûk kha rethiam mak e. Ani khan rîzôla ichîl rang fathlu buk angkan anmani chu ai buk a nit iti reh viat mak e.

¹³PUMAPA khan, “Zion nainu, thoi inla, ne râlhei chu sirpol roh, Dâr ketin ineia, thîr riki nei sechal angkana râtin nang siam ki ti. Khante, nam itam takkahei chu ito inrinôichit ni ta, zâlrâta richon an ibûmhei kha keimah, rammual pumpui ineitu PUMAPA ziangah lan tâng ni ti,” a ti a.