Read Biete MIKA 5 Bible Online

MIKA 5 - Biete bible

MIKA 5

¹O Jerusalem mihei, nin sipai lômhei kha bûm rei. Rihual khapin ei om tâk e! Israel ruaitu khom â biangah irolin an itôk a.

²PUMAPA khan, “Nangmah Bethlehem Efratha, Judai rama khopuihei lâiah â chînte ni khom inla, nangmaa rithokah hin Israelhei roirêltu ki ta rang hong suak a ti; Ani chu tianlâi ata richibula rithoka zuang inzir a nit,” a ti a.

³Khasikin, nai inei rangtu khan naiipa a nei mâkah chu PUMAPA khan a mihei kha an irâlhei kutah khan nungsong a ta; khanungchu, Israela richi bôia tânghei kha an chipuihei lâiah kîr nôk an ti.

⁴Ani khah a zuang tikin chu, PUMAPA râtnan a mihei chu enkolin, ifâ a ta, PUMAPA Pathian riming roinpuina ngêiah khan. Khante, a mihei chu izôkriam kan om mai an ta, ani chu kôlkil idênin roinpui tak ai nit rang a nit.

⁵Khante, ani khan ringeina thlun a ti. Asuria mihei khan ei ram an zuang rûn a, ei rinêng an zuang chuang tikin chu anmani doi rangin ei ruaitu râthei tir suak ei ta.

⁶Asuriahei ram kha khandaiin isiang an ta, Nimroda ram khan khandai ingaih tuang a ti. Asuria mihein ei ram an zuang rûna ei ramrî an zuang tlung tikin ei ruaituhei khan nen zôk an ti.

⁷Israel mi a la om sunhei chu nam itam takkahei lâiah PUMAPA zianga rithoka rido thla angkan neh loisûl chunga rua sûr angkan om an ti. Anni khan miriamah ni loiin Pathian chungah ringat tâng an ti.

⁸Khante, Israel mi la om isunhei chu namhei neh chi itam takkahei ta rangin ramsa lâia sakeibaknei angkah nîng an ta; bera lôm lâia sakeibaknei vânglâi a fena kipah bera lôm isêa sânphor ngai, tute ingam ino angkah hi nîng an ti.

⁹Israelhei khan anmani doituhei chungah khan an kut ilek an ta, an irâlhei khah inrimang vang an ti.

¹⁰PUMAPA khan, “Kha zoro tikin chu nin sakorhei nangni lah pêk ki ta, nin tâlihei isiang ki ti.

¹¹Nin ram sunga khopuihei inram ki ta, nin kulpuihei kha isim ki ti.

¹²Nin dôithiamnahei inboi ki ta; thlasân ithiamhei nei khâi no tin u.

¹³Nin mirmil siamhei neh ni lungphun rithianghei khah inboi ki ta; nin kut suak thil khah chubai ûn khâi no tin u.

¹⁴Nin pathiannu Aseri rilim nin iphunhei khah nam inlîr ki ta, nin khopuihei khah inram ki ti.

¹⁵Khante, ki thu zôm nuam ngai ino namhei chungah khan ningmurna neh ningthikna ritêlin phuba kî lâk rang a nit,” a ti a.