Read Biete MIKA 6 Bible Online

MIKA 6 - Biete bible

MIKA 6

¹PUMAPA khan Israelhei a demna thu chu ringai rei. O PUMAPA, thoi inla, ni demna thu ril inla, tlâng ilianhei neh tlâng ichînhei khan ni rôl kha reh riseh.

²O tlâng ilianhei, leilung ringatna rilunhei, PUMAPA demna chu ringai rei. PUMAPA khan a mihei chungah demna ai nei a nit, Israelhei khah ai sêl rang a nit.

³PUMAPA khan, “O ki mihei o, nin chungah im kî tho tâk? Îlam takâm nangni ki însôl? Ne hang sâm ta u.

⁴Aigupta rama rithokah khan nangni ki hong ṭhui suak a; bôi ata nangni ker tlan isua a; nangni ruai rangin Mosia hei, Arona hei neh Miriami hei ki zuang itir a nit kha.

⁵O ki mihei, PUMAPA sintho dikzia kha nin riat theina rangin, Moab rêng Balakan nin chunga itho a tum dân neh Beora naipa Balaaman a sâm dân kha remai unla, Sitima rithoka Gilgal idêna nin thil tonghei khah remai rei,” a ti a.

⁶PUMAPA makungah im hong chôi ki ta, Pathian inchungtak kha ingkan im ke khûn rang? Hâlrivâm thillana rang sialte kumka mihei neh a makungah khan kî fe rang mani?

⁷PUMAPA chu berachal sâng itam tak manih, oliv riak chât loia luang mai manih a khan â lung ai tluk rang mani? Ki siatna sikin ki nai lutîr kha ilanin ki sual manin ke rila râ kha kî lan rang mani?

⁸Ni mak, PUMAPA khan thil iṭha kha a ne ril tâk. PUMAPA khan ei mahnia ai chûn chu amahih a nit; dikna sina, lungkhamlianna inlang a, ringaiichîna ei Pathian neh ripôl maia om hi a nit.

⁹Khante, vârna nei mi khan PUMAPA chu ṭi riseh. Ani khan khopui kha â sam a, “Khopui sunga ribûm mihei o, ringai rei.

¹⁰Mi pualoihei inah khan siatna richon kokhei a om a, anni khan ritâna dikino kî nel tak kha an mang a.

¹¹Ingkan im rikhîna dikino neh varna dikino mang mihei khah ki ngaidam thei rang a?

¹²Nin mi richonghei khan inrianghei an sirde a, kha muna omhei murdi khan milak nin ril a, nin bâi sunga nin ilei khah lêmna sip a nit.

¹³Khasikin, nin siatnahei sikin inah takka kuttum nangni tho a, nangni inrimangin, nangni ki înram thiai tâk a nit.

¹⁴Ifah chu fâng nin ta; nikhomsela, khop no tin u, nin dîp zel sip no nih. Thil inlût nin ta; nikhomsela, rê thei viat no tin u, nin irê sunte khom ridoinaah nangni inrimang pêk ki ti.

¹⁵Chi tlâk nin ta; nikhomsela, ât no tin u. Oliv irâhei khah sôm nin ta; nikhomsela, a riak chu mang no tin u. Grep sôm nin ta; nikhomsela, a uain chu in no tin u.

¹⁶Rêng Omria neh a naipa Ahaba siatna lampuihei nin zui sikin khahei khah ai tlung rang a nit. An roisakheiah khan nin lôn sikin khopuia om murdi inrimang riai ki ta, mihei nuizabûr neh musit nîng nin ti,” a ti a.