Read Biete MIKA 7 Bible Online

MIKA 7 - Biete bible

MIKA 7

¹Lungdong a om vang na! Miriam voniṭâm, fûr thei kunga thei mu khâi ino neh grep kunga â râ mu khâi ino angkah ki nit. Grep irâhei murdi neh theipui irâ tuitak murdi khah rimal vang a nit tâk a.

²Pathian ngaisak mi zel rinêngah hin om khâi mak a, miriam lâiah mi dik tak zel om khâi mak e. Thisen isua tumin ruang richuan risakin an om a, mi tinin mahni suapui khom iman rangin an ridîp a.

³Thil ṭhano tho khah an thiam a, ruaituhei neh roirêltuhei khan fâkinrûk an fâk a, milianhein rizukna ṭhano neiin an nuam nuamkan an ṭong a, khangkana tho rangin an inrual a.

⁴An lâia mi ṭha tak khom khah ibuar angkah a nit a, mi dik tak khom khah dâidul loi nêkan ai siat ual a nit. Mihei khah Pathianin deng ân thei rang nikhua a hong tlung thiai tâk e. Atûnah hin lunginzîngin an iom thiai tâk a nit.

⁵Ni suapui manih, ni rualhei manih khom iam non la, an chungah ringat no roh. Ni nupui zianga lua khom ni mûr ni bâi itik roh.

⁶Naipa khan a pa musit a ta, nainu khan a nu îte ben be no nia, imoi khan a tarpi doi a ta; miriamin â râlhei chu ama insungkua mi ngir nîng an ti.

⁷Nikhomsela, keiman chu PUMAPA tiang en ki ta, ki saninringna Pathian khah ngâk mai ki ti. Ki Pathian khan ki rôl ner ngai pêk a ti.

⁸O ke râl, ne riam no roh; ilîr khom inlang thoi nôk ki ti; izîngah om khom inlang PUMAPA chu ki ta rangin ivâr nîng a ti.

⁹PUMAPA chungah thil ki thonsual tâk sikin, a lunghoi no natinsat tak kha ituang rang pial ki nit, ki chungthu a rêl fel a, ke dikna a târ inlang mâkah chu; khanchu, ivârah ne ṭhui a ta, a saninringna khah mûng ki ti.

¹⁰Khanchu, ke râl, ki zianga, “Taktiang im PUMAPA ni Pathian te?” ititu khan amakhah mûng a ta, izak tak tak a ti. Ki mit ngêiin â lîr lâi mûng ki ta, kotsuaa dialdôk angkan sirpolin om a ti.

¹¹Jerusalem mihei, nin kul banghei siam nôk zoro a tlung tâk e; kha tikin chu nin ramrî inrizat ni tâng a ti.

¹²Nin mihei khah kil tina rithokin: sak tiang Asuria rama rithok hei, sim tiang Aiguptaa rithok hei, Eufratis tuihuala rithok hei, tuikhanglian neh tuikhanglian kâra rithok hei, tlângram ilah taka rithok heiah khan ni ziangah hong an ti.

¹³Khannisela, rinêng kha a sunga omhei siatna sikin ramchârin om mai a ti.

¹⁴PUMAPA, Karmel tlâng ramnuaia beindong takka om ner chon bera lôm, ni mihei kha enkol inla, tianlâia angkah khan Basan neh Gileada sûlringna munah khan ifâ roh.

¹⁵Aigupta rama rithoka ni ne hong ṭhui suak lâia angkah khan PUMAPA kin ta rangin thil rikhêl tho roh.

¹⁶Nam tinin amakhah mûng an ta, an sinthotheina murdi khah izakpui an ti; an mûr hup an ta, an ikuar hip an ti.

¹⁷Irûl angkan ipil iliak an ta; rinênga bokrivâka lônhei angkan an omna kulpui sunga rithokah khan iṭi neh rilônthing pumin hong suak an ti. Anni chu PUMAPA kin Pathian ziangah khan iṭi pumin hong an ta, ṭi tak tak an ti.

¹⁸O PUMAPA, nangma angkana Pathian dang omak e. Ni mi la om isunhei puanona neh siatna ne zâ ngai a. Ni ningmurna khah kumkhuakan vong mai mak che a, kin chungah lungkhamlianna inlang khah ni lôm tak tak ngai a.

¹⁹Kin chungah ni lungkhamna inlang nôk ni ta; kin siatnahei kha ni ke nuaiah sirde ni ta, nangman kin sualna murdihei kha tuikhanglian mong inthûk takheiah khan pai ni ti.

²⁰Tianlâia kin pipuhei zianga ṭong ni înkung tâk, ni mi Abrahama richihei, a nit, Jakoba richihei ziangah thutak neh lungkhamlianna kha inlang ni ti.